في دايماً خطين متوازيين في حياة أي حد مبيعرفش يعمل حدود
هتلاقيه دايماً شغال خدام لناس بيشتكي من خدمتهم، و يبعد بعمد عن حد بيساعده او يجمعه بيه علاقة حب صحية
ليه بيعمل كده ؟
لأنه مبيحبش نفسه بما فيه الكفاية اللي يخليه يستقبل الحب او يقدره، فبيكون أسهل عليه إنه يصدق ان الحب له تمن لازم يدفعه، فلما تشغليه خدام عندك بيحس بالأمان لأنك بتدفعيه تمن المحبة فبيتأكد انك مش هتتخلي عنه
بينما لما تديله الحب بدون شروط، بيحس انك ممكن تتخلي عنه في أي لحظة، و هو صح، لأنك فعلاً ممكن تمشي في أي لحظة مش حاسة فيها بسلام نفسي رغم الحب
طيب
ده بيوصلنا لحتة كده ان لازم تكون قوي بما فيه الكفاية انك متخافش لو الناس مشيت، ليه ؟
عشان تحظى بعلاقات تتحب فيها حب حقيقي، مش حب مبني على خدمات او مشروط باللي بتقدمه في العلاقة
و ده لأن الناس المُحبة ملهاش عندك مصلحة، هي موجودة لأنها بتحبك، فلو حست ان علاقتها بيك بدأت تدخل نقطة غامقة هتنسحب بهدوء عادي جداً
= طب ايه الميزة في ده ؟
- ببساطة لما بتتحب حب حقيقي بتحافظ على نفسك و صحتك و مجهودك و بتطور للأحسن، لكن لما بتتحب للي بتقدمه، مبيكونش عندك حاجة تقدمها لنفسك و بتكون مستنذف
= مستنذف مستنذف بس دمي خفيف
- التعامل مع شخص مستنذف غير انه بيسرق من طاقتك، اول ما يشحن هيروح يديها للناس اللي مشغلينه خدام مش هيرجعهالك في وقت انت محتاجها فيه
فمش هتكون بتستثمر في مكان بيعود عليك انت بالنفع، لأ
هو هيعود على ناس انت متعرفهاش ولا تجمعك بيهم علاقة
ببساطة.
#آية_الغمري
2
-2
