معظم البشر عندهم فهم ملتبس عن السعادة ، لسه الناس فاكراها حالة دائمة من التحليق والرضا بندور عليها لحد ما بنوصلها ، مفيش للأسف حاجة اسمها كده ، أنا دايما بستخدم كلمة(بهجة) عشان بحسها أكثر واقعية ومنطقية من كلمة سعادة ، إنك تبقى مبسوط فى لحظة من اللحظات لسبب ممكن يكون بسيط جدا ..
إنك تعرف توصل للمعنى ده ، تعرف تلاقى لحظات انبساطك بالتفاصيل الصغيرة وسط الحاجات ، تبقى عرفت تلاقى مفتاح للبهجة الحقيقية ، بهجة الإستمتاع بالأشياء الصغيرة ، باللحظات الخاطفة ، بلمعة عين فى وقت الرضا ، من غير ما تستنى وهم كبير يخليك راضى للأبد .. عشان كده بحب كلمة (البهجة) لإنها هى اللى بتنكش وسط التفاصيل الصغيرة ، بحثنا الدائم عن السعادة الأبدية ، هو اللى بيضيّع علينا متعتها واحنا باصين بعيد على حاجة كبيرة مش بتيجى  ...