الرعب الحقيقي مش متمثل في الجن والعفاريت، الرعب الحقيقي بيبدا من عند البشر.. لو بصيت حواليك دلوقتي هتفهم قصدي كويس
احنا بقي وجودنا اكبر خطر على الارض.. كل يوم بنسمع عن جرايم بشعه
وحاجات خارج نطاق العقل والمنطق.. والبدايه كلها بتكون نفس اماره بالسوء وشيطان وسوس جوه العقول
...
_ ها يا دكتور، خير؟
= الحجة صفاء متوفيه من ساعه، بس انا شاكك ان الوفاه مش طبيعيه
_ مش طبيعيه كيف يعني؟
= لا والله دي حاجه انا معرفهاش.. انا هبلغ الشرطه وهي بقى تتصرف بمعرفتها بس الجثه دي لازم تتشرح عشان نعرف سبب الوفاه
_ شرطة ايه وتشريح ايه؟!.. ده لا يمكن يحصل أبداً
= وهو انت خايف ليه؟.. انا بقولك والدتك مش ميته موته طبيعيه ولازم تتشرح عشان نعرف السبب الوفاه، ولا انت عارف سبب الوفاه؟
_ قصدك ايه يا دكتور؟
= لا قصدي ولا حاجه، بس انا لازم ابلغ الشرطه
_ استنى بس يا دكتره شرطه ايه؟.. ما احنا نتفق وتاخد اللي فيه النصيب وتتكل على الله
= نتفق على ايه يا مجنون انت؟.. وسع كده من سكتي انا دلوقتي اتاكدت ان الموضوع مش وفاه طبيعيه
...
الصوت كان عالي، وتوفيق وعادل كانوا خايفين الناس تسمع الصوت، لحد لما الصوت سكت مره واحده وقتها انا قررت ادخل عشان اشوف في ايه وايه اللي انا سمعته ده، لكن لما دخلت كانت الصدمه
...
انا المقدم عزت مصطفى.. انا اللي مر عليا قضايا اشكال والوان ومفيش قضيه وقفت قصادي، واي حد بيسمع اسم عزت مصطفى قضيه بيعرف ان الموضوع مساله وقت وهيتحل.. وده مش غرور والله دي حقيقه
وصلت مكتبي زي كل يوم، ولقيت الرائد معتز كالعاده جايب الفطار عشان نفطر سوا.. واتكلم وقال
_ في ميعادك يا عزت، عمرك ما اتاخرت على الفطار
= وانت ما شاء الله عليك، من ساعه ما كنت ملازم اول وانت الاكل عندك رقم واحد
_ما اهو احنا لازم ناكل عشان نعرف نشتغل، ولا ايه عزت؟
= عندك حق
...
المهم قعدنا فطرنا، وشربنا الشاي والدنيا كانت هاديه تماماً، لحد ما سمعت صوت دوشه قدام المكتب وكان صوت واحده ست
قمت من على المكتب وطلعت بره ولقيت الست بتقول للعسكري، انا لازم اقابل الظابط.. فتدخلت انا في الحوار وطلبت منها توطي صوتها عشان اعرف في ايه
فقالت
_ انا بحاول ادخل لحضرتك بقالي 10 دقايق وهو رافض يدخلني
= طيب اهدي يا استاذه وفهميني في ايه؟
_ انا عاوزه اعمل محضر تغيب
= طيب اتفضلي مش هنقف نتكلم قدام باب المكتب
...
