ناس كتير بتفهم الزواج على إنه إمتلاك الطرف الأخر بمشاعره وأفكاره وفلوسه وأحلامه وكل مايخصه..لأ الجواز مش إمتلاك طرف لطرف وفرض سيطرته عليه. الجواز مشاركة بين إتنين لمشاعرهم وأحلامهم وأفكارهم وفلوسهم (لو الست حبت) ومش من حق طرف إنه يفرض على التاني سلوك معين فالتملك ده سبب فشل جوازات كتير.
فالزوج غالبا ما يتمسك بفكرة الملكية والعبارة الشائعه( أنت بتاعتي) لأ هي مش جارية اشتريتها هي إنسانه زيك قبلت تشاركك حياتك مش ضروري تمنعها عن أهلها وأصحابها عشان حبها وإهتمامها كله يبقى لك إلا إذا ماكنتش واثق من نفسك أو من حبها لك وخايف إنها تسيبك في أي وقت.
كمان ماتمنعهاش عن تحقيق طموحها ونجاحها إلا إذا كنت خايف إنها تنجح وتظهر وتتفوق عليك وده هيعمل لك أزمة نفسية لو ماكنتش شايف إن نجاحها هو نجاحك إنت شخصيًا.
والزوجه معظم الوقت مش عايزة جوزها يهتم بحد غيرها وبتولع من الغيرة لو اهتم بأمه وإخواته، أو جابلهم هدايا أو جاملهم في مناسبات، و مش قادرة تفهم إن طبيعة حبه لهم تختلف عن حبه لها وإن مشاكلها مع أمه وإخواته هتكرهه فيها.
كمان البيت بيولع نار لو كلم زميلته أو قريبته أو مدح فيهم هو مش لازم يشوف غير زوجته ويمدح فيها، الخنقه دي بتخلي الراجل يعمل زي العيال الصغيرة ويروح دايمًا للممنوع. كل حاجة تكون في حدود المعقول والأصول والحلال.
محدش ملك حد لكن طالما طرف قبل إن طرف تاني يشاركه حياته فده معناه إنه مقتنع بعقله وقلبه بيه فمهم جدًا ندعم المشاعر دي مش نقللها بالرغبه في تملكه وخنقه بالمشاعر الأنانية.
حب التملك كفيل إنه يقتل أي مشاعر، حب شريكك زي ماهو وحاول تكسب قلبه وبطل تحاول تمتلكه عشان علاقتكم تنجح وتستمر.
1
-2
