سفاح مهووس

الانتقام مش هو الوسيلة اللي هتحقق العدل.. الانتقام اعمي لدرجة أنك عشان تنتقم من شخص تضيع معاه ناس كتير ملهاش ذنب ..وممكن موقف واحد يكون سبب في تغيير حياتنا للاسوء، وخصوصا المواقف اللي بتحصل قدامنا في سن الادراك، قد اي موقف صعب مريت بيه وانت صغير قادر انه يحولك لوحش مش قادر يسيطر علي نفسه وبيرتكب أخطاء شنيعة في حق كل اللي حواليه

....

-علاء بيه الف مبروك على الترقية الجديدة

=الله يبارك فيك يا أيمن وعقبالك كده لما تعلق دبورة وتبقي مقدم ان شاء الله

=ان شاء الله يا فندم

-حضرتك اتبلغت بالترقية امتي ؟

=امبارح بالليل

-يعني قطعت الاجازة ؟

=اه بصراحة الترقية الجديدة فتحت نفسي على الشغل

-دايمًا يا باشا

...

اهو تليفون المكتب رن شكل فتحة النفس جات في وقتها

-الو

=ايوة يا فندم مع حضرتك سامح جتلنا اشارة في حي المعادي

-طيب يا سامح جهز القوة عشان نتحرك

.....

-زي ما قولتلك يلا بينا عشان في اشارة جاية من المعادي

اتحركت ومعايا الرائد ايمن لمكان الاشارة.. الحادثة كانت في عمارة كبيرة ف المعادي، الجيران متجمعة قدام شقة في الدور الاول بابها مكسور، دخلت الشقة ومن النظرة الأولى كده كنت شايف كل حاجة في مكانها ..الشقة مترتبة جدا وعلى الأرض جثة لشاب في العشرينات قاطع شرايينه والسكينة واقعه جنبه على الارض.. نزلت على الارض جنب الجثة عشان المح عليها أي نوع من انواع المقاومة، ولكن الشكل الظاهري مكنش موضح اي حاجة، عمومًا الطب الشرعى والمعمل الجنائي هما اللي هيقولوا كلمتهم في النهاية، قومت من مكاني وقربت من الجيران اللي كانوا لسه واقفين على الباب وسألتهم

-هو الباب ده كان مكسور كده ؟

رد عليا حارس العمارة وقال :

=لا يبه انا والاستاذ معتز كسرنا الباب عشان الاستاذ شريف مكنش بيرد لما خبطنا عليه.

-مين الأستاذ معتز ؟

=والد الأستاذ شريف الله يرحمه.

....

مديت ايدي ناحية الاستاذ معتز وسلمت عليه لكنه كان في حالة انهيار بسبب اللي حصل لابنه، في الوقت ده وصل فريق من الطب الشرعي والمعمل الجنائي عشان يشوفوا شغلهم، أما انا فطلبت من أيمن يجبلي حارس العمارة ووالد المتوفي لاستكمال التحقيق في مكتبي

خرجت من الشقة واتوجهت لمكتبي عشان أبدأ التحقيقات، واللي كانت بدايتها مع والد المتوفي الاستاذ معتز، وساعتها بدأت كلامي معاه وقولت:

-استاذ معتز البقاء لله

=سبحان من له الدوام

-معلش انا عارف ان الوقت مش مناسب للاستجواب، بس صدقني ده لازم يتم عشان نعرف لو كان في شبهة جنائية في الموضوع ولا لا .

=انا تحت امرك يا باشا

-ابنك كان ليه أي عداوات مع حد ؟

=لا ابني كان في حالهُ ومش بتاع مشاكل

-طيب لاحظت عليه حاجة في الفترة الاخيرة، يعني كان متعصب او مضايق من حاجة ؟

=من يوم ما خطيبته سابته وهو متغير وكان معظم الوقت بيروح يقعد في شقة المعادي.. كان بيقولي عاوز اقعد لوحدي

-طيب تفتكر يكون انتحر ؟

=لا لا.. شريف كان متدين ويعرف ربنا كويس وماظنش انه يكون أنهى حياته بالشكل ده

-طيب يا استاذ معتز تقدر تتفضل بس ممكن نستدعي حضرتك تاني

=انا تحت امركم يا فندم.

