هو حناني عليك قساك حتى عليا

ولا رضايا كمان خلاك تلعب بيا

بعد تعاون أم كلثوم مع الموسيقار محمد الموجي في أغنية "للصبر حدود"... وبالرغم من النجاح العظيم اللي حققته للصبر حدود إلا أن كواليس هذا التعاون مفزعة زي مثلا أن أم كلثوم قاضت الموجي عشان اتأخر عليها في اللحن.. والموجي مبرره كان أن هرم كبير زي أم كلثوم ميصحش يسمعها أي لحن.. ده غير اعتراض أم كلثوم وتعديلاتها على اللحن اللي مكانتش بتنتهي.. المهم أنه في الآخر وأخيراً الحمد لله " للصبر حدود".. خرجت للنور.. وكسرت الدنيا.. بس للأسف أم كلثوم كانت قررت أنها مش عايزة تتعاون تاني مع الموجي.. لأنه تعبها في تمسكه بجمله الموسيقية "قال ايه مش عايز يغير في اللحن????" .. وكمان اتأخر عليها.. 

على الصعيد الآخر بقى بعد للصبر حدود.. الموجي قالك خلاص بقى هخرج من عباية عبد الحليم واروح للهرم العظيم ده أم كلثوم.. ف راح للشاعر مجدي نجيب خد منه كلمات ولحنها وراح بيها لأم كلثوم " اللي كانت مقررة متتعاملش مع الموجي تاني" .. ف تعمل ايه أم كلثوم.. تغير في الكلمات بتاعت مجدي نجيب كل شويه.. النص الأصلي كان بيقول..

أهلا بالحب.. ومواعيده

...أهلا بحنانه وتنهيده

رقصت دنيانا معانا

وارتعشت أحلامى فى إيده

فجأة ضحكنا وقلنا

هو ده معقول ده الحب مابيجيش ولا بيعيش

إلا لو دق القلب وسمعنا سوا سوا آهة تنهيده..

المهم فضلت أم كلثوم تطلب من مجدي نجيب تغيير الكلمات وكل مرة الموجي يستسمح مجدي نجيب أنه يوافق.. ويغير مجدي.. لحد م زهق على الآخر وقاله نصاً " يا عم موجي أنا مش عايز أم كلثوم تغنيلي".. واعتقد أن مجدي نجيب الشخص الوحيد في الكون اللي رفض التعاون بينه وبين الست.. يمكن لأنه لاحظ أنها بتزهق الموجي مش أكتر وطبعا هو جاي من طرف الموجي فقالت ازهقهم هما الاتنين.. وخلاص الموجي صرف نظر.. وعمل شوية الحان لعبد الحليم وغيره ونسي الموضوع.. وبعدها بفترة كده.. الشاعر الكبير عبد الوهاب محمد بعتله كلمات إسأل روحك.. راح الموجي عامل استفتاء في الصحافة يعني نزل الكلمات في كذا جرنال وسأل الجمهور تفتكروا لما الحن الكلمات دي تليق على مين يغنيها؟! "زي استفتاء وشوشه كده????".. الأغلبية كان رأيهم أم كلثوم.. يادي النيلا الراجل خلاص كان قفل الباب ونسي اللي حصل.. المهم أنه بناء على رأي الجماهير الموجي لحن الأغنية وخدها كلام ولحن وراح بيها لأم كلثوم.. سمعت الغنوة كلها منطقتش.. 

انبهرت باللحن بتاع الموجي.. وكلمات عبد الوهاب محمد.. بس اعترضت على حتة يعني صغيرة قوي.. كوبليه كان بيقول..

آه لو كل الناس بيحبوا.. زي ما قلبى عاش بيحبك / فوق أحاسيس وشعور الناس.. كانت الدنيا بقيت حاجة تانية / كان الناس بقوا زي ملايكة من الإحساس.. وأنا على الحب وبس بعيش / بعدى كمان مبيبعدنيش.. والحرمان ما بيشغلنيش / واللي بيعرف قلبه الحب.. ما بيسألش في بعد وقرب / بس كفاية عنده يحب، وأنا حبيتك.. أنا حبيتك للحب لوحده اللي لا قبله غرام ولا بعده / غدرك بيا أثر فيا.

قالت إنه شبابي قوي ويليق على عبد الحليم مش بتاعي خالص وحتى اللحن كان شبه الحان الموجي لحليم.. وقالت للموجي " يا موجي اصرف الملايكة".. تقصد ملايكة حليم طبعا.. المهم أن الموجي حذفه بس استفاد بالآهات اللي كانت في الكوبليه واستخدمها في أغنية " يامالكاً قلبي".. ونجحت أسأل روحك نجاح محصلش.. وبعد الحفل أهدت أم كلثوم للموجي خاتم بلاتيني ظل يرتديه لآخر يوم في عمره.. ومش عارفة الحقيقة ايه حبها في أنها تهديلهم خواتم ميقلعوهاش غير ع الموت.. عملتها قبل كده مع رامي وقبله القصبجي.. المهم أن أسأل روحك مش بس الموجي اللي عمل عظمة تعيش العمر كله في اللحن.. وكمان عبد الوهاب محمد كتب كلمة يغنيها كل جيل.. وميختلفش عليها أبداً.. 

في ناس كتير لما بتحن فيهم وتبقى لطيف بزيادة معاهم بتعلمهم القسوة عليك.. ولما بيلاقوك راضي وقانع طول الوقت بيستهبلوك وبيدوسو عليك وبيتعاملوا معاك على أنك أهبل وعبيط.. 

مع أنه حصل معايا كل كلمة بتتقال في الأغنية بس معنديش تفسير ليه الناس بتعمل كده؟!.. حصل معايا من أقرب وأعز الناس ليا.. ناس مدياهم روحي ومعتذرة عن قيمة العطاء.. كنت بشوف أن روحي قليلة عليهم.. بس داسوا عليا.. المهم أن الأغنية عظيمة بكل المقاييس.. وكلامها ولحنها هيعيشوا معانا لحد آخر الدنيا.. الغنوة في أول كومنت..

ملحوظة.. على رأي عبد الوهاب محمد.. الغدر والخيانة والقسوة بيعلمونا القسوة برضو والعند وبنتغير وبنطوي حنينا وبنعرف نبعد ونعيش مبسوطين..