دخلت المكتب وكان باين عليها من لبسها انها بنت ناس وست محترمه، وبعد ما قعدت اتكلمت وقالت
_ زي ما قلت لحضرتك بره، انا جاي اعمل محضر تغيب
= مين اللي متغيب عند حضرتك؟
_ جوزي الدكتور عاصم الخضيري
= وهو متغيب بقاله قد ايه؟
_ كده بقاله 48 ساعه، انا حاولت اعمل محضر وقالولي مينفعش نعمل محضر غير لما يعدي وقت، وده عشان قلت للظابط اللي في القسم ان جوزي متعود يسافر ويغيب بس بكون عارفه، لكن المره دي هو كان في عيادته عادي وكلمني.. انه هيروح لمريض يكشف عليه في بيته عشان حالته صعبه والمستشفى بعيد عليهم
= من بعد المكالمه دي محصلش بينكم اي مكالمات تاني؟
_ دي كانت المكالمه الاخيره يا فندم، وبعدها تليفونه اتقفل
= طيب مقالش عنوان المكان اللي رايحه
_ للاسف يا فندم لا، انا مش متعوده اساله عن شغله
= طيب احنا عاوزين اسمه الثلاثي، وعنوان العياده، وطبعا هنحتاج اسم الشخص اللي شغال معاه في العياده عشان نبدا نعمل تحرياتنا ونتحرك من خلالها
_ تمام يا فندم، اسمه عاصم مدحت الخضيري، والشخص اللي شغال معاه في العياده هي بنت اسمها مياده عبد الحميد علي
وعنوان العياده في 19 شارع المقريزي.. مصر الجديده
= تمام يا استاذه
_ هبه اسمي هبه
= تمام يا استاذه هبه، ان شاء الله خير
....
مشيت الاستاذه هبه وبدانا تحرياتنا عن الدكتور عاصم مدحت الخضيري، وقتها بصيت لمعتز وقولتله
_ عاوز فريق البحث الجنائي يشتغل على المعلومات دي، واعمل استدعا لمياده عبد الحميد علي
= تمام حاضر
....
بعد حوالي 3 ساعات، حضرت الاستاذه مياده قدامي عشان ابدا التحقيق معاها.. وبدات الكلام هي وقالت
_ هو في ايه يا فندم انا معملتش حاجه؟
= اهدي يا استاذه مياده، احنا جايبينك ناخد منك كلمتين وهتمشي
_ كلمتين بخصوص ايه يا فندم؟
= بخصوص الدكتور عاصم، اخر مره قابلتيه كان امتى؟
_من يومين تقريباً
= طيب ومتفجأتيش لما روحتي العيادة والدكتور مجاش بعدها ولا حتي سألتي
_ هتفاجئ ليه يا فندم، الدكتور عاصم بلغني بغيابه عن العيادة وقالي انه هيروح الشرقية يشوف حالة هناك وبعدين هياخد اجازة عشان هيسافر هو والمدام، واداني اجازة وقالي لما ارجع هكلمك
=يعني الدكتور عاصم اخر مره شوفتيه كان رايح الشرقية.. مظبوط؟
_ايوة يا فندم ومعايا العنوان
=طيب أستأذنك في العنوان وتقدري تروحي دلوقتي
...
أخدنا العنوان وأتحركنا أنا ومعتز علي هناك، الطريق أخد معانا ساعة وعشر دقايق تقريباً.. وأول ما وصلنا علي العنوان، لقينا نفسنا قدام عزا وناس داخلة وناس خارجة
دخلنا وعملنا الواجب، وبعدها قربت من الشخص اللي واقف أول العزا وقولتله
_البقاء لله شد حيلك
= سبحان من له الدوام
_انا المقدم عزت مصطفى وده الرائد معتز، كنا عاوزين حضرتك في كلمتين
=طيب مينفعش نأجل الكلام دلوقتي، حضرتك شايف ده عزا المرحومة أمي
_هو سؤال واحد، هل الدكتور عاصم الخضيري جالكم هنا عشان يكشف علي حد عندكم؟
=ايوة هو جيه فعلاً وكشف على أمي بس للاسف كانت ماتت.. وبعدها خد بعده ومشي
_أصل الدكتور عاصم مختفي من ساعتها ومحدش عارف يوصله
=ربنا يرده لاهله بالسلامه
_طيب انا هستأذنك هجيلك بكره عشان العزا وكده
=مفيش مشكله
...
