نداء إلى مامى البنطلون أبو زراير و إلى مامى البامية.

مامى البنطلون أبو زراير:

ابنك حيطلع عيل هش و عنده إحساس أنه محور الكون..وان أى خطة/شغل/ضغط مش على مزاجه نوع من الاعتداء الشخصي عليه.. يدخل في ذلك شويه مذاكرة زيادة..نوبتشيه تطول شويه.. شغل مفاجىء لازم يخلص..

و الأمور اتعود أنه يعيط ويدبدب و يوقف الدنيا لحد ما "هو" يحط حلول على مزاجه..ويا تتنفذ يا تبقى مصيبة واستقصاد و بيعملوا فينا كده ليه .. حيطلع عيل من اللى مش لاقيين شغفهم دول و بيتنقل من شغل لشغل و حاسس دايما إنه ضحية..

بينما هو عيل دلوع عادى...

مامى البامية:

ابنك يا حيطلع عيل منسحق تماما..عايش حياته كلها خايف و مش عارف يعبر عن احتياجاته وتفضيلاته ...يا حيطلع شخص واخد ميكانيزم دفاعى في صورة هجوم متواصل...شايف أن اى مفاوضات ممكن تؤدى لأذى أو ضرر أو غصب فيسبق بالتجاوز عشان ما يراه حقه ميضيعش .. شخص مستنفر دائما و عدوانى جدا بينما من جواه هو اغلب من الغلب..

انتوا الاتنين تربيتكم حتفرقع في وشنا احنا..نواب و طلبه مش عارفين حدودهم و لا حقوق الشغل عليهم ..ولا عارفين برده حقوقهم ايه و امتى يتكلم باحترام...ولا يعني ايه شدة لضبط العمل وبين الاستقصاد مثلا والتعنت..

ربوا عيالكو عدل عشان احنا اللى بنلبس في الآخر.