...

خرج الاستاذ معتز من المكتب ودخل حارس العمارة ضاحي وبدات التحقيق معاه

-اسمك ضاحي مش كده ؟

= ايوة يا بيه

-طيب يا ضاحي مين كان بيتردد على الشقة دي غير الاستاذ شريف ؟

=مفيش حد غير الاستاذ شريف والاستاذ معتز ابوه.

-يعني مفيش مثلا حد من اصحاب شريف جاله قبل كده او شريف طلب اكل من بره وجاله دليفري

=لا يا بيه.. الشقة دي اصلا بتاعة اهل الاستاذ شريف وكان المرحوم هيتجوز فيها بس محصلش نصيب وبعدها بقي يجي يقعد فيها مع نفسه يومين ويمشي

-تمام يا ضاحي تقدر تروح بس ممكن نستدعيك تاني لو عوزناك

...

خرج ضاحي من المكتب وبعدها بدقايق دخل ايمن وفي ايده ملف التحريات الخاص بشريف، حطها قدامي وقال:

_ فريق البحث الجنائي خلص التحريات عن شريف معتز وده الملف.

= ايه ده بالسرعة دي قدر يخلصه

_ اصل المعلومات عن شريف مش كتير، محمود شخص في حاله ملهوش اعداء ولا خصومه مع حد، متخرج من كليه علوم وكان خاطب بس لسبب ما الخطوبه مكملتش.. بعدها دخل في حالة اكتئاب وبس على كده مفيش حاجه جديده.

= يعني كل حاجه بتأكد ان شريف انتحر مش كده؟

_ بالظبط كده يا فندم

= عموما احنا هنستنى تقرير الطب الشرعي والمعمل الجنائي وهنعرف اذا كان فيه بصمات ف مسرح الجريمة ولا لا

...

خلصت شغل يومها ونزلت من مكتبي، ركبت واتحركت على البيت وانا لسه بفكر في القضيه، كان جوايا احساس ان الموضوع فيه شبهة جنائية، وان تقرير الطب الشرعي هيقلب كل الموازين في القضيه دي وهيحول الموضوع من انتحار لجريمة قتل وده مجرد توقع واحساس

وصلت البيت كان الوقت متأخّر رميت جسمي على السرير ونمت ومحسيتش بنفسي غير لما تليفوني رن، واللي كان بيتصل هو ايمن :

_ الو ايوه يا ايمن

= هو حضرتك مش جاي الشغل النهارده يا فندم؟

_ ليه هي الساعه كام؟

= الساعه 10 الصبح.

_ طيب يا ايمن، انا جاي دلوقتي.. هو فيه جديد؟

= انا كلمت الناس في الطب الشرعي وقالوا ساعه كده وهيبعتوا التقرير

_ تمام يا ايمن الله ينور

..

قفلت مع ايمن ودخلت اخدت دش ولبست، بعدها نزلت من البيت وركبت عربيتي واتحركت على المكتب، اول ما وصلت قابلت عم موسى بتاع البوفيه اقدم واحد في المديريه كلها، وبعد السلامات طلبت منه فنجان قهوه مظبوط عشان لسه صاحي

وبعدها دخلت المكتب ومفيش دقيقه ولقيت ايمن داخل عليا المكتب وفي ايده تقرير الطب الشرعي وتقرير المعمل الجنائي والبصمات، حطهم على المكتب وقال:

_ لسه واصلين حالا يا فندم

= تمام يا ايمن اقعد عشان نشوف التقارير دي بتقول ايه

...