وهنا أدخل واحد من اللي واقفين وقال
_الدكتور اللي كان عند الاستاذ توفيق والاستاذ عادل مشي الساعة 11 بليل بعربيته يوم وفاة الحجة صفاء
لفت نظري كلام الشخص ده، وده خلاني سألته وهو وصل هنا الساعة كام؟
فرد عليا الشخص اللي كنت بكلمه في الأول واللى عرفت ان هو الاستاذ عادل وقال
=هو جيه هنا علي المغربية كده، وبعد ما قال ان الحجة توفت فضل معانا لحد ما خلصنا كل الاجراءات
_ لا فيه الخير
....
مش عارف ليه مكنتش مطمن للاستاذ عادل ده، المهم اخدت معتز ومشيت ورجعنا تانى علي قسم مصر الجديدة
وتاني يوم كنت مستني الأستاذ عادل يجي عشان نكمل التحقيق، لكن وانا قاعد وسرحان سمعت صوت خبط علي باب المكتب ودخل العسكري وقال: في واحد عاوز يقابل سيادتك يا فندم
واللي جيه في بالي ان ده عادل وعشان كده اذنت ليه بالدخول، لكن اللي دخل واحد في السبعينات من عمره وباين عليه التعب، قولتله اتفضل أقعد يا حج
فاتكلم وقال
_أنا جاي وعندي كلمتين في موضوع الدكتور عاصم
=الدكتور عاصم الخضيري؟
_ايوة منا اللي اديت رقمه للاستاذ توفيق لما عرفت ان والدتهم تعبانة
=وتعرف اي؟
_أنا أصلا جار الحجة صفاء من زمان، وهي كانت ست صعبة في كل حاجه ودايما في مشاكل مع الخلق وخصوصا ولادها
ده غير جوزها اللي أختفي زمان ومحدش عارف هو راح فين؟
ويوم ما جيه الدكتور عاصم أنا سمعته بيزعق مع الأستاذ عادل والأستاذ توفيق وكان بيقول أنا لازم أبلغ الشرطة، ولكن بعدها الدنيا هديت وعلي الساعة 11 لقينا بنت الحجة صفاء بتصرخ وبتقول أمي ماتت، والدكتور خارج وركب العربية بسرعه ومشي
...
الكلام كان مهم وفي اللحظة دي خبط باب المكتب واللى دخل كان عادل وأول ما شاف الراجل بان عليه التوتر وقال..
_ إزيك يا عم عمران، إيه اللي جابك هنا؟ معاك مشكلة ولا إيه؟
بصيت لعادل وقلتله
_ إنت تعرف الأستاذ يا عادل؟
= آه طبعًا أعرفه، ده جاري في البلد
_ طيب عظيم جدًا، الأستاذ عمران كان جاي يدلي بأقواله في قضية اختفاء الدكتور عاصم الخضيري واللي آخر مرة اتشاف كان عندك في البيت
= ما أنا جاوبت حضرتك في العزا، وحكيت اللي حصل
_ بس كلام الأستاذ عمران مختلف شوية عن كلامك، وعلى فكرة أنا كنت لسه هعملك استدعاء إنت وإخواتك، بس كويس إنك جيت برجليك، ده أنا شكيت إنك مش هتيجي يا راجل
= كلام إيه ده يا باشا؟ إنت قلت إيه يا عم عمران؟
_ خليك معايا أنا وسيبك من الأستاذ عمران، إنت قلت إن الدكتور عاصم جه فعلًا عندكم، ولما كشف على الوالدة قال إنها ماتت، وبعد كده قعد معاكم للساعة 11 بالليل عشان يخلصلكم الإجراءات ويقف معاكم يعني، وبعد كده مشي، مظبوط؟
= أيوه يا فندم مظبوط
_ لكن كلام الأستاذ عمران مختلف عن كلامك، هو قال إن أخت حضرتك صرخت في حدود الساعة 11 وقالت إن والدتها ماتت، وبعد كده نزل الدكتور عاصم وركب عربيته واتحرك بسرعة، بجانب إن الأستاذ عمران سمع خناقة دايرة، وكان أطرافها حضرتك والأستاذ توفيق أخوك والدكتور عاصم، واللي كان بيقول إنه هيبلغ الشرطة، ردك إيه على الكلام ده يا أستاذ عادل؟
= الكلام ده محصلش يا فندم، والراجل ده بيكدب
_ عمومًا إحنا هنعمل استدعاء لإخواتك توفيق وولاء، وهيتم استجوابهم، وهنشوف يا أستاذ عادل هل كلامك صح ولا كلام الأستاذ عمران هو اللي صح
...
