الحكاية بدأت لما نقلنا من شقتنا لشقة تانية ،بعد ما جوزي اتنقل من شغله وكانت شقتنا القديمة بعيدة جدا عن مكان شغله الجديد يعني حوالي ساعتين مواصلات فكان لازم طبعا ننقل معاه وده طبعا ترتب عليه نقل ولادي من مدارسهم والنادي يعني تقريبا كانوا بيبدأو حياة جديدة كل حاجة اتغيرت وده يمكن أثر فيهم وفي نفسيتهم واللي كنت فاكرة ان التغيير ده كان سبب في اللي بيحصل مع بنتي الصغيرة اسمها كارلا ، كارلا لما نقلنا للشقة الجديدة وبعد ما استقرينا وخلاص فرشنا وبدأنا نعيش حياتنا الطبيعية، كنا في إجازة الصيف دورت على نادي كويس وقدمت لهم معاذ بيلعب جودو وكارلا بتلعب جمباز، كارلا بنتي كانت بطبعها طفلة هادية بعكس اخوها معاذ خالص
طبعا الولد طبيعي انه يكون شقي اكتر من البنت، اللي حصل بقى اني لاحظت أن كارلا بدأ سلوكها يتغير بدأت تبقى عدوانية ادخل عليها اوضتها فجأة وهي قعدة لوحدها اسمع صوتها بتتكلم مع حد ادخل اسألها انتي بتكلمي مين ترد تقولي بكلم صحبتي اقولها فين صحبتك دي تقولي كانت هنا وتفضل تبص حواليها وتقولي كانت هنا ، في الأول قلت يمكن ده بسبب بعدها عن مدرستها وصحابها اللي كانت متعودة عليهم خصوصا انها كان لها صديقة مقربة من النادي اسمها ملك، ومرة علشان أخرجها من حالتها دي قولتلها ايه رأيك نكلم مامت ملك ونخرج سوا ردت قالتلي لا شيرين هتزعل مني قلتلها شيرين مين يا حبيبتي قالتلي شيرين صحبتي قلتلها دي صحبتك من النادي الجديد قالتلي لا دي صحبتي هنا قلتلها هنا فين يا كارلا تقصدي في العمارة انت بتخرجي امتى علشان تتعرفي على حد من العمارة لقتها فجأة اتغيرت وقالتلي لو سمحتي يا مامي عاوزة العب لوحدي خرجت وانا محتارة مين شيرين دي وايه اللي حصل لكارما من وقت ما نقلنا الشقة دي ، لما رجع عبدالله من الشغل (جوزي) حكيت له على اللي حصل ورد هو كمان نفس الرد ان ده اكيد بسبب انها سابت صحابها وحياتها فيمكن شيرين دي حد هي صنعته في خيالها وبتتكلم معاها وبتلعب معاها اقترحت على عبدالله نوديها لدكتور نفسي قالي بلاش نكبر الموضوع مجرد ما تتعود على حياتها الجديدة كل ده هيروح لوحده وقفلنا الموضوع، لكن الحكاية مخلصتش لحد كدة كارلا بدأت تتعامل مع اخوها بشكل عدواني رغم أنها كانت دايما بتعيط منه لكن الحال اتقلب كارلا بقت بتضرب اخوها بعنف وأوقات كتير بتوصل أنها تجرحه لدرجة أن معاذ بقى بيخاف يلعب معاها واكتر الأوقات قاعد لوحده في أوضته علشان ميلعبش معاها، كنت بشوف كل ده بيحصل وأحاول أهديها واقول هتاخد وقتها وتبقى تمام، جارتي اللي في الشقة اللي قصادي قابلتني على السلم واستأذنت مني تجي تبارك لي على الشقة ونتعرف على بعض وطبعا مكنش ينفع اكسفها وبالفعل جت وقعدت وشربنا القهوة وقدمت لها كيك وفي وسط كلامنا سألتها انتي تعرفي كل سكان العمارة قالتلي طبعا ليه هو فيه حد ضايقك قلتلها لا بس أنا عاوزة أسألك عن بنت صغيرة اسمها شيرين قالتلي محدش في العمارة