حرفيا أنا فعلا كنت بموت، برغم اني مكنش في حاجة بتوجعني غير الصداع اللي انا وهو بقينا صحاب واتعودنا ع بعض لا هو عاوز يسيبني ولا انا عدت بحاول معاه، لكن كنت حاسس بوجع من نوع مختلف وجع أصعب بمراحل من وجع الجسد، وهو وجع النفس حقيقي كنت وصلت لمرحلة إن خلاص مبقتش عاوز أعيش وحاولت ان انتحر اكتر مرة، وفشلت.

لحد ما قابلتها لقتها حد مختلف، مختلفة حقيقي عن كل اللي عرفتهم ناضجة جدا مع انها تبان طفلة جدا، عاقلة جدا مع انها تبان قمة في الجنون، لقتني بتكلم معاها براحتي في حاجات كتير كنت بخاف اتكلم فيها مع حد حتى مع نفسي.

كنت أوقات بحسها أمي وكتير كنت بحسها بنتي اللي مسؤولة مني وأحيانا صديقتي اللي بلجأ لها وقت خنقتي، لكن الأكيد إنها كانت شط النجاة اللي رسيت عليه بعد توهة في بحر لم أكن أعلم كيف عمقه إلا أنني كدت أن أغرق فيه، كدت أن أموت ، إلا أن أتت هي لتعود بي من الموت.