دخل الدكتور آدم عيادته الخاصه وما إن فتح الباب فوجئ بالزحام الشديد .قال موجهاً كلامه ل"مى" الممرضه

_ايه ده!

توجهت"مى" ناحيته وهى منفرجه الأسارير تضحك بصوتٍ عالٍ

_ شفت الدعايا اللى عملتهالك يادكتر

قال مستغرباً:

_ دعايه ايه وإيه الناس دى كلها

قال بابتهاج :

_ دى بركاتى ..لازم تزودلى مرتبى .أنا عايزة مكافأة حضرتك

_ ماشي ياستى بس أعرف فيه ايه؟

_ اتفضل حضرتك جوا أوضه الكشف وبعدماتشرب قهوتك هقولك الحكاية

_ حكاية!.. إحنا هنقعد نحكى حواديت .أومال الناس دى هتكشف امتى 

_ متقلقش يا دكتر ..كله هيبقي تمام 

قالت وهى تلعب بخصله شعرها المنسدلة من تحت الحجاب 

_ مقلقش ..أهو أنا مش قلقان غير من شوية الشعر اللى هربانين من تحت طرحتك دول

ابتسمت "مى" وخرجت

وبعد ساعه

آدم : فيه حد تانى برة.. انا تعبت خلاص

مى : لا يادكتور تمام كده

_ طيب جهزيلى الحساب

_ حساب ايه؟

_ هو إيه اللى حساب ايه؟

_ الفلوس

_ فلوس ايه؟

_ إنتى بتستعبطى ..تمن الكشوفات دى كلها 

_ آااه..إنت تقصد فلوس الكشوفات اللى دخلت النهاردة 

_ أيوة يابنتى .إخلصى عاوز أجيب طلبات وأنا مروح.لحسن أختك هتنفخنى لو مجبتهاش

_ إنت نسيت يا آدم ان دا اليوم المجانى

_ يوم إيه ياختى ..مجانى

_ ماهى دى الدعايا اللى قلتلك عليها امبارح يا آدم

_ أولاً احنا فى العيادة يعنى تقوليلى يادكتور .مش عشان إنتى اخت مراتى ..تبقي سايبه

_ أوووف خلاص يادكتور ال...

_ متقاطعيش كلامى لو سمحتى،وثانياً يا هااانم إنتى مقولتليش ع اليوم المجانى ده

_ قلتلك والله بأمارةماكنت بتكلم هاجر فى التليفون

_يعنى بذمتك أنا هركز معاكى وللا مع أختك فى التليفون..يا "مى" عشان خاطر ربنا أبوس ايدك هاتى فلوس العيادة ..ربنا مايوقعك فى ديقه

_ وربنا ماخدت ولاجنية .مجانى يادكتور

_ مجانى يادكتور ياخرااااب بيتك يادكتور دا النهاردة بالذات مش معايا فلوس ولسه بدرى على مرتب المستشفى . طاب اعمل إيه بس ياربى

_ مستشفت إيه بس..هو دا مرتب

_ ياشيخه إتنيلى ..إسمعى يابت عملتك السودة دى انا هدفعك تمنها غالى اوى..إنتى سامعه وبكرة....

_ بكرة هههه بكرة ه...

_ إوعى تقوليلى مجانى برضه

_ لاااا..بس الكشفين عليهم كشف هدية والكشف بربع التمن 

_ بإيه ياختى ،طاب ماتجيبي طقم كوبايات ودسته اطباق وتخلى الكشف عليه كوباية هدية أو طبق ميلامين

_ والله فكرة

_ فكرة..دا أنا هجيب خبرك النهاردة

_إيه ده انت هتضربنى!

_ وهكسر عضمك كمان 

_ خلاص يا آدم سيب الخشبة اللى فى إيدك دى والنبي

_ قوليلي يابت مين مسلطك عليا..مين صاحب الأفكار دى..إنطقي لحسن أكسر اليافطة دى على دماغك

_ خلاص..هقول هقول..ددددى

_إخلصي

_ دى هاجر أختى

_مين؟!

_ إيه مالك سِكت كده ليه؟ ..أيوا كده إبلع ريقك واهدى 

_ هاجر ..ماشي ياهاجر..أنا هعرف شغلى معاكى .روحى إطلعى لدكتور حازم وهاتيلى منه ألفين جنية عشان قسط الجهاز الجديد ..يللا مستنيه ايه

وفى المنزل

هاجر : حمد الله ع السلامه..فين الطلبات اللي قلتلك عليها وإيه اللي أخرك كده

آدم : وهى فين الفلوس اللي هجيب بيها الطلبات 

_ يعنى إيه..هى العيادة مشتغلتش النهاردة 

_ لأ اشتغلت وطلعت من المستشفى ع العيادة على طول وبدأت من بعد العصر لحد12بالليل

_ طاب كويس ..فين بقي اليومية

_ يومية..هو انا شغال فى فرن

_ أقصد الفلوس

_ مفيش ..النهاردة يوم مجانى ..شورتك المهببة ياهانم ..عملتى عليا اتفاق انتى واختك ووقفتوا حالى وخربتوا بيتى

_ آه صحيح ..دا اليوم المجانى اللى إتفقنا عليه

..طاب وانت مش معاك فلوس خالص.عاوز تفهمنى إنك بتصرف كل اللى معاك يوم بيوم

_ إنتى مخليالى حاجه ..هو انا مش لسه دافع امبارح الإيجار بتاع الشقة والعيادة والكهربا والمية وقسط العربية وفاتورة النت و.....

