استكمال الوقفه التاريخيه المهمه....

موضوع عم مصطفى كبابجي النادي...(كما حكاها لي شخصيا) 

في احد الايام التي كان مقررا فيها أقامه سهره خاصه للمشير عامر اصيب كبابجي النادي الأصلي في حادث سياره وهو في طريقه للنادي ونقل الي المستشفى فهب رجال صلاح نصر وذهبوا الي محل ومطعم الفي بك الشهير أيامها لاستعاره كبابجي من عماله ولم يكن يتواجد سوي كبابجي المطعم ومساعده الشاب مصطفى والذي كان عمره أيامها ١٨ سنه فأخذوه معهم ومعه كل اللحوم وهي على أسياخ الشوي وعادوا به للنادي واقيمت السهره في ميعادها وبعد الانتهاء من العشاء طلب المشير عامر ان يرى من صنع هذا العشاء بعدما ابلغوه بما حدث من أصابه كبابجي النادي الأصلي في حادث سياره فحضر الشاب مصطفى ووقف أمام المشير عامر وركبته تصطكان من الرعب والخوف ودارت هذه المحادثه بينهما....

المشير: انت اللي عملت العشا ده

مصطفى : ايوه يافندم هو فيه حاجه لامواخذه

المشير: برافو عليك الاكل كان ممتاز

مصطفى : الف هنا وشفا علي سيادتك يافندم

المشير: اخرج من جيبه ٢٠ جنيه واعطاهم لمصطفى مكافأه له ثم قال له انت بتاخد مرتب كام في المحل اللي بتشتغل فيه

مصطفى : باخد ٦ جنيه شهريا يافندم

المشير : ايه رأيك اعينك في النادي بمرتب ١٢ جنيه شهريا يزدادو ربع القيمه كل ٣ سنوات

مصطفى : ربنا يخليك لينا يافندم طبعا موافق

المشير: طيب خلاص انت اتعينت من دلوقتي.... ثم التفت الي احد مساعديه وطلب منه إحضار ورقه بيضاء وحضرت الورقه وكتب امر التعين بخط يده لهذا المحظوظ بمرتب ١٢ جنيه شهريا على أن يزدادو بقيمه ربع الأجر لآخر مرتب وصل اليه وهذه الورقه كانت محفوظه بداخل ملف عم مصطفى الكبابجي وقرأتها بنفسي وعليها بصمات أصابع المشير من الدهون المتخلفه عن طعامه حيث كان يهوي الاكل بيديه...

ملحوظه بداخل الوقفه:

عندما توليت قياده النادي كان مرتب عم مصطفى الكبابجي قد وصل إلى ١٨٠٠ جنيه شهريا بالحوافز بينما كان مرتبي وانا عميد بأقدميه اربعه سنوات كله على بعضه هو ٨٣٠ جنيه.....

           (انتهت الوقفه)

في الساعه الثالثه من بعد ظهر يوم الجمعه بدأ وصول سيدات السكرتاريه العسكريه وكان اول وصول هو ماجده الثانيه ومعها زوجها واستقبلتهم في مكتبي ولاحظت العلاقه المتوفره بينهما والتي حاولا اخفائها ولكن العيون فضاحه ثم وصلت زينب ومعها بنتها ولم يحضر زوجها وعندما سألتها عن سبب عدم حضوره تلعثمت قليلا ثم ردت بأن لديه عمل بالإسكندرية وسافر منذ امس وفوضني على الموافقه على اي موضوع سوف تطرحه فهمست في اذنها وانتي سبتيه يروح لها (زوجته الأولى) فضحكت ولم ترد....

ثم وصلت ماجده العملاقه ومعها زوجها الذي دخل من باب المكتب قبلها فوجدته رجلا نحيفا جدا وطوله يصل إلى فوق وسطها بقليل فأبتسمت ولكني بسرعه ادمجت هذه الابتسامه مع ابتسامه الترحيب وقفز الي ذهني لحظتها رسام الكاريكاتير في فتره الأربعينات والخمسينات من القرن الماضي.. صاروخان والذي اخترع شخصيه رفيعه هانم والسبع أفندي وزياده في السخريه رسم رفيعه هانم هذه على هيئه سيده بدينه جدا وزوجها السبع أفندي على هيئه رجل قصير ونحيف جدا ويرتدي فانله بحمالات وبنطلون بيجامه مخططه ويرتدي فوق عيناه نظاره نظر سميكه جدا ????????

وهنا فقز عتريس من فوق كتفي الي الأرض ووقف أمامي متحديا ودار هذا الحوار..... :

عتريس: شايف السبع ده

انا:سبع ايه ... هو فين ده

عتريس:يااعمي قدامك اهو... جوز الست ماجده 

انا: سبع ايه ياحيوان ده الواحد يشيله بأيد واحده

عتريس: جتك نيله في مخك الزنخ ده. الراجل ده سبع اصلي مش كرتون زيك علشان قدر على السيطره على جسم الست ماجده وجاب منها عيال كمان

انا: ماانا سبع برضه

عتريس: والنبي ايه ده انت ماحصلتش صرصار جنبه

انا :بلاش قله ادب ياعتريس وخليك حلو معايا

عتريس: فالح بس تستقوي على الست مراتك الضعيفه وصاحبه مرض والغلبانه وتقف قدامها الصبح كل يوم قبل ماتنزل الشغل وتقعد تلعب لها عضلاتك زي بتوع كمال الاجسام والغلبانه قاعده قدامك مستغربه من جنانك ده وعماله تقول ربنا يهديك

انا: ياحيوان بلاش نتكلم في الأسرار دي

عتريس: أسرار ايه هو انت لسه شوفت مني حاجه ده انا هافضحك فضيحه المطاهر في المولد..... الراجل ده هو السبع الاصلي

انا: بلاش فضايح ياعتريس ياخويا واسكت

عتريس: مش هاسكت الا لما تقول انك صرصار

انا: ماشي ياعتريس الكلب انا صرصار خلينا نشتغل بقي

عتريس: ايوه كده اخشع

ثم دخل بعدهم قطيع الافيال....!!!! أولادهم الابن الأكبر ١٢ سنه فيل بحجم Medium والوسط ١٠ سنوات فيل بحجم Small ثم الابنه ٨ سنوات عباره عن مشروع فيله صغيره.....

    انتظروني لجلسه الطبطبه

المجد لجيش مصر.... وتحيا مصر الوطن...