المطلوب (سلطانه) .. قصة قصيرة

لم تكن "سلطانة" لتلاحظ أي حركة غريبة لولا أن أنزلت السماعات من أذنيها إستعدادًا لفتح فيديو جذاب عن دورة حياة الدجاجة في كوريا الشمالية ، هنا إلتقطت صوت مريب، هناك أحد غيرها بالمنزل!

بسرعة وبرشاقة تحركت من مكانها وإتجهت إلى المطبخ ، أمسكت المحمول وأختارت رقم والدها من قائمة الإتصال..

رد عليها الأب مُرحبًا

-بابا في حد في البيت.

-حد؟ هو ده اللي كنت خايف منه.

-خايف من إيه؟ هو في إيه؟

-"سلطانة" ركزي معايا وإسمعي كلامي بالحرف، مبدئيًا هدي أعصابك ووطي صوتك عالآخر ، إتنفسي كده مش عايزين يجيلك panic attack..

-تمام يا بابا ماشي

-إتمشي براحة لحد النملية، إفتحيها..

-فتحتها.

-هتلاقي علبة بسكوتات كبيرة مدورة مللي مكتوب عليها كوكيز وعليها ألوان موف وأحمر وكده.

-لقيتها أهي.

-إفتحيها هتلاقي إبره وبكر خيط ومفتاح صغير راسه على شكل فيونكه.

-إستنى مش لاقياه، اه، اه خلاص لقيته.

-جميل يا حبيبتي أنتي ماشية زي الفل، خدي المفتاح وروحي أوضة نومنا من بلكونة المطبخ المنفده عليها.

-إحنا مدخلناش البلكونة دي من سنين.

-إحنا مش بنتسامر يا "سلطانة" في راجل غريب في البيت وناوي على شر.

-تمام، تمام دخلت البلكونة.

-على بعد شبرين هتلاقي بيت عنكبوت ، إخترقيه وعدي أو إنزلي من تحتيه حركة ماتريكس.

-تمام نزلت من تحتيه وعديت... أنا دلوقتي بدخل الأوضة.

-سامعه الراجل؟

-اه بيتجول في الصالة.

-جميل، طلعي المفتاح وإقفلي الدواليب.

-الدواليب كلها بنفس المفتاح؟

-بنفس المفتاح، ده المفتاح اللي جدتك كانت برده بتفتح بيه الشكمجية بتاعتها.

-قفلت.

-برافو، دلوقتي إعملي إلهاء!

-أعمل إيه؟ إزاي؟

-إعملي أي صوت وأجري بسرعة تاني من البلكونة وإعملي واحدة ماتريكس وعدي روحي المطبخ ومنه عالصالة.

-أنا خايفه.

-متخافيش.

-شكرًا.

-العفو أكيد.

سمع الأب صوتها وهي تقلد الديك ثم تجري مسرعة نحو الشرفة...

-هاه؟

-سمعاه... بيجري ناحية أوضتكم وأنا...أهو وصلت المطبخ وهخرج..

-تمام أنا معاكي متقلقيش.

-وصلت الصالة..

-روحي على النيش وبنفس المفتاح إقفلي كل الضرف.

-تمام، أدي ضرفة واادي التانية.

-ضرفة الصيني، دي أهم واحدة.

-حصل..

-جميل، دلوقتي إتوجهي لأوضتك.

-ماشي...أديني وصلت

-أنا عايزك تروحي ناحية السرير، انزلي وازحفي واتدألجي تحتيه، اسمعيني يا بنتي هدي أعصابك وحاولي توصفيلي أي حاجة تشوفيها من تحت السرير لبس الراجل وصوته ،اي تفاصيل.

-حصل يا بابا، انا شايفه بنطلون كاكي وكروكس وصوت اجش بيقول انا عارف انك هنا وهجيبك.

-طب ركزي في اللي هقوله كويس، انتي هتتاخدي كمان 10 ثواني بالظبط وهبدأ معاكي العد التنازلي تمهيدًا للعذاب وعملية الاختطاف وتحفيزًا للإدرينالين 10...9...8

-أنت بتقول إيه؟!

-شششش...5...4...3

-ااااه باباااا مين ده، مين اللي بيجرني ده، إيه اللي بيحصل ؟

-ده محصل النور، بتهرب منه ومش بدفع بقالي شهور، وقصدت أغيب عن البيت أنا وأمك عشان جالنا إخبارية أنه هييجي بوصل جديد، وأنا مش هسدد وكنت خايف، بس متقلقيش هحاول أمخمخ وأخلصك منه، بالسلامة أنتي..