زمان كان الناس بتوع الطبقة الوسطى سهل تحوش وتنبسط وتلبس كويس وتاكل كويس وتتفسح، وممكن كمان تسيب لولادها قرشين للزمن 

دلوقت لازم تختار يا تحوش يا تعيش، ده لو عرفت تعيش أصلا .!

ورأيي 

تختار نفسك، تعيش وتعيش حبايبك، تعتبر الخروجات والاكلة الحلوة والقعدة الحلوة والناس الحلوة واللبس الحلو (اللي في مقدرتك) علاج، علاج ليك وليهم.

خرجي احلى اطقم من النيش وحطيها لولادك عوديهم ياكلوا في احلى سرفيس ولو لقمة ناشفة، هما أولى من الغريب، ربوهم زي ما اتربيتوا على العز الحقيقي، عز المحبة والذوق والشياكة مش عز الفلوس مع قلة الأدب والهمجية. 

انت بتعالج نفسك وولادك بالمتع البسيطة دي

اعتبرها طبطبة على نفسك، بدل العلاج النفسي، الفلوس بتفقد قيمتها لو متمتعناش بيها، لو اتحطت ف البنك بتبقى مجرد ورق بلا قيمة، قيمتها الحقيقية ف قدرتها على إسعادنا،

مش لازم تسيب لولادك بيت ولا غيط طالما مش قادر، ومتعذبش نفسك عشان مش قادر، ما يمكن ده صحي اكتر ليهم، 

بالنسبة لي مفيش حاجة ساعدتني على تخطي أي ازمة، إلا أني عشت طفولة سعيدة، سعيدة جدا مليانة حب ودلع وخروجات، طلعت شبعانة حب، عيني مليانة، بحب الناس، طلباتي بسيطة لأني شبعانة، راضية جدا بسبب الحب اللي شوفته فعيون بابا وماما واخواتي.

سيب لولادك حب يعيش، سيب لهم ذكريات حلوة، الذكريات الحلوة هي حائط الصد الأول ضد الأمراض النفسية وضد الاكتئاب والاحباط، 

لازم تصنع لولادك تاريخ جميل،

 مش مهم تسيب لهم ورث ممكن جدا ينهشوا ف بعض بسببه، سيب لهم الحب، الونس، البيت الدافي، 

علمهم كويس واستثمر فيهم، طلعهم شبعانين حب ودلع ونزاهة اد ما تقدر، مش مهم تسيب فلوس، سيبهم عينيهم مليانة، سيبهم ولاد ناس،

سيب لهم إنسانيتهم.

بونجور يا حلوين