عارفة يا وَعد!

الورد إن غاب عنه حبيبه

بيموت الورد..

وأنا قلبي اتربىٰ يعيش بيكِ

ويخاف الصَد

ويشوف الليل، يفزع منه

يتعب من بُعدك، وكأنه

مجلود في البرد

الليل..

الليل من غيرك

سما سودة

السما من غيرك

مَسرودة في سطرين بايخين

مكتبي في غيابك مرمي عليه

سطرين تايهين

شطرين بايخين فقدوا المعنىٰ

حِفنة أبيات صابهم لعنة

كتابين عن حب نازر الأعمى

وجُبران رافض يرثي الغايبين

هما الغايبين إيه مقاصدهم؟!

لكن،

غايبين..

أما أنتِ يا وعد..

دون الباقيين

غير الباقيين

وعدك ومشاعرك وكلامك

صوتك وهدوءك وسلامك

ساكنين قلبي وساكن قلبي بفعل عنيكِ

كان نفسي يا وعد الدنيا بحالها تكون زيك

كان نفسي الكون يبقا ايديكِ

ببساطة تفاصيلك مثلًا

بحرارة توديعك إيدي

أنا واقف وسط الناس وحدي

أنا وحدي وواقف وسط الناس

من دون الناس شايفك جنبي

ومن حُسنك شايف حُسن الناس

علمتي القلب يشوف الناس

علمتي القلب يحب الناس

وأخيرًا

في سياق الأحداث

كان لازم قلبي يقول الوعد

أنا بيك يا وعد