موظف حكومة
موظف حكومة ياعيني غلبان
ينام مرة وهو جعان
ويبات مرة وهو شبعان
واهي مستورة وبيحمد الرحمن
************
موظف حكومة حلمه ينام مرتاح البال
ويترحم شوية من طلبات العيال
اللي بقت عاملة زي الجبال
وياريتهم عيل واحد دول تلال
ياعيني نفسه يترحم من السؤال
فين يابابا الفلوس
عايزين ندفع الدروس
ده غير طلبات الست هانم المدام
عايزة تغير الفرش وسيراميك الحمام
*****************
موظف حكومة حلمه يشحن ب50 جنيه
نعم!!لا ده كده خياله واسع هو بيقول ايه؟
ما هو نفسه ياعيني يتصل علطول
بدل من كلمني شكرا او الميسد كول
ونفسه يخلص بالمرة من مرارة الفول
وتنتهي كل الديون اللي مكتوبة في الكشكول
موظف حكومة حلمه يرجع لأولاده ببطيخة
او يعيش زي غيره عيشة مريحة
يرجع من الشغل يتهد وينام سطيحة
وكل امله ربنا يعديها ويستره من شر الفضيحة
ياما نفسه تفضل الماهية في ايده لاخر الشهر صحيحة
**************
موظف حكومة حلمه بسيط
يخلص من هموم التقسيط
ويشتري مروحة ويترحم من الحر الشديد
ما هو ياما حلم وايه الجديد!!!
********
موظف حكومة قدامه دوسيهات على المكتب
بيمقق عينيه فيها واخرتها ملاليم مسمينها مرتب
وهو يدوبك يوم واحد ويكون بعده مشطب
ياعيني على موظف الحكومة المسكين
نفسه يغير البدلة اللي لابسها من سنين
ده كل ما يشتري لنفسه حاجة
يقول ولادي محتاجــــــــــــين
ما هو الماهية يدوب هيجيب منين
يسرق ولا يزور ولا يبقى من النصابين
**************
من اجندة الواقع..بلاش اجندة دي نخليها من ملفات الواقع
كتبت القصيدة دي من حوالي 5 شهور..ياترى ممكن الحال يتغير
بعد الثورة واغير القصيدة كلها بالمرة:confused: