المفروض انك مشيت يا بابا وان البيت ضلم من بعدك وانك خدت روحي معاك وانته ماشي وكسرت خاطري وقلبي وانك وحشتني والله بس انا رغم كل ده حاسة انك لسه معانا لسه ريحتك في الاوضة لسه صوتك بسمعه وانا نايمة واصحى اتاكد انته هنا ولا لا لسه بدخل الاوضة اطمن انك بتتنفس والاقيك مش فيها لسه ايدي فاكرة ملمس شعرك وجلدك يا بابا
لسه كل تفصيلة في ملامحك قدام عيني ايدي مش ناسية احساس وانا بطبطب عليك لو اتوجعت لسه فاكرة وانا ببوس جبينك لاخر مرة شايفة ايدي وانا بقولك مع السلامة يا بابا دايما سامعة صوت الشيخ وهو بيخطب قبل الصلاة عن مرضك وقد ايه انته اتحملت لسه مستنياك تيجي واحكيلك على كل الي حصل وانته تعبان وبعد ما مشيت واجعني اوي انك مش هتحكيلي كنت سامعني وانا بنادي عليك طول الشهر الي نمت فيه كنت موجوع طيب شفت مين في غيبوبتك يا بابا كل شوية يوحشني تنادي عليا فاسمعك بتقول يا صوفا ابوكي تعبان يا بنتي بس انا دلوقت الي تعبانة يا بابا انا الي بموت انته ارتحت وانا الي تعبت والله طول حياتي حاسة انك هتسبني ومن يوم ما تعبت وانا حياتي واقفة مش عارفة اعيش خايفة من غيابك ومش عارفة دلوقت ممكن اعيش او لا بس انا عارفة انك خدت الحلو كله معاك مش هينفع نكمل كده انته صاحبي انته الي فاهمني انته الي بتحبني انته الي بتهتم وتسأل انته حبيب ولادي تمشي ازاي بس تيتمني انا وولادي ازاي يا بابا احنا كان بينا كتير بينا مكالمات طول اليوم بينا ضحك وانا معاك في العربية بينا اسرارنا مين هيسد فراغ وجودك ده انته غبت ايام وحاسة اني لوحدي طيب هعمل اي في كل السنين دي هشتكي لمين لو زعلت وانته عارف الدنيا كارهاني ودايما تزعلني وانته الي بتراضي
احنا اصلا متفقناش على كده متفقناش تموت قدام عيني واشوف اخر نفس ليك بس انا برضه عارفة انك لسه معانا انته اكيد معانا لانك لو مش معانا انا هتجنن الدنيا مينفعش تتعاش من غيرك فانا هعيش على انك عايش هعمل معاك حياة بتاعتنا احنا
الدنيا وحشة والله بس الحلو الوحيد انك طمنت قلبي عليك قابلت ربنا يوم عرفة وكل الناس بتحكي في سيرتك الطيبة وتشهد
ليك الناس كلها بتحبك مع السلامة يا طيب يا ابو ضحكة حلوة
2
-2
