لو سألت السكان في الكونغو سؤال عجيب هيردوا بمنتهى البساطة، السؤال هو "شفتم ديناصور قبل كده؟" الإجابة هتكون" مظبوط بنشوفه علطول!" حتى انهم ادوله اسم "موكيلي" وبيوصفوه أنه ضخم وليه رقبة طويلة وديل أما أكله فكائنات وديعة زي الأفيال والبقر، الإشاعة دي انتشرت جدًا في القرن ال18 وفضلت إشاعة لحد ما إرسالية فرنسية للتبشير اتفاجئت بوجود الكائن ده على بعد أمتار قدامها سنة 1776 في منطقة لوكوالا!

وسنين كتير بعديها زادت الشهادات برؤية "موكيلي" الديناصور الحي..لحد ما قرر عالم الاحياء روي ميكائيل أنه يتأكد بنفسه ونظم أول بعثة للكونغو سنة 1980وبعثة تانية سنة 1981 وبرغم أن البعثتين ماصادفوش "موكيلي" بس لقوا ظواهر غريبة جدًا في الأماكن اللي المفروض حصلت فيها مشاهدات للديناصور، زي أربع فيلة ميتة زي ما تكون حاجة فتكت بيها وآثار على بطنها، مقطومة من نص جسمها، ده غير إن ميكائيل عرض على السكان اللي ادعوا أنهم شافوه صور مختلفة من الديناصورات و86% منهم إتفقوا على ديناصور محدد "بورتيسور" المشكلة أنه انقرض من ملايين السنين!

ميكائيل حاول يتوغل أكتر في الغابة بس منجحش عشان مفيش حد من السكان وافق يروح معاه بس في حد تاني نجح وهو المهندس الأمريكي هيرمان ريجسترز وادعى أنه شاف مخلوق ضخم ليه رقبة طويلة بس اختفى بين الأشجار وشافه بعديها كذا مرة يأما كان بيختفي بسرعة بين الأشجار أو جوه المستنقعات...

أما بقى لو اتنقلنا لتكساس هنلاقي لغز تاني فحوالين نهر بلاكسي في آثار أقدام متحجرة لديناصور وجنبيها بالظبط آثار أقدام بشرية! اللي اكتشفها لأول مرة هو رونالد بريد عالم الحفريات سنة 1930 والمفروض أن العلما كانوا متأكدين أن في فرق زمني رهيب يقدربملايين السنين ما بين إنقراض الديناصور ووجود الإنسان على الأرض طيب آثار الأقدام دي ممكن يكون معناها ايه؟ الإفتراض الأولاني أن العلم خاننا وغلط، الديناصورمكنش بعيد أوي كده زي ما قدرنا وبكده الديناصور عاصر الإنسان عادي جدًا وعاش معاه اتضلل بنفس الضلة تحت نفس الأشجار وشرب من نفس الميه بتاعة البحيرات العذبة وشاف نفس الأهوال الطبيعية والكوارث الأرضية من زلازل وبراكين وغيره، الإفتراض التاني أن الإنسان أبعد ما كنا بنقدروبرضه علمنا خاننا، الإنسان قديم جدًا قدم الديناصورات وكان موجود من أكتر من 65 مليون سنة، كل الحكاية أننا مكتشفناش لحد قريب أدلة وآثار عن الإنسان القديم فإفترضنا أنه أجدد بكتير من كده وبرده الإنسان والديناصور عاشوا تحت نفس الظروف وشافوا نفس الأرض، أما الإفتراض الأخير، إن كان في إنسان مختلف غير سلالة آدم، أجناس عاشت قبلنا كانت شبهنا بس مكانتش إحنا، ليها خصائص جسدية قريبة منا وده بيفكرنا مثلًا ب"يأجوج ومأجوج" اللي فيه آراء بتقول إنهم مش من نفس سلالتنا، هما من اللي نجيوا من السلالة البشرية القديمة ومش من بني آدم ويفضل طبعًا العلم عند الله وده مش موضوعنا ، موضوعنا هو هل لسه في ديناصورات؟

في بابوا غينيا الجديدة وتحديدًا في 11 ديسمبر، 1999، القرويين اللي كانوا على قارب بيقضوا يوم لطيف بلغوا عن مشاهدة كائن بيخوض في الميه في اليوم التالي وبالصدفة بلغ راعي كنيسة إنه شاف كائن بنفس المواصفات ف مكان مش بعيد عن المكان الأولاني اللي حصل عليه البلاغ، الكائن إتوصف أنه "ضخم زي عربية نقل كبيرة وعرضه حوالي مترين ورقبته طويلة وليه ديل" وكان بيمشي على رجليه الخلفيتين وهي "سميكة زي جذوع أشجارنخيل جوز الهند" وكان ليه رجلين قدام بس أصغر من اللي ورا و"راسه كانت شبه رأس البقرة وعينين كبيرة وأسنان حادة " و"جلده كان شبه جلد التمساح".. مواصفات المخلوق مكنتش شبه أي مواصفات لمخلوقات عايشه في الوقت الحالي بس شبه مخلوقات كانت عايشه..من 65 مليون سنة واسمها "الديناصورات"..

الحقيقة الوصف ده فكر الباحثين بوصف مخلوق تاني برده كان في ادعاءات بمشاهدته اسمه " موكيلي" في الكونغو"، تقريبًا نفس الشكل والمواصفات والمفروض لوصحت الادعاءات يكون عايش في مستنقعات الكونغو وغاباتها زائد بابوا غينيا الجديدة... ايه رأيكم هل ممكن تكون الديناصورات عايشة معانا واحنا متخيلين انهم إنقرضوا؟