غابة الذعر...مثلث برمودا البر، دي الألقاب اللي الناس أطلقوها على مكان معين، مكان كان مصدر خوف للسكان اللي حواليه، ومصدر غموض للعالم كله وهي "غابة هويا باكيو" في رومانيا...

"هويا باكيو" تعتبر من أكتر الأماكن المسكونة على الأرض وفي عدد مهول من البلاغات عن ظواهر غريبة بتحصل فيها...

أما عن اسمها فيقال إنه في الأصل اسم راعي غنم، راجل كان في حاله، بيشتغل في تربية ورعاية الأغنام وفي يوم الراجل ده كان بيتجول بالقرب من الغابة أو دخل جواها ومعاه 200 غنم ومطلعش تاني من الغابة لا هو ولا الغنم بتوعه، فص ملح وداب...

الغابة دي اللي في إقليم ترانسيلفانيا محدش سمع عنها لحد الستينات من القرن اللي فات، وفجأة انفجرت سلسلة من الأحداث الغريبة اللي مصدرها الغابة...

بداية الأحداث لما لقط عالم الأحياء ألكسندرو سيفت وصور جسم طاير في السما فوق الغابة، الجسم مكنش طيارة عادية، كان على شكل قرص أو دايرة ودي بس كانت البداية...

يقال إن أول ما الواحد يدخل الغابة بيحس بقلق وكإن في حد أو حاجة بتراقبه...

السكان اللي عايشين قريب منها قالوا إنهم بيسمعوا أصوات مرعبة وصراخ جي منها في نص الليل...

وفي مرة صوت الصراخ كان عالي جدًا لدرجة إن السكان بلغوا الشرطة...

عدد من الظباط دخلوا بنفسهم الغابة عشان يشوفوا موضوع الصراخ ده..

مشافوش بني آدمين، لكن لمحوا ضلال غريبة بتحوم حواليهم وسمعوا همسات، في النهاية مستحملوش، جريوا وهربوا من الغابة...

تاني يوم الظباط جالهم صداع رهيب، بطنهم قلبت وظهرت علامات حروق على أجسامهم...

مش بس الظباط اللي حصل لهم كده، في بلاغات عن ناس تانيين دخلوا الغابة وخرجوا بحروق على أجسامهم وطفح جلدي وصداع وحُمى، وفي دراسات كشفت عن وجود نشاط إشعاعي في الغابة سببه اليوارنيوم، ممكن ده يفسر الأعراض الغريبة على اللي بيدخلوا الغابة؟

ده غير إن عدد من السياح اللي بيروحوا هناك من باب الفضول قالوا إنهم شافوا أجسام ضبابية غريبة بتظهر في الغابة بليل...

مش دي أغرب ظواهر في هويا باكيو...الأغرب لسه جاي...

في قصص عن زوار للغابة بيدخلوا وبيختفوا، لكن مش للأبد... بيرجعوا تاني بعد فترة من غير ما يفتكروا أي حاجة عن اللي حصل لهم جوه الغابة، لا فين اختفوا ولا إيه السبب ولا عدوا الوقت إزاي، ولما بيرجعوا بيبقى على أجسامهم حروق وطفح جلدي...

من أشهر الحوادث دي بتاعة بنت صغيرة عندها 5 سنين، البنت لسبب ما وبطريقة ما اختفت حوالين الغابة، أهلها دوروا عليها كتير، وفي كل مكان ممكن، لكن البنت مكنش ليها أي اثر، لدرجة إنهم بعد سنين بدأوا يقتنعوا إن البنت مش هترجع، ولازم إنهم يعترفوا بالحقيقة دي ويواجهوها ويسيبوا نفسهم للحزن وبعديه التعايش مع موتها، وفعلًا اعلنوا إن البنت اتوفت، وبعد 5 سنين من اختفائها البنت خرجت من الغابة..

خرجت بنفس هيئتها وفي كلام إنها خرجت بنفس شكلها بالظبط، من غير ما تكبر يوم واحد، كإن السنين دي معدتش عليها والزمن وقف بيها، ومكانتش فاكره أي حاجة، بالنسبة لها هي لسه حالًا داخلة الغابة ولفت ورجعت!

وزي ما في ناس دخلت وخرجت، في ناس مخرجتش...

من ضمنهم بنت كانت بتتمشى مع خطيبها بالقرب من الغابة، وفجأة البنت سرحت، بدأت تبعد عن خطيبها وتتوجه للغابة، كإن في نداهة بتندها...