_ طاب بس بس مكنش سوءال يعنى خلاص مش عاوزة حاجه ياساتر 

_ أنا هلاقيها منين وللامنين..منك فى البيت وللا من أختك فى العيادة وللامن أخوكى فى المستشفى .إنتوا عاملين عليا حصار 

_ هو فيه إيه انت عايز تتخانق وخلاص..الحق علينا اللى عاوزين مصلحتك وقلنا نشغلك العيادة بدل ماانت حالك واقف كده..هو فيه حد عاقل يفتح عيادة فى عمارة فيها اربع دكاترة نفس التخصص وأساتذة كمان 

_ يعنى أعمل ايه...مش اللى لاقيتها 

_ خلاص ..إهدى حصل خير إدخل غَير هدومك عشان تتعشي 

_ ماليش نِفس

_ليه بس ياحبيبي دا انا عملالك الفراخ المشويةاللى بتحبها

_ ههههه..لابقي طالما فيها فراخ مشوية نبقي نتعشي

وفجأة يدق الباب

هاجر : مين اللى هيجيلنا دلوقت

آدم : استنى ..هشوف أنا مين

ويفتح الباب وإذا بها جارته الشابة

_ إلحقنى يادكتور..ماما تعبانه اوى 

_ سلامتها ألف سلامة

_معلش ..ينفع تطلع تشوفها

_ آه طبعاً ..إتفضلى ..اتفضلى 

تصيح هاجر من الداخل

_ مين يا آدم؟

آدم : دى ..مروة جارتنا هطلع معاها أشوف مامتها..ثوانى بس يامروة أجيب السماعة وجهاز الضغط

تخرج هاجر وفى يدها ملعقة

_ استنى ..هاجى معاك

آدم : خليكى إنتى ياحبيبتى جهزيلنا العشا

مروة : آسفه يادكتور أنا عارفه ان الوقت مش مناسب 

هاجر : يعنى مكنش ينفع تستنى لبعد العشا

آدم يهمس : عيب ياهاجر 

ويصعد الثلاثة 

وبعد نصف ساعة

هاجر تصيح : عاوزة إيه البت المسهوكة دى منك ياسي آدم 

آدم : وطى صوتك الجيران يسمعوا.يعنى هتعوز منى إيه بس ..وآديكى شوفتى أمها تعبانه ازاى 

_ ولاتعبانه ولاعندها أى حاجة دول بيستهبلوا عشان تطلع عندهم بس

_ معندهاش حاجة ازاى ..دى عندها غيبوبة سكر

_ أديك قولت يعنى مفيهاش حاجة بحقنة أنسولين تتحل المشكلة 

_ طاب مابنتها مابتعرفش تدى حقن 

_ كدابة اومال كانت بتعالج أمها ازاى قبل مانسكن هنا .احنا بقالنا ٣ شهور بس ساكنين العمارة .أقطع دراعى من هنا لو مكانتش حاطه عينها عليك 

_ بقولك ايه ..أنا مش فايقلك وتعبان وجعان وعاوز أرتاح .روحى بقي إعمليلنا الأكل

_ ماشي ..براحتك يا آدم 

وبعد دقائق 

_ يا آدم..آدم

إيه ياهاجر فيه إيه؟ 

_ الأنبوبة خلصت.إنزل هاتلنا واحدة غيرها

_ إنتى عارفة الساعة كام دلوقت..الساعة اتنين بعد نص الليل ياهانم 

_ خلاص هاتلنا ديليفرى 

_ منين ياست هانم.انا اشتغلت بحاجة النهاردة

_ خلاص هعملك سندوتش جبنه 

_ لا وعلى إيه ..هنام خفيف أحسن

_ طيب براحتك بقي..تصبح على خير

آدم يهمس : قال ويقولك إتجوز عشان تلاقى واحدة تدلعك وتعملك أكل وشرب ييجوا يتفرجوا

_ بتقول حاجة ياروحى ؟

_ لامفيش ياحبيبتى وانتى من أهله 

وفجأة تصرخ 

_ آاااادم..يا آدم

_ فيه إيه؟ إيه اللى حصل 

_ إيه الفلوس اللى فى جيبك دى..أومال بتقول مفيش فلوس ليه؟!

_ إنتى بتقلبينى ياهاجر ؟

_ متغيرش الموضوع 

_ دى فلوس إستلفتها من حازم حتى إسألى أختك هى اللى جبتهالى منه عشان ادفع قسط الجهاز اللى جبته للعيادة

_وأنا ايش عرفنى مش يمكن متفقين مع بعض ..آه ما انتوا اصحاب من زمان وبتداروا على بعض 

_ ييييه..أنا ماشي وسيبهالك خالص

_ رايح فين؟ رد عليا ..يا آدم

_ هروح أتعشي وأبات عند أمى عشان ترتاحى إنتى وأهلك 

_ إنت بتجيب سيرة أهلى يا آدم.طاب والله لأقول ل بابا ..يا آدم رد عليا..ماشي يا آدم ..إيه ده.دا نِسي الفلوس..الحمد لله..أتصل اجيب عشا

***يتبع**