كان ابنى فى الثانويه العامه .. فى عام تسريب الامتحانات الشهير .. و سمعنا ان كل ليله الامتحانات بتنزل على النت بمنتهى الجرأة .. و جاء ابنى الذى عانيت معه مثل كل الناس .. و حدثنى ان معظم من يعرفهم يتهافتون على هذه التسريبات .. قلتله وانت ناوى على ايه ؟ 

قالى ده برضه سؤال يا ماما !!! 

انتى عايزانى اعمل كده !!! ???? 

قلت له "لأ طبعا يا حبيبى انا عندى استعداد تسقط و تعيد السنه و انت شريف و ماتنجحش و انت غشاش" 

و طبعا انت عارف حديث رسول الله 

من غشنا ليس منا 

و اديك شايف الفتن اللى فى الدنيا 

فخلينا نتمسح فى رسول الله بحاجه بسيطه يمكن الحاجه دى تخليه يشفع لنا  

و انتهى الحديث عند هذا الحد 

و بعدها بيوم اتصل بى أحد المعارف و هو سعيد جدا ليخبرنى انه معاه هديه لى 

- فسالته ماهى ؟

- قال .. الامتحان اللى ابنك هايمتحنه بكره 

و ده اكيد هو اللى جاى 

- قلتله .. لأ مش عايزاه 

- قالى .. نعم ؟؟ 

انتى بتهزرى ؟؟ 

- قلتله .. لا .. ابنى يبقى فاشل شريف احسن مايبقى وزير فاسد او مرتشى و حرامى 

- قالى ايه الكلام ده !!!

ده انا قريبتى كلمتها قبل ما اكلمك زغرطت فى التليفون من فرحتها .. 

طيب أسألى ابنك وخدى رأيه 

- قلتله حاضر 

ذهبت و هو معى على التليفون و سألت أبنى و سمع بنفسه الرد 

تعجب من تصرفنا الغير منطقى و لكنه فى نهايه المكالمه دعا لنا و تمنى لنا كل الخير 

هو يرى كلامى الان .. و شاهد عليه 

الحياه نجاح و فشل .. نهوض و سقوط 

و لكن النهايه واحده و بعدها حساب .. 

كل واحد لازم هايدفع ثمن المشاريب اللى شربها و شربها لأبنائه من بعده .. و اللى بدورهم هايورثوها لأبنائهم لتشرب الذريه كلها سمٌ زعاف أو شهد صافى .. 

بلاش نفكر فى لحظه نجاح مؤقت و بعدها هايتدفع الثمن أكيد