مش دي أغرب حاجة، الأغرب إن خطيبها حاول يلحقها لكنه قال إنها اختفت بسرعة جوه ضلمة منتشرة في الغابة وغاب كل أثر ليها...

في فرق انتشرت كتير عشان يلاقوها، لكن البنت اختفت تمامًا، محدش نجح يلاقيها ولا حتى جثتها...

يقال إن برغم كده مش دي آخر مرة البنت ظهرت فيها!

البنت ظهرت تاني لكن مش في صورتها المادية، ظهرت كشبح وهي لابسة فستان أبيض، فستان فرح، وإنها بتفضل تنادي على خطيبها كإنها بتدور عليه، لكنها مش بتظهر لأي حد، بتظهر بس للستات والأطفال وإنها ودودة جدًا وبتحيي الأطفال بإيديها وبتبتسم ليهم...

نيجي بقى للأشجار بتاعة الغابة...

لو أنت سايح ومعندكش فكرة بتاريخ الغابة ولا الكلام اللي بيتقال عليها، ولا تعرف قصص عفاريت ولا اشباح ولا ضباب ولا أطباق طايرة وقررت تتفسح في الغابة لما تروح رومانيا أظن إن برضه شعر إيدك هيقف من المنظر اللي هتشوفه، وده بقى مفيهوش قيل وقال ويمكن ويجوز، ده واقع مفيهوش شك، الواقع هو منظر الشجر اللي هناك، الأشجار الضخمة جذوعها ملتوية، مش شجرة واحدة، دول أشجار كتير ، كإن في سبب ما، حاجة في التربة بتخلي الأشجار تنمو بالطريقة العجيبة دي غير أي أشجار في أي مكان تاني على الأرض، يقال إن الأشجار دي أعمارها تقدر ب 200 سنة لكن شكلهم يوحي بإنهم أصغر، كإن أعمارهم أقل من كده بحبة حلوين...

مش دي بس الظاهرة الطبيعية الغريبة اللي هتشوفها، ممكن جدًا تخبط في مساحة دائرية في وسط الغابة، المساحة دي مع كل الخضار اللي حواليها فاضية تمامًا من أي نباتات أو أشجار، تربة ميتة!

في شوية عُلماء أخدوا عينات من التربة دي عشان يحاولوا يفهموا ليه النباتات مش بتنمو فيها والنتيجة...

مفيش أي سبب منطقي يخلي النباتات متطلعش في الأرض، الخصايص بتاعتها هي نفسها الخصايص بتاعة كل الغابة، بس لسبب ما ده مبيحصلش، وده يخلينا نسأل هل السبب مش علمي؟ أو بمعنى اصح الحل ممكن يكون في علم إحنا لسه موصلنلهوش؟

يا ترى ممكن نعرف الإجابات لما ندور في التاريخ؟

يا ترى المنطقة اللي فيها الغابة كانت موطن مين من الشخصيات التاريخية؟

"ترانسلفانيا" هي بلد "دراكولا"!

أيوه هو نفسه، مصاص الدماء الأشهر، مصاص الدماء الأصلي، اللي ألهم كتاب الرعب وخلق إسطورة مصاصين الدماء، طبعًا هي القصص اللي بتتعمل عنه في هوليوود وقصص مصاصين الدماء دي كلها أساطير، إنما الحقيقة...مرعبة عن كده بكتير...

الراجل ده اللي اسمه "فلاد دراكولا" كان حاكم ترانسلفانيا، وكان شغفه الدم...

قتل كتير من أعداءه بأبشع الطرق، مش بس من جيوش دول تانية، من شعبه كمان، يعني يقال مثلًا إنه مرة عزم عدد من النبلاء على وليمة كبيرة، والناس كانوا في غاية الانبساط وبعد ما خلصوا أكل، أمر جنوده يعلقوهم على أشجار مدببة ويسيبوهم لحد ما يموتوا بالبطيء بطريقة الخوزقة، دي على فكرة كانت طريقته المفضلة في القتل عشان كده اتسمى "فلاد المخوزق"...

وإنه مرة من المرات كان قاعد في قصره ودخل عليه زاير من النبلاء، والضيف ده كان مشمئز من المنظر والريحة في القصر، لإن الجثث كانت مرمية في كل مكان، وطبعًا "دراكولا" كان متكيف ومبسوط، ده بالنسبة له فن ومزاج، المهم إن دراكولا قطع مناخير الضيف عشان يخلصه من حالة القرف اللي هو فيها...

