انفض جروحك كلها

حطها

تحت السما الواسعة

وإن كان في قلبك

لسة جرح بيختفي.. شيله

ارميه لآخر المدى

واوعاك تعيط عليه

إيه لازمة الأحزان

إن كان

في قلبك لسة

متسع للفرح

كل الجروح هاتدوب

وحده الحزين

بيموت في اليوم

لميت مرة

والحزن عمره ما ينتهي

طايح ف خلق الله

يرميه لقلبك

قبل الغريب.. القريب

فبتشيله..وبياخده حضنك

كعيل.. ضل من أهله

ليه تتركه يغرز ف روحك

وانت ف إيديك

ترميه.. لآخر المدى

ماتسيبش نبتة حزنك

جوه قلبك

تحت السما والشمس

إوعاها تتمدد

سرسب همومك كلها

وخللي الفرح يدخل لك

على مهله

***

مبقاش مهم

مين اللي بيمد لك

بالفرح إيده

وتحت باطه شايل لك

سكينة الأحزان

مبقاش مهم

مين اللي بإيديه

راح يرشقك

بسهم الألم والمواجع

طول عمر سهم الوجع

طالع وراجع

هتلاقي ياما ف سكتك أشجان

كل المهم إن قلبك

ينتفض بالحياة

يرمي بوسع الإيدين

 حزنه.. للفضا والريح

ما يبات ف ليلة

مستكين وجريح

وينتفض بالأمل

مهما الهموم حاصرته

يرفع بروحه للسما

ينزع جروحه المبهمة

ويعلا فوق كف الحياة

مخلوق كما خلقه الإله

إنسان