بعدها سمحت للأستاذ عمران إنه يروح، وفعلاً طلع أمر ضبط وإحضار لتوفيق وولاء لبدء التحقيق معاهم، وفي خلال ساعتين كانوا حاضرين قدامنا هما كمان
...
وبدأ التحقيق، والبداية كانت مع توفيق الأخ الأكبر
_ أستاذ توفيق حضرتك عارف إنت هنا ليه؟
= في الحقيقة لا يا فندم
_ إنت هنا بسبب اختفاء الدكتور عاصم الخضيري، الدكتور اللي كشف على والدتك وأكد على وفاتها وبعد كده اختفى ومرجعش بيته
سألنا أخوك عادل وأدلى بأقواله في الموضوع ده
= الدكتور عاصم جه فعلًا عندنا وكشف على الوالدة، لكنها كانت اتوفت وفضل معانا لحد الساعة 11 بالليل وبعدها مشي
_ أمم.. طيب تعرف واحد اسمه الأستاذ عمران؟
= الأستاذ عمران ده جارنا يا فندم.. وهو أصلًا اللي دلنا على الدكتور عاصم وإدانا رقمه
_ عظيم، أهو الأستاذ عمران ده قال أقوال تانية خالص في المحضر
= مش فاهم يا فندم قال إيه يعني؟
_ قال إن على الساعة 11 أختك ولاء صرخت وكانت بتقول إن أمها ماتت وبعدها نزل الدكتور عاصم وركب عربيته ومشي بسرعة، وده معناه إن والدتك اتوفت الساعة 11، وإنت وعادل بتقولوا إنه قعد معاكم لحد الساعة 11، فيا إما إنتوا بتكذبوا يا إما هو بيكذب
= لا يا فندم أنا حكيت اللي حصل
_ وهو كمان قال إنه سمعكم وإنتوا بتتخانقوا مع الدكتور عاصم وكان بيقول إنه هيبلغ الشرطة
= أنا أول مرة أسمع الكلام ده يا فندم
_ يعني معنى كلامك إن الأستاذ عمران بيكدب، مش كده؟
= والله يا فندم اللي تشوفه
_ طيب معلش استحملني في السؤال اللي جاي، هو والدك متغيب من زمان؟
= آه بقاله زمان، خرج في يوم على أكل عيشه ومرجعش.. ووقتها والدتي الله يرحمها عملت محضر تغيب بس للأسف محدش عرف عنه حاجة
_ طيب يا أستاذ توفيق استنى بره شوية
...
ودخلت ولاء واللي كان باين عليها توتر واضح وبدأت الكلام معاها وقلت
_ اسمك ولاء مش كده؟
= أيوه يا فندم
_ مالك كده متوترة ليه يا ولاء؟
= لا يا فندم أبدًا مش متوترة ولا حاجة
_ أنا هسألك سؤالين ولو كنتي دوغري معايا هخليكي تروحي
= بجد يا فندم؟
_ آه طبعًا بجد، بس خليكي صريحة معايا
= حاضر يا فندم أنا تحت أمرك
_ هو الدكتور عاصم الخضيري وصل عندكم الساعة كام يوم وفاة والدتك؟
= مش عارفة كانت الساعة كام.. بس كانت على المغربية كده
_ ولما وصل والدتك كانت لسه عايشة ولا توفت؟
= هو دخل وكشف عليها وقال إنها توفت
_ يعني معنى كده إنك عرفتي الخبر بعد دخول الدكتور الأوضة بتقريبًا ربع ساعة مثلًا؟
= آه يا فندم في الحدود دي
_ غريبة يا ولاء، أصل في شاهد بيقول إنك صرختي الساعة 11 بالليل وقلتي إن والدتك ماتت
= لا يا فندم محصلش، أنا عرفت الخبر على طول، والدكتور قعد معانا للساعة 11 بالليل ووقف معانا وبعدها مشي
_ بس الشاهد بيقول إن إخواتك اتخانقوا مع الدكتور عاصم واللي كان عاوز يبلغ الشرطة
...
