حسام مصطفى إبراهيم عامل بوست مرعب بالنسبة لي.. 

حسام كعادته في اللطف والإنسانية بيحاول يوصل دواير الخير والجمال ببعض، ويعرف الناس الحلوة ببعضها، ويعمم الاستفادة من وجودنا عالفيسبوك قدر الإمكان.. 

كتب بوست بيطلب فيه من كل واحد يكتب أسامي الناس اللي بيتابعهم وبيستفيد منهم عشان باقي الناس تتابعهم.. وهو شخصيا كاتب تعليقات كتير ذاكر فيها أسامي الناس الملهمة بالنسبة له في كل المجالات، وكتر خيره وزاد فضله ذكر اسمي في تعليق باعتباري من الناس اللي كتابتها حلوة وكدا.. 

المرعب في البوست إيه بقى؟

إنه يجيلك إشعارات إن اسمك اتذكر في تعليق فلان وفلان، فتبص تلاقي التعليقات كلها عند نفس البوست.. تيجي تدور فالتعليقات دي تتوه منك ومتلاقيهاش، وتلاقي اسمك مذكور من ناس تانية مجالكش بيهم اشعار! 

فترد عالناس اللي تلاقيهم ذاكرينك وتدور عاللي مش لاقي تعليقاتهم عشان تشكرهم.. أقل واجب يعني.

وانت بتقلب في التعليقات قلبك يدق.. لو ملقتش اسمك اكيد هتزعل بحكم إنك عارف إن حبايبك كتير، واللي يعرفوني ويعرفوا حسام كتير، فغروري يصور لي إنه متوقع حد فعلا يذكرني.. 

طب ولما الاقي اسمي؟ يدق قلبي أكتر، اللي هو صحيح يعني حد شايف إن اللي بكتبه حلو ومؤثر لدرجة أنه ينصح غيره أنه يقرالي! 

حاجة كدا زي كلاهما حلو لكنه مخيف..  

فوالله يعني كتر خيره حسام، تفكيره دايما واسع ومُجدد وطيب..

وشكرا لكل اللي ذكرني في البوست ومشوفتش تعليقه، والله انا حاولت أرد على كل تعليق اسمي ورد فيه. 

واتمنى أكون فعلا بقول حاجة كويسة فاللي يدخل صفحتي بناء عالبوست دا يقول إن اللي كتب اسمي كان عنده حق

اللهم أحسن إلينا بسترك الجميل