بالإسم ده سألتها هما ساكنين في العمارة من امتى قالتلي احنا ساكنين من قبلكم بحوالي سنة وشهرين بس كمان قالتلي انها سمعت أن شقتنا دي كانت فاضية بقالها ٣ سنين ومفيش سكان طولوا فيها سألتها عن السبب قالتلي معرفش بس قالتلي أنهم من وقت ما سكنوا وهما من وقت للتاني كانوا بيسمعوا صوت غريب طالع من شقتنا، مشت هي وانا قعدت افكر في كلامها وبعدين حاولت انسي ، فات اسبوع وحالة كارلا بتزيد عدوانية مع اخوها وتكسير في البيت وبدأت تنطق بكلام غريب مفهوم احيانا واحيانا مش مفهوم، كل ده كان بيعدي لحد ما صحيت في يوم بالليل على صراخ معاذ وهو بينده ويقول الحقني يا بابا الحقيني يا ماما طلعت اجري على اوضة معاذ لقيته في سريره وكارلا فوقيه وماسكة سكينة المطبخ في اديها بتقول بصوت مش هو خالص صوت كارلا بنتي اقتليه اقتليه ، شديت معاذ من تحتها طلعته بره الأوضة واخدت السكينة من ايد كارلا رمتها في الأرض وحضنتها لحد ما هدت ورجعت لطبيعتها ، والغريب انها بعد كدة لما سألتها ليه عملتي كدة قالتلي انها معملتش حاجة وان شيرين هي اللي عملت كدة ، عبدالله نزل جري تحت عند البواب وسأله عن شيرين دي وايه حكايتها وهل فعلا في حد في العمارة بالإسم ده ولا ده كله في خيال كارلا بس ، لكن كانت المفاجأة أن حسين البواب قال لعبدالله ان فيه حد في العمارة فعلا اسمه شيرين لكن دي كانت بنت الناس اللي كانوا أصحاب الشقة بتاعتنا دي قبل كام سنة بس باعوها ، عبدالله سأل حسين البواب عن سر موضوع شيرين دي وليه مكنش حد بيطول في الشقة ويسيبها ويمشي ، اكتشفنا بعد كدة ان شيرين دي كانت طفلة في سن كارلا تقريبا وكان لها اخ اصغر منها وكان دايما بباها بيعنفها بسبب اخوها ويتهمها انها بتضربه وتأذيه وكل ما تنكر يضربها اكتر لحد ما حصل في مرة ومن كتر ضرب بابا شيرين فيها البنت متحملتش وماتت في اديه وبعد كدة بفترة باعوا الشقة وسابوا المنطقة خالص وعرفنا ان تقريبا روح شيرين لسة موجودة في الشقة وانها سبب كل اللي بيحصل مع كارلا من يوم ما سكنّا في الشقة وانها كانت بتنتقم فعلشان كدة كانت عاوزة تقتل معاذ اللي هي طبعا شايفة فيه صورة اخوها اللي كان السبب في موتها، حسين البواب اقترح على عبدالله يجيب شيخ يشوف كارلا ويشوف الشقة وقاله على حد في المنطقة كويس وفعلا عبدالله راح للشيخ ده وهو مترددش وجه معاه على طول وبعد ما دخل وشاف كارلا عرف فعلا أن فيه روح موجودة وهي اللي مسيطرة على كارلا وغالبا أو أكيد دي طبعا روح شيرين وبعد قراءة القرآن الكريم وحاجات كتير عملها الشيخ الحمدلله الروح دي خرجت من جسم كارلا ومن الشقة نهائي وعادت كارلا لطبيعتها وأول حاجة طبعا رجعت لها هي حب اخوها معاذ اللي جرت عليه وحضنته بس طبعا بعد كل دة مكنش هينفع ولا كنا هنقدر نكمل في الشقة برغم خلاص أن المشكلة اتحلت نقلنا في شقة تانية جديدة محدش سكنها قبل كدة اه اصلها خلاص بقت عقدة نفسية ومش هتتكرر.
تمت
سحر ابوالعلا
1
-1
