البنك الزراعي المصري

❤️ ❤️

اللي هو كان اسمه بنك التنمية والائتمان الزراعي.. بابا عاش عمره كله بيشتغل فيه

لف فروع كتيرة فيه تبع محافظة الجيزة كمحاسب ومدير حسابات ولحد أعلى الدرجات الوظيفية

ياما شوفت له مواقف بيرفض فيها هدايا من ناس وياما شوفته راجع متأخر قوي قوي عشان كان لازم يخلص شغله مهما اتأخر بعد مواعيد العمل الرسمية

بابا اشتغل في بنك التنمية والائتمان الزراعي وفيه فقد عين من عينيه في شغل الحسابات وتدقيق النظر والمراجعة قبل ما يكون فيه كمبيوترات ولا نت.. كانت بس الآلة الحاسبة كاسيو هي اللي بيستعين بيها في الشغل.. في البنك دا عرف خالي سمير ومن صداقته معاه دخل بيتهم وشاف والدتي الله يرحمها واتجوزوا.. البنك الزراعي المصري  كل ما بعدي على فرع له باحس إن ليا فيه مكان وإن كل الموظفين اللي جواه يعرفوا بابا واشتغلوا معاه.. بابا فضل علي صداقته بزمايل الشغل لحد آخر زيارة وآخر معاش قدر يروح يقبضه وهو واقف على رجليه.. معاش فبراير ٢٠٠٨ وبعدها تعب يا حبيبي قوي وبعدين توفي بعدها بسنة و٣شهور.. آخر مايو ٢٠٠٩.. ولحد النهاردة صوره مع زمايل الشغل موجودة بشوفها وبشوف قد إيه كان إنسان جميل الشكل والعقل والنفس.. كان عفيف وقنوع ودقيق وصادق.. وكان قمر كمان زي نجوم السيما

بابا حقيقي كان إنسان عظيم. ❤️❤️

 

#بنت_جلال