لما خلصت كلامي سكتت ولاء وبان عليها توتر مش طبيعي، قبل ما تتكلم وتقول بنبرة صوت مهزوزة
= محصلش
_ طيب معلش في سؤال كده واستحمليني فيه، والدك متغيب من إمتى عن البيت؟
= من زمان، كنا صغيرين لما نزل راح شغله ومرجعش
_ طيب ومعاملة والدتك ليكم كانت عاملة إزاي؟
= معاملة عادية يا فندم زي أي أم وعيالها
_ بس أنا المعلومات اللي عندي مش بتقول كده.. المعلومات اللي عندي بتقول إنكم دايمًا كنتوا في خلاف مع والدتكم، والكلام ده من زمان، وإنها كانت دايمًا بتعنّفكم وبتضربكم
= لا يا فندم، الكلام ده مش صح
_ طيب بصّي، أنا عارف كل حاجة حصلت، أنا بس كنت بشوفك هتقولي إيه، وواضح كده إنك مش عايزة تعترفي، أنا عندي شهود وأدلّة إنكم ورا اختفاء الدكتور عاصم الخُضيري، وعشان كده بقولك ريّحي نفسك
واحكي اللي حصل، ولو اعترفتي أنا هاعتبرك شاهد ملك في القضية
= يعني لو قلت الحقيقة، هتخليني أروح؟
_ هخليكي تروحي، بس احكي
= كلنا لاحظنا إن أمي تعبت الفترة الأخيرة، وعشان إحنا ساكنين بعيد عن المستشفيات، كان الموضوع بالنسبة لنا صعب.. وعشان كده الأستاذ عمران جارنا دلّنا على الدكتور عاصم، وقال إنه بييجي من آخر الدنيا عشان يعالج أي حالة تعبانة، وإنه دكتور محترم وجدع، ويومها أمي كانت تعبانة أوي
واتصلنا بيه، والراجل ما كدبش خبر.. وبعد ساعة وربع تحديدًا وصل عندنا ودخل عشان يكشف على أمي.. ووقتها سمعت الحوار ده داير
...
...
_ ها يا دكتور، خير؟
= الحجة صفاء متوفّية من ساعة، بس أنا شاكك إن الوفاة مش طبيعية
_ مش طبيعية إزاي يعني؟
= لا والله، دي حاجة أنا معرفهاش.. أنا هبلّغ الشرطة، وهي بقى تتصرف بمعرفتها، بس الجثة دي لازم تتشرح عشان نعرف سبب الوفاة
_ شرطة إيه وتشريح إيه؟!.. ده لا يمكن يحصل أبدًا
= وهو إنت خايف ليه؟.. أنا بقولك والدتك مش ميّتة موتة طبيعية، ولازم تتشرح عشان نعرف سبب الوفاة، ولا إنت عارف سبب الوفاة؟
_ قصدك إيه يا دكتور؟
= لا قصدي ولا حاجة، بس أنا لازم أبلّغ الشرطة
_ استنى بس يا دكتور، شرطة إيه؟.. ما إحنا نتفق وتاخد اللي فيه النصيب وتتكل على الله
= نتفق على إيه يا مجنون إنت؟.. وسّع كده من سكتي، أنا دلوقتي اتأكدت إن الموضوع مش وفاة طبيعية
...
الصوت كان عالي، وتوفيق وعادل كانوا خايفين الناس تسمع الصوت، لحد لما الصوت سكت مرة واحدة، وقتها أنا قررت أدخل عشان أشوف في إيه، وإيه اللي أنا سمعته ده، لكن لما دخلت كانت اتصدمت
...
