الوشم الجزء ٤

الباب وقتها خبط، وكان العسكري جايبلي الحباية، وفنجان قهوه

قلتله وأنا باخدها:

– "قولي يا إبراهيم، تعرف سامي من إمتى؟"

قال وهو بيفرك في إيده:

– "من ساعة ما اشتغلت — من تلت سنين يا بيه — في القهوة، وأنا بشوفه باستمرار؛ معادا الخميس والجمعة مكنش بييجي. غير كده، كل يوم بييجي."

قلتله باستغراب:

– "يعني الخميس اللي فات ده مجاش؟"

قال بصوت واطي:

– "لأ، مجاش."

قلتله وأنا بسند على المكتب:

– "قولي يا إبراهيم، إيه رأيك في سامي؟ يعني أخلاقه وكده؟"

قال بحزن:

– "يا بيه... اذكروا محاسن موتاكم... أقول إيه بس؟"

قلتله وأنا بتنهد:

– "الكلام ده لو كان ميت عادي. إنما ده مقتول؛ لازم نعرف أدق التفاصيل عنه عشان نقدر نوصل للقاتل بسهولة."

وبعدين، وانا بقف، قلتله:

– "ولا إنت مش عايزنا نوصل للي عمل كده؟"

قال وهو بيرتعش:

– "إزاي؟! لا طبعًا، عايزكم توصّلوا للي عمل كده."

قلتله وأنا بلف حواليه:

– "حلو. يبقى تساعدنا. أي حاجة تعرفها عنه تقولنا عليها."

قال وهو لسه بيفرك في إيده:

– "هو يا بيه... كويس، بس بتاع بنات كتير. كان لما بيجي كنت بسمعه بيتكلم مع بنات في الموبايل."

قلتله:

– "كويس. متعرفش أسامي البنات دي إيه؟"

قال وهو بيهز راسه:

– "لأ يا بيه... ما افتكرش. بس كان باين إنه بيتكلم مع بنت."

رجعت للمكتب وقلتله:

– "وأيه تاني؟ مفيش أي حاجة تفتكرها تاني؟"

قال بصوت واضح:

– "كان فيه حاجة كمان، كنت باستغرب أوي. ساعات يقولي 'مش معايا فلوس خالص، سجل على النوتة'، وأوقات ييجي يدفع كل اللي عليه وبقشيش حلو كمان."

قلتله:

– "ومتعرفش كان بيجيب الفلوس منين؟"

قال وهو موطي:

– "هو كان شغال سواق على عربية بيوصل العيال للحضانة."

قلتله وأنا بشرب القهوة:

– "قولي بصراحة، مكنش بيتعاطى حاجة؟"

قال وهو بيهز راسه:

– "لأ يا بيه، آخره شيشة وسجاير بس. عمرى ما شفته بيشرب حاجة تانية، ومكنش باين عليه حاجة."

قلتله:

– "وهَيِبان إزاي بقى؟"

قال وهو بيشاور على عينه:

– "بيبَان في العين يا بيه... واللي بيشرب بيبقى تصرفاته مش طبيعية. وأنا عمرى ما شفته كده؛ كان طبيعي."