صديقتي قررت تفسخ خطوبة بنتها قبل شهور من الفرح وبعد ٣ سنين خطوبة.. البنت عارضت والدتها ووقفت في وشها مرة.. وحاولت تقنعها عشرات المرات.. بس مامتها كانت واضحة وحاسمة.. والأمر انتهى!
وفِي محاولة لتخفيف وطأة الحزن على نفسية بنتها وتشجيعها لإستعادة بهجتها وثقتها في نفسها بعتت لها رسالة وهي نايمة علشان أول ما تصحى تشوفها..
قالتلها كلام كتير ملخصه:
أن العلاقات أهل.. صحاب.. جواز.. لازمتها في الحياة إننا نطمن ونقدر نكون نسخة أحسن من نفسنا
فلما بنت شجاعة وذكية زيك تتعلم الخوف والتوتر من الراجل اللي هتشاركه حياتها،
لما يكسر خاطرك ويوعدك انه مَش هيكررها.. ويكررها تاني يوم.. ويوعدك وتسامحيه ويكررها لحد ما تفقدي الثقة فيه وفي نفسك
لما تعملي كل المجهود اللي بتعمليه دة علشان تحافظي على وجوده في حياتك وهو أول حاجة يعملها لما يزعل أنه يهددك بوجوده في حياتك
لما تحطيه قبل أهلك ويحطك بعد واحد صاحبه يعرفه من يومين
لما ماتشوفيش غير الجانب الجميل الوحيد اللي فيه وميشوفش كل الجمال اللي جواكِ ويفضل يفكرِك بعيوبك ويزرع جواكِ افكار سلبية عن نفسك..
لما كل ده يحصل يبقى لازم تحطي حد وتنهي العلاقة.. وتفتكري رحمة ربنا إن عندك الفرصة تعملي كدة بسهولة واحنا لسه عالبر..
ده شخص بيأذيكِ مَش بيحبك وانتِ شجاعة وتقدري تنجي بنفسك..
رغم أن البنت لسة حزينة ومش عارفة تقرر بس عملت حاجة جميلة جدًا.. نقلت كلام مامتها على ورقة بخط كبير وعلقتها في أوضتها.. وكتبت تحتها
"إنهاء العلاقات المؤذية هي شجاعة مِنح نهاية لمشهد حزين يستنزفنا.. إنهاء العلاقات المؤذية هو فعلًا نجاة!"
من أعظم النعم اللي ممكن تكون في حياة الانسان أنه يكون فيه حد عاقل وحكيم في حياته.. يثق فيه ويحس إن معاه كتالوج متنوع من خبرات الحياة.. حد يقدر يرجعله يستشيره وياخد برأيه وهو مطمن.. يسمع كلامه لما ينصحه.. ويبقى متأكد إنه مهما اتخبط أو اتلخبط فهو مع ذلك في طريق آمن!
دمتم بخير..
من منصة تاميكوم
1
-1
