بما اننا في يوم الخميس الونيس ويك اند وكده ..حابة اشرحلكم باختصار وبشكل بسيط بعيد عن الهري الخزعبلي بتاع جروبات الفيس بوك معني مصلح "الصحوة الروحية " اللي انتشر السنين اللي فاتوا

الصحوة الروحية هي درجة متقدمة جدا من الوعي الروحي والنفسي وعادة بتكون بعد تجربة مميتة ..مميتة فعليا "مش مجرد ان ذكر الجربوع اللي بتحبيه خانك مع انثي حشرة اليعسوب" الم بيفقدك الاحساس بأي شئ بحياتك وممكن يستمر لسنين وكأن لمبة في حياتك بتطفي واحدة ورا التانية ..شغلك ..صحتك..حبايبك ..اصحابك..فلوسك...علاقاتك..كله بيطفي ومهما عملت مش قادر ترجعه تاني 

والحقيقة دي نوع من التجارب اللي مش كل الناس بتدخلها ومش كل اللي بيدخلها بينتهي بيه الامر بصحوة لاء فيه بيسقطوا من التجربة وبيكملوا نوم عادي

الصحوة هي نوع من الولادة الجديدة لروحك نسخة قديمة منك بتموت وتنتهي وتدفن وتظهر نسخة تانية باهداف واحلام وصفات تانية وناس كتير بتيجي معاها بتغيير في كل حياتها سواء شغلها او علاقتها وسكنها كأن في شخص جديد بيبدا حياة جديدة تماما

طبعا ده ملوش عمر معين والكون نفسه بيمر بفترات صحوة ع مدي فترات طويلة وحاليا احنا في دورة منهم واغلب اللي بيمروا بالصحوة حاليا من مواليد اوائل التمنينات واواخر السبعينات وزي ماقلتلكم هي تجربة روحية مش الكل بيدخلها ده اختبار لناس معينة وبرضه الناس المعينة دي اللي بينجح منهم قليل اوي وكل مرحلة في مرحلة بعدها ووارد تقع في اي مرحلة منهم