فتحت تقرير الطب الشرعي وبعد ما قريت بصيت لايمن وقولتله

_ التقرير بيقول انه مفيش اي اصابات ظاهريه على الجثه، لون الجلد كان شاحب بسبب نزيف الدم، ومفيش غير القطع اللي في الشرايين واللي متجه بشكل عرضي وده معناه ان شريف انتحر، وبالنسبه لتحليل السموم بيقول ان ما فيش اي حاجه في جسمه، اما تقرير معمل الجنائي والبصمات ف بيتفق تماما مع تقارير الطب الشرعي، والبصمات اللي موجوده في موقع الحادث هي بصمات المتوفي بس وموجوده على السلاح المستخدم في الانتحار، والدم اللي على السكينه مطابق لدم المتوفيومفيش اي اثار لمقاومه او عنف، معنى الكلام ده ان القضيه كده انتحار؟

رد عليا ايمن وقال

= خلاص يا فندم كده هنقفل القضيه على انها انتحار

_ رغم اني مش مرتاح يا ايمن وحاسس ان في حاجه غلط، بس احنا بيحكمنا ورق.. قفل ملف القضيه على كده.

...

قام ايمن وخرج من المكتب، وانا قعدت اشرب فنجان القهوه لكن في اللحظه دي تليفون المكتب رن، رديت وكان المتصل الملازم اول سامح:

_ الو ايوه يا سامح خير؟

= اشاره يا فندم، في اشاره جديده جايه من مصر الجديده

_ تمام يا سامح جاهز القوة واحنا جايين فورا

..

قفلت مع سامح واتصلت بايمن عشان يجهز ونتحرك، سامح كان بعتلي اللوكيشن على الواتس

وفعلا اتحركنا.. لما وصلنا لقينا لمة كبيره قوي تحت العماره وانا بطبعي بكره الزحمه، واللي زاد وغطى اني لقيت صحافيين كتير مكنتش عارف مين بلغهم ووصلوا امتى؟

طلبت من ايمن يفض اللمة دي عشان نعرف نشوف شغلنا، وفعلا اتحرك وبدأ يطلب من الناس تمشي، ولما قربت شوفت جثة لبنت في العشرينات واقعة على الارض وراسها متهشمه تماماً وحواليها بركه دم كبير، كان واضح انها رمت نفسها من فوق، وقتها لقيت واحده جايه علينا وهي تصرخ وبتقول:

- يا حبيبتي يا بنتي

طلبت منها تهدى وسالتها انتي مين؟

= انا امها.. شهد راحت، ضنايا ماتت خلاص

_ شدي حيلك، البقاء لله

ومع كلامنا وصل فريق الطب الشرعي والمعمل الجنائي، وايمن اخد والدة شهد بعيد عن الجثة عشان الناس تشوف شغلها، ولكن والدتها ما قدرتش تستحمل المنظر وفقدت وعيها واتنقلت على المستشفى

بعد ما فريق الطب الشرعي والمعمل الجنائي خلصوا شغلهم، اتنقلت الجثة على المشرحة وانا رجعت على مكتبي، وهناك طلبت من ايمن تحريات سريعة عن البنت دي عشان نعرف ايه قصتها هي كمان

لكن وانا قاعد الامين خبط على الباب وقال فيه واحد عاوز يقابلك يا فندم

= مين ده؟... خليه يتفضل

دخل واحد من الباب كبير في السن يعني اقدر اقول في الخمسينات، لابس قميص وبنطلون قرب من المكتب وقال:

_ انا صاحب السوبر ماركت اللي قدام العماره على طول، وجاي اشهد باللي حصل عشان والد (شهد) الله يرحمه ويرحمها كان صديقي

= طيب اسم حضرتك ايه الاول؟

_ انا عمران حسنين، وسني 55 سنة

= طيب يا عم عمران احكي اللي عندك

_ انا شوفت شهد وهي طالعه العماره، كانت طالعه لوحدها، بس كان باين عليها التوتر، بس ده وضع طبيعي والد شهد لسه متوفي ملهوش شهر وهو كان قريب منها جداً، وموته عملها ازمه نفسيه، المهم اني ندهت عليها لكن هي ما ردتش عليا وطلعت على طول، مفيش خمس دقايق ولقيتها اترزعت قدامي على الارض، وقتها جسمي اترعش وخرجت من المحل بسرعه وبصيت لفوق من مكان ما وقعت، لكن مكنش فيه حد، واضح ان شهد انتحرت يافندم.

