بوستات "كيف تكسب ديشيليون دولار بسرعه وبدون مجهود" عن طريق العمل كفرى لانسر أو designer لشىء ما أو بشويه انجليزي أو فرنساوي دى غير أنها مضحكه ..هى مضلله جدا جدا كمان..متدخلش غير على مراهقين لسه متخيلين أن كل الكبار دول لا يعرفون كيف يجرى العالم..لكن هو الوحيد الذي رآه وهو يجرى..من هنا هوه..

معلش من الكبار اللى الدنيا اخدتهم قياسه رايح جاي حأقولك شويه نصايح:

١) وانا بأتعلم السواقه عم منصور اللى علمنى الله يمسيه بالخير ..قالى لما تلاقى طريق واقف و فى حارة فاضيه اوعى تدخليها..عشان اكيد لو هى سالكه وسهلة كان كل الناس دى عدت منها وخلصنا.. ينطبق ذلك أيضا على وسائل كسب الرزق ..ما لو سهل وسالك أوى..باقى الناس بتعافر ليه! بيحبوا المعاناة ويعشقوا ضيق التنفس؟ ما هو أكيد فيها إن..يا سده شديدة قدام .يا حفرة في النص..يا عايزه عربيه بمواصفات خاصة..

٢) الشغل اللى بيجيب فلوس فعلا بمهجود يظهر قدامك قليل ...هو مش وليد اللحظة..دا بيبقى نتيجة مجهود و خبرات وتدريب طويل وقاسى ...بنى مهارة نادرة و خبرة كبيرة خلت وظيفة تظهر صغيرة و سريعه بينما هى لها عمق من المجهود اتراكم على مدى سنين..تكسب صاحبها مكسب كبير ..هو مش بيقبض عشان التاسك دى..هو بيقبض تمن مجهوده سنين كتير قبلها... وموهبة قد تكون موجودة كمان بتعليه عن الباقين.

٣) مفيش فلوس كتير وسهلة بتيجى من سكة دوغرى...موردتش...احنا نازلين الأرض نشقى .عشان نعيش..دا واقع...مما كتب على ساق العرش..أن لا راحة فى الدنيا..بس ربنا بيجازى على أد التعب وأكتر .. فلوس من غير تعب ضد ضد ناموس الكون..أو ضد أخلاقه...فيها خازوق أكيد...

٤) اتعلم دلوقتى و تقل نفسك و زود مهاراتك..عشان لو اتزنقت تلاقى اللى تركن عليه..و تبقى خاضع لقوانين الندرة ..عندك مهارة مش عند حد بيتدفع فيها فلوس...

يا حبايبى من التيين ايجرز و اكبر.. مفيش حاجه بتيجى بالساهل..حتى البلوجرز..الاكاونت لو وقع حيضيع..