بعد كام أسبوع أو كام شهر من الجواز بتصحي من النوم تلاقي اللي نايم جنبك بقى شخص عادي، رجل نايم في منتهى الارتياحية، واحتمال كبير يكون بيشخر، صوته عامل زي قطار سكة حديد، بيصحى منكوش، ذقنه طويلة، بيجامته مكرمشة، عينيه منفخة وبيفتح جفونه التقيلة بالعافية، رجل عااااااادي، راح الانبهار، واتبخر التجمل، وأنتِ كمان بقيتي بالنسبة له ست عادية، تصحى منكوشة مثلا او مركبة في شعرها بكرات اسطوانية أو قالبة شعرها طاقية، ضاربة بيجامة أو ترننج، الكحل سايح ومهبب عينيها، عينيها مقفلة وشيفاك بالعافية برضه، التواليت بح على الاخر، زيرو انبهاااار يا جماعة، ومع أول خناقة بيقع آخر بواقي التجميل والتجمُل ويظهر الشخص على حقيقته جدا، ينكشف الغطا والمستخبي يبان، عشان كده فكروا مرة واتنين وتلاته واختاروا صح، اختاروا اللي يقدر اللي جواكم ويحترم حقيقتكم من غير رتوش، اللي يبقى بينكم وبينه مودة، ثم مودة ثم مودة، رحمة ظاهرة وباطنة، جمال طبيعي من غير اكسسوارات ولا ادوات تجميل زائلة، حد قابلكم بعيوبكم، ندوبكم، كرمشة روحكم، عارف الأسود اللي فيكم وقابله قبل ما يطالبكم بالابيض، ببساطة بيبلع لكم الزلط ويعدي عشان شايفكم دائما تستاهلوا الحلو كله.
2
-2
