هو ايه ممكن يميز تربية أُسر عن غيرها لولادها ؟! 

سؤال بيطرح نفسه جوايا طول الوقت وبتفكر فيه وقت تصرفات الولاد و وجودهم حواليا وتفاصيلنا سوا

توصلت لإدراك جديد مختلف عن قبل كده ،و ما اظنش انه ممكن يتغير تاني مع الوقت لانه تقريبا هو الأساس في كل حاجة مش التربية بس 

إدراك “اليقين “

لما بنربي ولادنا باليقين بتكون نبتتهم مختلفة و إحنا كمان بنكون مختلفين 

اليقين بيدينا (صبر وتسليم ورحابة وسعة صدر) 

إن كل اللى بنقوم بيه كأساس من و هما صغيرين هينبت في وقت من الأوقات ، اللى هو منطق 

(اعمل اللى عليك وانساه وربنا هيتولاه)

و بينتج عن ممارسة الإدراك ده مشاعر مهمة جدا وهى (الفرحة والامتنان)لكل قرب بوجودهم

و (التفهم والاستيعاب ) لكل تصرفاتهم و تقلباتهم وقلة خبراتهم 

وكلها حاجات مش هنشوفها كده الا عن طريق السعي للغرس واليقين في الباقي.

على الاختلاف بالنسبة للإدراك السابق.

 إدراك “الانتظار”

بكون فيه بربي و أنا منتظرة نتيجة لحظية اللى هو 

(انا عملت ..حالا نفذ) والادراك ده بينتج عنه 

(إحباط ،استياء ،عدم رضا ،لوم لنفسي وعدم قبول محدوديتها )

وده اللى بيميز التربية بين أسرة و غيرها

وفي ملحوظة مهمة

” الادراكين بيغلفهم الحب “

الأول حب النعمة والصبر عليها و بيحركه اليقين.. 

والتاني حب نفسي وتوقعاتي منها و بيحركه الانتظار..

شيء مدهش اننا نتفكر في النعم اللى مغرقانا 

الحمد لله