..شباك قديم
شباك قديم طالل منه ريحة بيوتنا
واقفة هناك أحلامنا لساها
مستنية نرجع تاني ونتلم
ونعيش احنا وهي في عش صغير
يساعنا كلنا انا وهى وجيرانا
وعيال صغيرة بتلعب في الحارة
وناس طيبة وصوت بياع بينادي
حمره ياأوطة , يامعسلة اوي يابطاطا
وعمو البقال ينادي علينا ويدينا ملبس!!
..شباك قديم
كانت منه أول نظرة حب
لطفلة صغيرة خدودها حمرة
يمكن من الكسوف!!
..شباك قديم
مشتاق للحب الأولاني
مشتاق لايام الشقاوة
مشتاق لكرة تتحدف فيه
من رجل زيزو الحريف
كابتن الشارع!!
..شباك قديم
لساته مفتوح
يمكن مجروح
محتاج لشوية حنية تطبطب عليه !!!