ويقال برضه إن "دراكولا" كان بيحب ياكل وهو بيتفرج على ضحاياه بيتعذبوا وهم متعلقين على قمم الأشجار المدببة وإنه كان بيغمس اكله في دم الضحايا...

ولكم أن تتخيلوا كان بيتصرف إزاي مع جيوش اعداءه، حتى إنه يقال إن في مرة من المرات، علق كتيبة جيش من جيوش العدو على أشجار غابة كاملة وده كان سبب في تراجع باقي الكتايب لما شافوا المنظر ده من بعيد...

أشجار؟ غابات؟ ده..مش بيفكركم بحاجة؟؟

الأهم في قصة دراكولا واللي ليه علاقة بالغابة بتاعتنا هو موته...

في قصة بتقول إن العثمانيين قتلوه وقطعوا راسه وإن باقي جسمه اتدفن... فين... أيوه في "هويا باكيو"، تخيل تدخل مكان جميل مليان أشجار وخضرة في يوم هادي ومشرق وتدوس على مدفن "دراكولا" من غير ما تدرى ، الراجل الطيب ده اللي كان بيعشق الدم، مش الشاي، مش النسكافيه، مش الكركديه، لأ الدم، ، تخيلت؟

ورواية تانية بتقول إن الإعدام نفسه تم في الغابة، يعني راسه اتقطعت في هويا باكيو...

وعلى فكرة في اسطورة بتقول إن لسبب ما في ناس نبشت مدفن دراكولا لكن ملقوش جثته وده يمكن اللي فجر القصص عن إنه رجع للحياة على شكل كائن شرير شيطاني بيعذب البشرية، ومسيرته الدموية بتستمر...

وفي تفسيرات عن إن ده سبب الظواهر الغريبة في الغابة، شبح "دراكولا" بيتجول بليل فيها وبيسبب كل الرعب اللي السكان بيعانوه...

مش بس روح دراكولا هي اللي بتهيم في الغابة وبتسبب الرعب للزوار والسكان، ده كمان بيقال إن اشباح الفلاحين من عصر سحيق هي كمان ساكنة الغابة...

القصة بتقول إن في عصر ما مجموعة من الفلاحين رفضوا إنهم ينضموا لصفوف جيش الصليبين والنتيجة هي إن النبلاء الرومانيين قتلوهم بطرق بشعة ومثلوا بجثثهم بعد معركة ضد الفلاحين، والضحايا منهم كانوا آلاف، ودول هم سبب الضباب الإسود الكثيف اللي بيظهر في الغابة، طول ما مفيش ضباب مفيش مشكلة، تقلق بس لما يظهر الضباب، كده يبقى أشباح الفلاحين حضروا يا معلم، وفي مواعيد محددة لظهورهم، الضباب والاشباح بتظهر الصبح، عكس باقي الأشباح اللي بتيجي بليل، أشباح الفلاحين دول عنيهم حادة ما بين الأزرق والأخضر على كلام اللي شافوهم يعني..

السؤال هنا يا ترى إيه اللي بيحصل في الغابة دي وبسببه اتوصمت إنها من اكتر الأماكن المسكونة في أوروبا؟

مش بس عالم الأحياء ألكسندرو سيفت اللي شاف جسم اسطواني طاير في السما في الستينات ده كمان راجل اسمه إيميل بارنيا ادعى إنه أخد صورة لجسم غريب بيطير فوق غابة "هويا باكيو"...

ومن وقتها ولحد الألفينات حصلت بلاغات عن مشاهدات لأجسام غريبة بتحوم في المنطقة دي، آخر توثيق كان سنة 2002 لما اتنين من السكان اللي عايشين قريب من الغابة صوروا جسم طويل مضيء على شكل سيجار ، الجسم بعد ما ظهر شق طريقه لفوق زي الصواريخ واختفى...