= تمام يا عم عمران، عموما تقدر دلوقتي تروح ولو عوزناك هنستدعيك

_ تمام يا باشا تحت امركم

...

خرج عمران من المكتب، وانا فضلت قاعد في المكتب شويه وسألت نفسي سؤال، هل فيه علاقه بين انتحار شريف وبين موت البنت دي واللي شكلها انتحرت هي كمان، ولا الموضوع صدفه؟ مكنش عندي اجابة ومن كتر التفكير دماغي تقلت ونمت على المكتب، صحيت على صوت ايمن بيقولي:

_ علاء بيه لو حضرتك تعبان روح، ونكمل بكره.

= انا مش عارف انا نمت ازاي؟.. فريق البحث الجنائي خلص التحريات ولا لسه؟

= ايوه يا باشا.. اتفضل سيادتك

...

فتحت ملف التحريات وقريته

اسمها شهد مصطفى عندها 26 سنه، والدها لسه متوفي من شهر، ناس في حالهم ما لهمش مشاكل مع حد، البنت كانت متعلقه بابوها جداً وعشان كده اتاثرت نفسيا بوفاته، معندهاش عدوات او مشاكل مع حد، كده بجانب شهاده عمران صاحب السوبر ماركت اللي اكد ان البنت طلعت العماره لوحدها نقدر نقول انها انتحرت، لكن هنستنى تقرير الطب الشرعي والمعمل الجنائي كالعاده عشان نعرف في شبهة جنائية ولا لا، اه صحيح أخبار والدتها إىه؟

=للاسف اتصابت بصدمة عصبية حادة، وموضوع استجوابها دلوقتي شبه مستحيل

_ربنا يكون فى عونها

_طيب يا باشا روح انت عشان شكلك تعبان وانا هتابع وصول التقارير

=تمام يا إيمن، لما توصل ابقي رن عليا وبلغني باللي فيها

_تمام يا باشا

...

خرجت من المكتب مرهق وتعبان جداً، ركبت العربيه واتحركت علي البيت وما صدقت وصلت كنت هموت وانام.. وحتي من غير ما اغير هدومي رميت جسمي علي السرير ونمت

محستش بنفسي كأن بقالي سنة منمتش، صحيت على صوت رنة تليفوني واللي كان بيتصل هو إيمن :

_الو ايوة يا إيمن خير؟

=التقارير جاهزة يا باشا

_اي اللي في التقارير في حاجه جديده ولا المتوقع؟

=المتوقع يا فندم، تقرير الطب الشرعي حدد ان الاصابات في الرأس وكسور في الايدين والرجلين.. وانها مكنتش بتتعاطي اي مخدر او كحول، وتقرير السموم سليم تماماً، لما راجعنا الكاميرات حوالين البيت بقينا أن شهد طلعت العمارة لوحدها فعلا وتقرير المعمل الجنائي والبصمات.. أكد ان السقوط اللي حصل سقوط ارادي وده باين من البصمات ومكان السقوط

-يعني شهد هي كمان انتحرت؟

_ده المتوقع يا إيمن.. بس أنا حاسس ان في علاقة بين القضية دي والقضية اللي فاتت

=وارد يا فندم، بس ممكن برضو تكون مجرد صدفة مش أكتر

_مش عارف يا آيمن، المهم قفل ملف القضيه دي على انها انتحار، واعملي النهارده أجازة أنا عايز أرتاح .

=حضرتك كويس يا باشا؟

_الحمدلله كويس، بس محتاج ارتاح شويه

=تمام يا باشا تحت امرك

.....

حاولت اريح نفسي لكن ما فيش ساعه ولقيت اتصال جديد من ايمن

رديت عليه

_ الو خير يا ايمن في حاجه ولا ايه؟

= بلاغ جديد يا باشا في حي السيده زينب

_ طيب يا ايمن انا جاي دلوقتي على طول

..