الدكتور عاصم كان واقع على الأرض وقاطع النفس تماماً.. وقتها توفيق وعادل شالوا الدكتور ودخلوا بيه في أوضه تانية وكلنا كنا عمالين نفكر هنتصرف إزاي؟
وقتها عادل وتوفيق حفروا في الأوضه ودفنوه بعد ما أخدوا لبس الدكتور، وقتها لبس توفيق اللبس ونزل من البيت متأخر كانت الساعة 11 والشارع كان ضلمة.. واتحرك بالعربية على أساس إن هو الدكتور عاصم وبعد بيها تماماً عن البلد وفي الوقت ده أنا فتحت الشباك وصرخت وكنت بقول أمي ماتت، وبعد شوية رجع توفيق على البيت وبس.
هو ده اللي حصل
_ طيب وليه توفيق وعادل، كانوا خايفين من تشريح الجثة، هي والدتك مش ميتة موتة طبيعية؟
_ أصل، أصل...
= أصل إيه ما تنطقي
_ هي تستاهل الموت، تستاهل كل اللي حصل فيها
= معنى كلامك إنها اتقتلت هي كمان مش كده؟
_ آه.. ما الجزاء من جنس العمل يا باشا.. اتقتلت زي ما قتلت أبويا زمان
= لا ده الموضوع كبير.. نهدى كده واحكيلي كل حاجة من الأول
_ حاضر يا باشا.. هحكي..
_ حاضر يا باشا.. تحب أحكيلك من إمتى؟
= من الأول خالص، عاوز أسمع كل حاجة وبالتفصيل
_ فتحت عينيّا على الدنيا.. لقيت نفسي أصغر واحدة في إخواتي، والاتنين رجالة.. كنا عايشين في نفس البيت بس كان عايش معانا بابا الحاج رشدي.. كان راجل على باب الله.. محبوب من الكل بس للأسف كان في عيب حاجة مش حلوة.. شخصيته كانت ضعيفة جوه البيت، وتقدر تقول يا باشا إن اللي جوه البيوت في بلدنا مش بيستخبى
والبلد كلها كانت عارفة، إن رشدي بيسمع كلام مراته في كل حاجة
بس إن الواحد يسمع كلام مراته حاجة، وإن الواحد يتهان من مراته دي حاجة تانية
أمي كانت بتهين أبويا وبتهينّا كلنا، كانت شخصيتها قوية محدش كان بيعرف يقف قدامها
وفي يوم رجع أبويا من الشغل وكان مهدود، وأي راجل بيرجع من شغله على بيته بيكون مستني.. لقمة حلوة، كلمة تهوّن عليه تعب اليوم، حاجة تحسّسه إنه بيتعب عشان خاطر البيت
لكن أمي مكنتش تفهم حاجة عن الكلام ده، وكل ما أبويا كان بيرجع البيت.. كانت بتسمّعه كلام مكنتش عارفة كان بيستحمله إزاي؟
لكن في اليوم ده.. رجع أبويا وكان باين عليه الضيق وده عشان سمع كلام من الجيران حسّسه إنه مش راجل
ورغم إني كنت صغيرة يومها، إلا إني فاكرة اليوم بتفاصيله، أبويا دخل البيت لقى أمي كالعادة نازلة فينا ضرب ولسع بالنار، واللي كان بيعترض كانت بتزوّد الضربة أكتر فيه
وقتها اتكلم وقال
_ ما كفاية بقى، إنتي إيه مش هتتهدي، عملولك إيه العيال دول عشان تضربيهم بالشكل ده، وعملتلك إيه أنا عشان تخلي اللي رايح واللي جاي يتريق عليّا ويقول إني مش راجل وإني مش عارف أحكم بيتي، لو كنتِ فاكرة إن سكوتي عليكي ضعف تبقي غلطانة أنا سايبك بس تجيبي آخرك وبعدها هوريكي وش عمرك ما هتشوفيه في حياتك
= إنت بتكلمني أنا يا رشدي؟!.. إنت من إمتى بتكلمني كده أصلًا، إنت شكلك اتجننت
_ أنا فعلًا اتجننت لما فكّرت أتجوز واحدة زيك، واحدة ظالمة مش عارفة ربنا، ده أنا من ساعة ما اتجوزتك ما شفتكيش مرة ركعتيها
= حوش اللي مقطع الجوامع حوش، ما بقاش غيرك إنت يا نجس اللي تتكلم معايا الكلام ده
...
