#القمر في #القوس هو انسب وقت تبدأ تتعلم فيه لغة جديدة او تاخد كورسات من اي نوع ..قمر فضولي ومتفائل ونشيط وبيحب التواصل بعد يومين قمر #العقرب الغلسيين

#القمر في #القوس بيخلي عندنا رغبة اكتر في التواصل وتحديدا مع الناس البعاد عننا..بيزيد فيه التواصل بينا وبين اصحابنا اللي في دول تانية .بنميل اكتر للبحث و القراية  تحديدا في العلوم الغريبة والروحانية او الانسانية...ناس كتير هتفكر في #السفر خلال اليومن دول ويبتدوا يحطوا خطط للعيد..

#قمر_القوس روحاني جدا  وبزود رغبتنا في العبادات والدعا والتقرب لربنا 

ناس كتير بئالها حوالي 4 ايام مش بتنام كويس وجو كوابيس ولخبطة وتقوم من النوم مخنوقة ومتضايقة وده كان بسبب طاقة اكتمال القمر اللي بتستمر 3 ايام وكمان  #ليليث عامل تربيع مع #نبتون  #كوكب الاحلام وليلة غامقة سعادتك معلش

الزاوية الفلكية دي بتزود حالة الوهم والخداع والتهيؤات شوية واحذروا جدا الكدابين والنصابين الفترة دي 

 

ع الرغم ان النص التاني من الشهر الهجري هو انسب وقت للعمليات الجراحية وحل مشاكل الاسنان بس #القمر النهاردة تربيع #المريخ فمينصحش بده النهاردة 

رغم ان #الطاقة النهاردة افضل بكتير من اليومين اللي فاتوا لكن تربيع القمر مع المريخ زاوية تقيلة والنهاردة #التلات بيحكمه #المريخ بس برضه المريخ قاعد مربع ايديه شوية في #الحوت وده محجم غلاسته شوية ..بس نخلي بالنا النهاردة من عصبيتنا الزايدة ونتجنب اي نشاط جسدي زايد ..نتجنب المشاكل مع الرجالة علشان خلقهم ضيق زيادة النهاردة ..هيكون في تقلب مزاجي واضح مابين عصبية زايدة و بعدين نقلب حملان وديعة ونفتكر اننا صايمين 

الذكور من #برج_الحمل ممكن تكونوا حاسين الفترة دي انكم مش في كامل طاقتكم وقلقانين ع نفسكم شوية لاء اطمنوا انتوا كويسيين بس المريخ في الحوت هاددكم شوية

#كايرون اللي انا بسميه "دكتور الكواكب" عامل زاوية حلوة مع #القمر تشافي نفسي وروحي للناس اللي اشتغلت ع نفسها اليومين اللي فاتوا  تحديدا من عقد الطفولة ومشاكلهم مع اهلهم..

فرصة مناسبة النهاردة انك تفك تعلقك باي علاقة مؤذية مش عارفة تنساها هيكون عندك الطاقة والقوة النهاردة ترمي ورا ضهرك

 

احذروا تخيلاتكم السلبية والسيناريوهات الضلمة اللي بترسموها في دماغكم  طاقة #الجذب عالية جدا استغلوها واتخيلوا ان احلامكم بتتحقق وادعوا كتير الشهر ده كله فرصة غير عادية لتغيير حياتكم مش هتتكرر كتير وناس كتير لما هيخلص ابريل هيعرفوا انه بداية تغيير كبير في حياتهم

 

خلوا بالكم ع صحتكم الفترة دي ومتستهروش بأي عارض مرضي مفاجئ

الناس اللي عندها عرق النسا او مشاكل في العمود الفقري ممكن تتقلب عليكم اليومن دول شوية..

#الشمس بتقضي اخر ساعتها في #برج_الحمل وهتدخل بكرة #برج_الثور وهتقعد هناك شهر كامل  وده هنتكلم ع  تاثيره علينا  لنشرة بكرة ان شاء الله

 

وكالعادة يمين عظيم تلاتة دي طاقة عامة بتأثر ع الكل بشكل متفاوت ايا كان برج سيادتك

#نشرة_اخبار_الكواكب