بعد الآن : الرحلة

مرحبا معكم وليد أنا من المستقبل السنة اللي أنا فيها سنة 3200

حياتنا أتغيرت تماما سبنا كوكب الأرض للفقراء وللناس اللي لسه مقتنعة أن في حدود وان لازم تحارب علشان تحافظ على الأرض اللي تحت سيادتها.

وعلشان معتقداتهم القديمة دي الأرض في صراع على طول بين الخير والشر

بقت مكان غير محتمل للعلم للتفكير وتحقيق الأحلام

استوطنا الكواكب بنينا بيوتنا هناك من مواد مكثفة من جزيئات النانو

كل حاجاتنا قايمة على تقنية النانو لان بسببها بيتحول المعادن واي حاجة نستخدمها لمادة صلبة مستحيل ان تتحطم أو تنكسر، كمان بتقدر تستحمل أي تغيرات جوية وتناسب كل الأجواء على الكواكب اللي هاجرنا ليها..

اخترع علماء زمانا مكوك فضائي بتقنية النانو ولأنه استخدم مليارات الذرات في تصنيعه أخد وقت كتير على ما جهزة للسفر بين الكواكب ونقل الناس ..

اختارنا الناس اللي هتسكن الكواكب دي واللي هتقوم بالرحلة في المكوك النانوني بشروط خاصة عملنا اختبارات نفسية لازم يجتازها استبعدنا أي حد عنده نزعة عنف أو أراء متعصبة .. اخترنا اللي بيحب العلم اللي بيحاول يقدم حاجة تخدم البشرية .. لحسن الحظ قدمت واجتزت الاختبار وجه وقت التنفيذ والسفر..

اخدوني لمكان زي القلعة بس كله مكون من مادة الزركون وعرفت أن السفر مش هيتم غير بتقنية الكرايونيكس

يعنى التجمد .. استغربت أنهم بيستعملوا التقنية القديمة دي في السفر .. كنت متوقع ومجهز نفسي أني استمتع برحلة السفر بين الكوكب علشان لو رجعت تاني للأرض يوما ما أحكى للناس اللي شفته ..

أول ما وصلت القلعة استقبلتني فتاة لابسة ملابس لونها ميتالك وعلى وشها خوذة شفافة ودخلتني أوضه وقفتني في نصها وبعد شوية سمعت صوت آلى بيقول اكتم نفسك

وغمض عينيك نفذت التعليمات حسيت بحاجة سخنه بتعدي على جزء جزء في جسمي ..

عرفت أن دي أشعة فحص بتتأكد أن جسمى سليم ومش هنقل أي عدوى لسكان الكوكب اللي هروحه

خلص الفحص وسمعت الصوت الآلي بيقول أتنفس عادي

فتحت عيني لقيت الاوضه اتفتحت وظهر حواليا مجموعة علماء كلهم لابسين لبس زي بعض زي رواد الفضاء ..

قال واحد منهم في ميكرفون لابسه في ايده زي الخاتم

على بعد تلات خطوات وفي يمين الاوضة صندوق افتحه

روحت للصندوق وفتحته لقيت فيه ملابس زي بتاعتهم قالي البسها أنت جاهز للسفر.

فرحت لان أخيرًا حلمي هيتحقق..

لبست وقفت في نص الأوضة وأنا بقولهم أنا جاهز

ظهر من جنب الأوضة بعد ما أتحرك الجدار صندوق أزاز زي التابوت قربت منه لقيت مكتوب عليه معلومات بتظهر بلون ازرق فسفوري بيظهر ويختفي

مرحبا بك في رحلة الكواكب السبعة

أنت مؤهل لهذه الرحلة استلقي واسترخي وأغلق عينيك وفكر في شيء جيد ..

نفذت التعليمات ونمت وغمضت عيني

أتقفل الصندوق عليا بهدوء وعلى مراحل وابتدا بخار اخضر يغرق الصندوق وابتدا يتهز شوية ومحستش بنفسي خالص ..

وبعد حوالي عشر ساعات

حسيت أني حاسس باللي حواليا فتحت عنيا لقيت أني جوه الصندوق وانه مفتوح ومفيش البخار اللي حسيت بيه في الأول والمكان ضلمة .. اللي منور بس مؤشر احمر موضح التوقيت وده اللي عرفت منه أن مر عشر ساعات..

حاولت أقوم مقدرتش

حاولت أتكلم صوتي مطلعش

حاولت أحرك أيدي أو رجلي مقدرتش

قولت أكيد أنا لسه تحت تأثير الغاز أكيد مخدر قوي

فكرت طيب هفضل كده كتير

سمعت صوت بيخترقني بيقول

أزيك كويس انك ابتديت تفوق

مرحبا بك على زحل

حاولت أرد وأحرك شفايفي معرفتش استغربت ان الصوت اللي سمعته جوايا مش من حواليا مش من بره..

