ليه ياابن بلدى للغربة دايما زبون
تسيب بلدك وتروح لغيرها تغسل صحون
كل ده علشان شوية فلوس ده هى بيك أولى
وكل حاجة علشان خاطرها تهون
وعجبى
_________
ليه ده عايش فى فيلا وده عايش فى زقاق
ليه ده عايش فى لمة وده دايما فى فراق
قلت متستغربوش ولا تسألوش كتير
ده رب العباد مقسم الأرزاق
وعجبى
___________
شبابنا ضايع بين عنوسة وبطالة
وده مدمن وده حالته حالة
وده ولا دارى باللى حواليه
وكأننا فى عرض فى صالة
وعجبى
_________
مصر ياأم الخدود الوردى
الشعر طويل والبشرة قمحى
مين فى جمالك ياحبيبتى
لكى حبى وعشقى وودى
_________
فى كل قصة عشاق بيكون الأمل هو البطل
حب وهيام والفراق مش محتمل
وبعد سنين تخلص الحكاية
ويفترقوا الأحبة بعد ما يصيبهم الملل
وعجبى
_________
ليه عايش كأنك كومبارس فى مسرح الحياة
بتتفرج على اللى بيصارع فيهاواللى فى ملتهاه
حاول تخلى ليك فيها دور ومتكونش عابر سبيل
وكل وحد بيشق طريقه ومفيش حد بيستناه
وعجبى
_________________
شباب مالى القهوة بعد ما أخد الشهادة
قلت لهم ما تدورا على أى شغل ده العمل عبادة
بصوا لى وضحكوا بصوت عالى بس حزين
وقالوا أسكت أحسن وأطلبنا واحد قهوة زيادة
وعجبى
__________
ليه مفيش حد فى عشته مرتاح
كله حزين وبائس مسا وصباح
دورت فيكى يادنيا على حد سعيد
مالاقيت ان كان دكتور ولا حتى فلاح
وعجبى
_________
ليه بنبعد عن بعض وبنبنى سدود؟
سؤال حزين من غير ردود
مفيش حد هياخد منها حاجة
وبكرة كلنا هنبقى أكل دود
وعجبى
________
نصحت اللى كل هدفه فى الحياة هو الشر
قلت له أنت فى النهاية اللى هتنضر
قالى أنا مبسوط وبفتخر بحالى
وكل واحد ياسيدى فى تصرفاته حر
وعجبى