أبويا ما قدرش يستحمل كلامها، ولأول مرة في حياته يضربها بالقلم.. كانت صدمة ليها ولينا إحنا، عشان ما حدش فينا كان متصور إن بابا ممكن ياخد قرار زي ده
قرار دفع بسببه حياته، عشان بمجرد ما بابا سبها ومشي، مسكت سكينة كانت على الترابيزة وضربته بيها في ضهره، مكنش مصدق نفسه من الصدمة لكنها كمّلت عليه.. وإحنا من الصدمة اتخرسنا، وقتها قامت وهددتنا بالسكينة إن لو حد فينا اتكلم هتعمل فيه نفس اللي اتعمل في أبويا، كلنا كنا مرعوبين منها وعشان كده سكتنا
بس هي عملت الأصعب، قطعت جثة أبويا قدام عنينا واستنّت لما الليل ليل وطلعت دفنتها بره في المقابر، ورجعت وكان مفيش حاجة حصلت
شفت جبروت أكتر من كده
وكبرنا وإحنا عارفين السر، لحد ما الست اللي فيها جبروت الدنيا كله بدأت تتعب وحيلها يتهد، بس كانت دايمًا بتعامل توفيق أحسن واحد فينا، كانت بتقول عليه الابن البِكر.. أما أنا وعادل فكانت بتعاملنا وحش، ولما كبرنا شوية توفيق وعادل بدأوا يشتغلوا، ولقيتها بتقولي:
_ وإنتي هتفضلي قعدالي في البيت كده؟
= يعني هعمل إيه يا ماما؟ هروح فين؟
_ تشوفي شغلانة، كل واحد هنا بيعيش بلقمته.
...
كنت عارفة إنها بتتكلم جد، عمرها ما هزرِت ولا عرفت يعني إيه هزار مع عيالها.. وعشان كده دورت على شغل، لحد لما لقيت شغل في صيدلية
واشتغلت فيها وقلت أهو أحسن من غيرها، ويمكن القعدة في الصيدلية كانت أحسن من القعدة في البيت.
لحد ما قرر توفيق يجمعنا عشان يتكلم معانا في موضوع مهم
_ أنا جمعتكم النهارده، عشان أبلغكم إننا لازم نبيع البيت.. خلينا نجيب من الآخر، ما حدش فينا حابب العيشة مع التاني، ولا حد حابب العيشة مع أمكم دي، أنا فتحت معاها الموضوع ورفضت، بس هي ترفض براحتها، هي ست خلاص كبرت ومابقتش زي الأول يعني نقدر نعمل اللي إحنا عاوزينه غصب عنها.
رد عادل عليه وقال:
= وده إزاي إن شاء الله؟ هو إنت مش عارف إن أبوك زمان كتب البيت باسمها؟ يعني عشان نقدر نبيع البيت لازم هي توافق.. وأكيد يعني مهما عملت مش هنمد إيدينا عليها عشان توافق.
رد توفيق وقال:
_ ما هو أنا مش هقعد، شغال طول عمري زي تور في ساقية، أنا بني آدم ومن حقي أعيش العيشة اللي أنا عاوزها، كفاية العمر اللي ضاع مع واحدة قتلت أبونا وعيشتنا في رعب السنين اللي فاتت.
رد عادل وقال:
= برضه هنعمل إيه مش فاهم؟
وقتها رد توفيق رد خلانا نِبلَم:
_ صفاء دي لازم تموت، كفاية عليها كده.. في حد معترض فيكم على موتها؟
...