قفلت مع ايمن ولبست واتحركت على طول على اللوكيشن اللي بعتهولي على الواتس، لما وصلت هناك كنت قدام بيت من دورين.. دخلت وكان الباب مفتوح وأيمن والقوة اللي معاه وصلوا.. ولما دخلت شوفت جثة لشاب في منتصف العشرينات كان لابس هدوم بيتي، قربت منه ونزلت على الارض وبدات اتفحصه ما فيش اي اثار لضرب او خنق على جسمه، وكان فيه شويه رغاوي بيضة حوالين بُقه وخارج منه ريحه غريبه شويه

قومت من جنبه وقربت من ايمن وسالته:

_ مين اللي بلغ يا ايمن؟

= ابوه اللي بلغ يا فندم

_ هو فين يا ابوه ده؟

= موجود.

..

مشي ايمن وبعدها لقيته جايب راجل في الخمسينات كان بيعيط، طبطبت عليه وسالته:

_ ايه اللي حصل؟

= كنت متعود انا وادهم نصلي الجمعه مع بعض، صحيت من النوم وكنت رايح اوضته عشان اصحيه لكن اتفاجئت بيه واقع في الصاله زي ما انت شايف.

_ البقاء لله

= الدوام لله وحده

_ معلش احنا هنحتاجك معانا شويه عشان ناخد اقوالك.

= حاضر يا باشا انا تحت امركم

...

بعد ما خلصت كلام مع والد ادهم، وصل فريق الطب الشرعي والمعمل الجنائي عشان يشوفوا شغلهم، اما انا فخرجت ورجعت على مكتبي من تاني، وده بعد ما تم نقل الجثه للمشرحة وطبعا طلبت تحريات عن ادهم والمعارف والعدوات وكل حاجه

وما فيش 10 دقايق ولقيت ايمن بيبلغني ان والد ادهم بره، فطلبت منه يدخله، وفعلا الراجل جه وقعد قدامي وهو باين عليه الحزن الشديد:

_ شد حيلك يا استاذ

= الشده على الله.

_ تعرف ايه عن علاقات ادهم ابنك، يعني الاصحاب المعارف، كان ليه مشاكل مع حد او لا؟

= كان عنده صاحب اسمه سليم ما كانوش بيسيبوا بعض الا وقت النوم، لكن مشاكل معرفش،بس اللي اعرفه ان ابني كان في حالهُ ومش بتاع مشاكل

_ صاحب ابنك ده اسمه سليم ايه؟

= اسمه سليم ابو المجد، هو جارنا اصلا وساكن جنبنا.

_ طيب يا حاج تقدر تروح دلوقتي

...

استدعينا سليم ابو المجد عشان ناخد اقواله وحضر قدامنا فعلا

_ سليم انت كنت الصديق المقرب لادهم مش كده؟

= ادهم ما كانش مجرد صديق ده كان اخويا.

_ جميل جداً، تعرف اي بقى عن ادهم.. هل ليه اي عدوات او مشاكل مع حد؟

= لا خالص، بس في الفتره الاخيره ادهم كان تعبان نفسيا بسبب حادثه حصل فيها أنه قتل بالخطا، هو اخد فيها براءه، لكن كان لسه حاسس بالذنب، حاولت كتير ان اخرجه من الحاله اللي كان فيها، لكن هو كان رافض تماماً

_ طيب احكيلي الحادثه دي حصلت ازاي؟

= كان راكب عربيته و سايق بسرعه، بس الشارع كان فاضي وقتها لحد ما وصل لتقاطع، وف اللحظة دي عدى واحد بموتوسيكل وكان وراه طفل صغير، الراجل كان معدي عكس الاتجاه وكان سايق بسرعه جنونيه، وللاسف ادهم معرفش يتفاداه وخبطه، الراجل خرج بكسور والطفل مات، بس الكاميرات اللي في الشارع وضحت انه ادهم مش غلطان والقضية اتقفلت على انها قتل خطأ وادهم خرج منها، بس احساسه بالذنب بانه اتسبب في موت الطفل ما كانش سايبه.

_ تمام، تمام .. فهمتك، عموما انا بشكرك جدا تقدر تتفضل ولو عوزناك هنستدعيك

....

