بابا حبيبي
سريرك دافي زي ما هو
و ريحتك ماليه البيت
لسه الفرحة في صورك هايمة
لسه الطيبة في عينك نايمة
و صوتك بينادي علي
و الدمع محبوس في عنيه
و قلبي موجوع علشانك
والعقل بيصرخ .. وبيرفض
إنك ماأنتش في مكانك
المصحف زي ما هو
زي ما سبته في مكانه
ونضارتك والمفاتيح
وهدومك ريحتك فيها
والسبحة اللي بتذكر بيها
في العشا والتراويح
الصبر يا بابا مرار
زي العلقم وأشد
وفي بعدك قلبي في نار
وفي الدنيا مالياش حد
أنت الضهر اللي بيسند
أنت الباب اللي بيحمي
أنت اليد اللي بتمسح
الدمع في ضحك وجد
يا ريتني كنت فداك
أو أقولك
يا ريتني كنت معاك
وحياتي يا بابا ادعيلي
أنا أسفة ......
حتي دعاك لي
ما بقاش في الإمكان
لكن في قلبي حتفضل
جوايا في كل مكان
مش ممكن أبدا حنسى
و قلبي في يوم يقسى
وحادعيلك دايما دايما
بالرحمة وبالغفران
رانيا ثروت
2
-2