ما حدش فينا رد، عشان ما حدش فينا كان بيحبها.. هي آه أمنا بس على الورق، لكن طيبة وحنية بتاعت الأمهات ماتلاقيش.
وقتها فضلنا نفكر نموتها إزاي؟.. عاوزين طريقة ما تبانش، والوقت عدى وإحنا بنفكر هنعمل إيه؟
لحد ما في يوم جات الصيدلية واحدة صاحبتي أعرفها من زمان، واللي أعرفه إنها شغالة في معمل تحاليل خاص بمواد كيميائية، وقعدت معايا وكانت بتحكيلي على شغلها وعلى ظروفها الصعبة، وإنها اشتغلت عشان محتاجة فلوس، وفي وسط الكلام وهي بتحكي عن شغلها، جت سيرة سم اسمه سم الزرنيخ.. وعرفت إنه من أخطر أنواع السموم ومش بيتكشف بسهولة.
وقتها عرضت على إخواتي الفكرة، وعرفتهم إن صاحبتي دي ما يفرقش معاها غير الفلوس، في الأول هي اعترضت، بس لما شافت الفلوس اللي اتصرف فيها إخواتي وافقت.
وجابت لينا فعلاً سم الزرنيخ، وعرفتنا بيستخدم إزاي.. كنت بحط السم ده في الأكل والشرب بتوعها، والمميز في السم ده إنه ما كانش ليه طعم ولا ريحة.
وعرفت إنه هيموتها بالبطيء، بس كان لازم نحبكها صح، وده بعد ما توفيق غلط وزعق مع أمي في يوم وهددها بالقتل، وللأسف البلد كلها سمعته، خُفنا لو ماتت الناس تشك في موتها والكلام يكتر.
وعشان كده يوم ما ماتت، جبنا الدكتور عاصم عشان يأكد على وفاتها الطبيعية وندفنها ونخلص، لكن للأسف الدكتور عاصم اكتشف الملعوب وكان تمن ده حياته.
...
خلصت ولاء كلامها وأنا في حالة صدمة، ومش فاهم ولا عارف إيه الجحود ده، سواء من الأم أو من عيالها.
طلع أمر من النيابة، باستخراج الجثة من القبر وتشريحها.. وفعلاً اتأكدنا إن جسمها فيه آثار لسم الزرنيخ، واستخرجنا جثة الدكتور عاصم الخضيري من بيت صفاء، واللي كانت صعبانة عليا هي مراته اللي دخلت في غيبوبة أول ما شافت جثته.
القضية كبرت وبقت قضية رأي عام، في اللي كان بيطالب ببراءة الأولاد دول من تهمة قتل الأم وإعدامهم لقتل الدكتور،
وفي ناس شايفة إنها مهما عملت فهي أم وما كانش ينفع إنها تتقتل، ولازم الأولاد دول يتعدموا.
...
ويوم النطق بالحكم، أصريت أحضر بنفسي وأشوف إيه اللي هيحصل، لحد ما القاضي اتكلم وقال:
: القضية التي أمامنا اليوم، هي من أبشع القضايا التي مرت عليّ بتاريخي، قضية قسوة أم حرمت أبناءها من كل شيء بالحياة، وزرعت فيهم الكره والغل والحقد، وكانت معاملتها غير آدمية.
ولكن في النهاية هذه روح ذهبت بأيدي الجناة، ودفع ثمن اكتشاف جريمتهم شخص يؤدي عمله على أكمل وجه، فكان هو الضحية الثانية.
لذا
حكمت المحكمة وبإجماع الآراء على كل من توفيق رشدي السيد، عادل رشدي السيد، ولاء رشدي السيد بإحالة أوراقهم إلى فضيلة المفتي.
رُفعت الجلسة.
...
القاضي نطق بحكم العدل، مهما حصل من الأم ما كانش ينفع تموت على إيد عيالها، ولكن في النهاية ماتت الأم على إيد عيالها، ومات الدكتور اللي أفنى حياته في خدمة المرضى.
...
تمت
2
-2
