حاولت امسك القلم واكتب أي حاجة مش عارفة اكتب ايه؟؟؟؟؟؟؟؟ نفسي اكتب جوايا أفكار كتير لكن مش عارفة اخرجها على الورق
ايه اللي حصل ده أنا عمري ما خصمت الورقة والقلم يمكن هما زعلانين مني..جايز ..دخلت علطول في مشكلتي اللي بتواجهني من فترة ونسيت اسلم على مدونتي وأقولها افتقدتك كثيرا وازاي انسى اسلم على تاميكوم بأعضاءه اللي موجودين واللي رحلوا
مفتقدة لكل حاجة..مفتقدة للون الموف والحجم 5:D
..يمكن مفتقدة لنفسي ..نفسي اكتب ومحتارة يمكن تايهة او مش مركزة احتمال كل شئ وارد
تعرفوا انا هكتب اصل لازم اكتب النهاردة اي حاجة
عارفين انا هكتب عن حياتي في خلال 3 الشهور اللي فاتوا مستعدين تسمعوا لحكياتي ..أوك ..اعتذر من المصطلحات اللي هتشوفوها في الموضوع ده ..كله بسبب الفيس بوك!!!!!!!
اه الفيس بوك ..كانت مغامرة كبيرة ..ولا مغامرات السندباد..ما علينا هحكيلكوا الموضوع من الأول
كان ياما كان ياسادة ياكرام وما يحلى الكلام الابذكر النبي عليه الصلاة والسلام ..من زمان مش من زمان اوي من حوالي 3 شهور بنت اسمها سارة او زي ما عرفتوها بإسم صدفة سعيدة بتحب تكتب ..تكتب اي حاجة المهم تكتب ..اهم حاجة كانت دايما موجودة فى شنطتها النوت بوك والقلم ..وفجأة ..لا الساعة مدقتش 12 ..فجأة جالها حالة ملل او بمعنى أصح زهق..زهق من كل حاجة ..كانت دايما بتتكلم عن الناس المتحولين ..الماسكات ..وفى يوم من الأيام اكتشفت انها واحده منهم ..متحولة ..:confused:
المهم اتحولت صدفة سعيدة لصدفة مستاءة بعدت عن كل الناس ..عن اقرب الناس ليها ..ملقتش غيره قدامها اللي تحاول تهرب فيه
هتسألوا هو ايه هقولكوا هو "الفــــــــــيس بـــــــــــــــوك "..عالم غريب ..عملت جروب ديني ..ودي حاجة كويسة لكن فجأة اتعرفت عليها ..هتسألوا هى مين تاني؟؟..هقولكوا "لعبة على الفيس بوك اسمها سيتي فيل ..أول مرة دخلت على أساس تجربة ومرة في مرة اصبح ادمان ..مش بتقوم من قدام الكمبيوتر حتى فروض ربنا بقت تصليها كلها مرة واحدة ده ان صلتها من الأساس..سارة اللي اي حد يطلب منها أي مساعدة مكنتش بتتأخر بقت تتطنش ..وشعارها فى الحياة بقى طنش تعش منتعش..ومرت الايام والاسابيع والشهور وهى على ده الحال أصحابها يتصلوا بيها ولا هى هنا ..مش شايفة قدامها وكإن النداهة ندهتلها ..أصحابها حاولوا يخرجوها من اللي هى فيه ويقولولها حرام تضيعي كتاباتك فى الشعر في كلام فارغ ..ولا الهوا مكنش بيأثر فيها ..وفجأة فاقت سارة من المخدر وحاولت تقلل الجرعة شوية بشوية لحد ما بقت تمام ..يمكن لسه فيه اثار جانبية لكن اهو أحسن من الأول..بس فاقت بعد ما فقدت ناس قريبة منها ..فقدت قدرتها على ابتكار الافكار ..فقدت قدرتها على الكتابة ..فقدت حاجات كتير ..بس بتحاول ترجع نفسها تاني وأنا متأكدة انها هتقدر ان شاء الله ..ودي كانت حكاية ال 3 شهور بإختصار...

على فكرة ده الموضوع رقم 50 في مدونتي العزيزة اكتشفت ده بصدفة وأنا بنزل الموضوع في المدونة ..وكانت صدفة سعيدة وبشرى خير
بعتذر عشان كتبت باللغة العامية لكن كعادتي لما بحب احكي روايات وقصص لازم استخدم اللغة العامية:)

مستعدين تقرأوا لمواضيعي التافهة من جديد ولا ارجع للفيس بوك:p