ركزت وهديت كده وقولت : طيب أنا ليه مش قادر أتحرك

قال الصوت : وتتحرك ليه

قولت : اومال هي اسمها رحلة ليه مش علشان استكشف وأشوف أنا فين وازاي عايشين هنا

ضحك الصوت وهو بيقول بسخرية: لازم يعملوا لكم اختبار سذاجة

أنت متعرفش أنت ليه هنا؟

قولت : ليه

قال الصوت هقولك

وغمر الأوضه ضوء احمر فتحت عيني لقتني داخل مكان زي الصوبة الأزاز

سقفه أزاز شفاف كاشف سما الكوكب فيه غبار طاير كتير وصخور كتيير مختلفة الأحجام ووسط ده كله طيور ليها رأس الصقر بس أجنحة الخفاش وحجمها مختلف .. وبتحاول تخترق الأزاز بتاع الصوبة

شكلها بيخوف جدا أنا عندي فوبيا من الطيور بشكل عام بحس أنها هتخطفني وتطير وترميني من فوق وانزل على الأرض وأتقطع لأجزاء كتييره.

الصوت قال أيه رأيك في اللي شفته

قولت : أنا مش شايف غير السما أنا عايز أشوف انتوا ساكنين في أيه بتاكلوا أيه عايشين زاي أنا استفدت أيه من السما اللي عرضتها عليا دي بعدين انتم مين أصلاً وازاي بتكلمني كده من غير ما أشوفك أو أحس إني بكلمك

ضحك الصوت بطريقة آليه وهو بيقول : هجاوبك على كل حاجة بس لما تنجح في باقي التجربة

وفجأة حسيت أني اقدر أتحرك بسهولة استغربت وبعدين قمت من مكاني وانا عمال اتأكد من رجلي وأيدي وأحركهم كنت حاسس أنهم مخشبين شوية ..

بعدين بصيت حواليا لقيت نور جاي من أخر المكان مشيت تجاهه لقيت بوابة أزاز بتتفتح وغصب عني تلقائي عبرتها لقتني وسط ميدان كبير دائري مليان ناس كتير لابسين لبس عادي بس موحد اللون وبيتحركوا بانتظام الغريب انم فيش على ملامحهم أي تعبيرات استغربت وقولت هما ليه عاملين كده . لسه همشي خطوة لقيت مجموعة مسلحة حاوطتني من كل جه وهما شايلين أسلحة تشبه البنادق بس بيطلع منها شعاع شل حركتي خلاني متسمر مكاني ..

بعدين واحد منهم جاب تابوت أزاز زي اللي كنت جاي بيه ونيمني عليه وركبني مركبه تشبه القطار بس طائر بدون قضبان ولا حتى أي حاجة معلقة .. كنت بتأمل اللي عندهم وأنا مش فاهم في أيه..

حاولت أتكلم معاهم محدش بيرد عليا ..

قررت أني اسكت ..لما أشوف هنوصل لأيه .. القطار الطائر وقف أدام ممر كبير في مبنى ضخم على شكل هرم زجاجي ودخلوني جواه .. استقبلني مجموعة من الرجال لابسين لبس معدني وهما بيمرروا على جسمي مجموعة من الأشعة بشكل متتابع اصفر واخضر واحمر لحد ما اللون الأحمر وقف على موضع القلب ..

وفضل ينور ويطفي ويصدر صوت زي الإنذار كده

استغربت وخوفت حسيت أن في حاجة غلط ..

بصيت حواليا لقيت مجموعة من الرجال اللي لابسين ملابس معدنية معاهم أدوات جراحية وهما بيقولوا وصل المتبرع بلغوا الإدارة

حاولت الهروب أو الاعتراض محدش سمعني .. صرخت فيهم أنا مش متبرع أنا جاي في رحلة ..

استنوا لالالا

وحسيت بالمشراط وهي بتشق جلدي بأشعة الليزر اللي بتطلع منها وأنا بصرخ من الألم استنوا وابتديت أحس بان روحي بتتسحب مني ومش قادر انطق بقيت أقول لهم بصوت متقطع

أنا مش مت ب رع

أنا جاي ...

ولقيت قلبي بين ايديهم وهو بينور بلون اخضر ..

قولت أيه ده فين قلبي انتوا سرقتوني وأنا متجمد .. فين قلبي البشري.. فين ..

سابوني مكاني وهما واخدين قلبي بين أيدهم وقال واحد منهم

افتحوا الشباك لازم نغذي الطيور علشان متهجمش علينا لفترة طويلة

جسم الانسان هو الغذا الوحيد اللي بيخلينا نعيش في سلام لمدة تلات شهور..

قولت بضعف

لا طيور لا

أنا بخاف منهم

والطيور هجمت عليا ومنقارها عمال يقطع في كل حته فيا وأنا مش قادر أبعدهم عني أو أدافع عن نفسي..

*********

تمت