طبعًا اللي هيصدق في المشاهدات دي هيفترض إن الأجسام هي عبارة عن أطباق طايرة وبتنتمي لحضارات تانية، حضارات غير أرضية، ويمكن ده يكون ليه علاقة بالبقعة الدائرية اللي مفيهاش نباتات ولا أشجار، يمكن مثلًا تكون مهبط للأطباق الطايرة؟؟ ويمكن ده يفسر اختفاء ناس بيدخلوا جوه الغابة واللي منهم بيرجع بيبقى مش فاكر حاجة، وده...عشان التجارب اللي اتعملت فيه من الرماديين؟ بطريقة ما مسحوا الذاكرة بتاعته وكمان يمكن التجارب حصلت جوه السفينة وبره الأرض؟ وده يفسر إن البنت اللي اختفت 5 سنين رجعت من غير ما تكبر ولا يوم؟ وده عشان الزمن بره الأرض مقاييسه مختلفة عن الزمن في الأرض، في أماكن يبقى اسرع وأماكن تانية أبطء؟

ويمكن برضه ده سبب ظاهرة غريبة زي غياب "عروسة الغابة" عن الوعي وإنجذابها للغابة كإن معمول ليها تنويم مغناطيسي؟ يكون في ذبذبات خفية ممكن تشد الشخص للمكان اللي الرماديين عايزينه؟ وده بسبب تكنولوجيا متقدمة منعرفش عنها حاجة؟ غير الذبذات ممكن يكون في مواد الآلات البشرية متقدرش ترصدها وهي اللي بتسبب الحروق والطفح الجلدي؟

أو مثلًا...

بما إن الغابة اتسمت بمثلث برمودا البر أو مثلث برمودا رومانيا، ليه متبقاش شبه مثلث برمودا الأصلي، اللي هو يقال عنه بوابة زمنية أو بوابة لعالم موازي وده يفسر الظواهر الغريبة اللي بتحصل فيه من اختفاء طاقم ركاب على سفينة وظهور السفينة لوحدها، ليه ميكونش ده برضه اللي بيحصل في هويا باكيو؟

وفي أدلة تثبت النظرية دي من ضمنها الناس اللي بيختفوا من غير أي أثر، زي هويا باكيو نفسه وال200 غنم بتوعه اللي مش منطقي إنهم يختفوا من الوجود فجأة، ومحدش يلاقيهم لا في الغابة ولا حواليها والناس اللي دخلت جوه الغابة ومخرجتش والناس اللي خرجت ومكبرتش يوم واحد، والبقعة الفاضية اللي حواليها غموض كبير وممكن بشكل ما تكون مركز البوابة دي، ويمكن كمان تكون من صنع البشر، أيوه، السفر عبر الزمن...

ليه متكونش البقعة الدائرية هي مهبط آلة السفر عبر الزمن أو البوابة الخفية للسفر عبر الزمن زي ما شفنا في مسلسلات الخيال العلمي، ويمكن المسلسلات دي تكون استوحت الفكرة من هويا باكيو والظواهر الغريبة اللي بتحصل فيها، عامة نظريًا السفر عبر الزمن مش مستحيل وده وفقًا لنظريات آينشتاين مثلًا لكن ده موضوع يطول شرحه وممكن نتكلم فيه في حلقة تانية بعدين...

اللي يهمنا هو محاولة تفسير القصص اللي بتدور حوالين الغابة واللي منها اختفاء بنت صغيرة ورجوعها بنفس الهيئة بعد سنين من غير ما تكبر، وكإن الزمن معداش عليها...

وليه متكونش كذه ظاهرة هي اللي مسؤولة عن اللي بيحصل، يعني لو هنفترض إن دراكولا مات في الغابة والفلاحين ماتوا برضه فيها أو بالقرب منها والفضائيين لسبب ما اختاروا الغابة دي عشان يعملوا تجاربهم على البشر أو يستكشفوا الأرض أو تبقى مهبط لسفنهم وبسبب تجاربهم في بشر ماتوا فده كافي يخلي المكان مسكون، يعني يبقى في اشباح وفضائيين وأكشن ميخليش السكان حوالين الغابة يزهقوا أبدًا...

ده لو افترضنا إن أي قصة من اللي اتقالت عن الغابة حقيقية وإن الناس فعلًا شافوا أطباق واشباح وضباب وسمعوا صراخ وناس دخلت جوه الغابة مطلعتش وناس طلعت زي ما هي لكن من غير أي ذاكرة عن اللي حصل في الغابة، أنتوا إيه رأيكم؟

اللي متأكد منه إنكوا هتفكروا الف مرة قبل ما تعملوا مغامرة في رومانيا وتدخلوا الغابة المسكونة، إلا لو عايزين تقابلوا الكونت دراكولا وتقبلوا تبقوا ضيوفه...

"تمت"

 ..