خرج سليم من المكتب، ودخل عليا ايمن وهو في ايده ملف التحريات:

_ ملف التحريات يا باشا

= طيب اقرا المكتوب فيه

_( اسمه ادهم سعيد، 25 سنه، عايش مع والده ووالدته في بيت في حي السيده زينب، خريج معهد خدمه اجتماعيه، له صديق واحد اسمه سليم ابو المجد، ما عندوش مشاكل او اي عداوات مع حد، ولكنه اتحبس جج حج كده في قضية قتل خطا وطلع منها براءة)

= اتصل بالطب الشرعي استعجل التقرير، عاوزين نشوف ادهم ده حد قتله ولا انتحر هو كمان

_ انا فعلا كلمتهم يا باشا قبل ما ادخل لحضرتك، وقالوا ان التقرير على بكره بالليل هيكون موجود معانا

= اللي بيعجبني فيك يا ايمن انك فاهم دماغي وعارف اللي هطلبه منك من قبل ما اطلبه.

_ بنتعلم من سيادتك يا باشا

= طيب انا هروح دلوقتي، ماهو حتى اليوم اللي كنت هاخده أجازة بقى شغل.. يلا أخلص القضيه دي وبعد كده ابقى اخد الاجازة.

_ ربنا يكون في عونك يا باشا

...

خرجت من المكتب ورجعت على البيت، بس المره دي كان عندي يقين ان الموضوع مش صدفة، وأن لو آدهم ده انتحر.. يبقى لازم هندور على الرابط ما بين ال3 قضايا ما هو مستحيل تكون صدفه

مر اليوم وتاني يوم وعلى الساعه 10 بالليل وانا ف مكتبي وصل تقرير الطب الشرعي وتقرير المعمل الجنائي، فتحت تقرير الطب الشرعي وابتديت اقرأ…

 الوفاة ناتجة عن تسمم ناتج عن جرعة زائدة من عقار دوائي، المعده كان فيها بقايا حبوب لونها ابيض، طبعا الكبد والكلى كانوا متاثرين بسمية المادة، كمان ثبت ان العقار ده خاص بالاضطرابات النفسية، وكل المؤشرات بتشير ان المتوفي انتحر بارادته عن طريق تناول كمية كبيره من هذا العقار ده، اما تقرير المعمل الجنائي فكان بيقول ان بعد فحص المضبوطات وتحليل العينات، المعمل الجنائي أكد ان الوضع ف الشقة كان مستقر ومفيش اي بصمات غريبة تقول أن فيه شبه جنائيه، والكلام ده بيتماشى مع تقرير الطب الشرعي، رفعت عيني وبصيت لايمن وقولتله :

_ كده الموضوع مش طبيعي، انا عايزك يا ايمن تعملى تحريات مفصلة عن ال3 قضايا عاوز اعرف ايه الرابط ما بينهم وفي اسرع وقت

= تمام يا باشا تحت امرك

....

قعدت مستني نتيجة التحريات، وفضلت سهران في المكتب وفنجان قهوه يجيب فنجان قهوه، لحد ما دخل عليا ايمن وهو عاوز يقول حاجه بس قلقان ، لما شوفته بالحالة دي طلبت منه يتكلم على طول فقال:

_ في رابط فعلا يا فندم بين التلاتة، شريف وشهد وادهم كانوا بيترددوا على عيادة طبيب نفسي اسمه اسامة عزت، وده يبقى دكتور نفسي عيادته ف المعادي وفاتحها من حوالي ست شهور

= عارف ده معناه ايه يا ايمن؟

_ معناه ايه يا باشا

= معناه انه فريق البحث الجنائي مش شايف شغله كويس، ازاي تفصيله زي دي ما تتذكرش قبل كده، لازم الناس تركز، احنا عندنا 3 انتحروا في ظرف اسبوعين، والرابط بينهم دكتور نفسي، ولولا اني طلبت التحريات المفصله دي كان زمانا بنلف في دايره مقفوله، قول للناس تركز عاوزين نخلص القضية دي ف اي وقت.

_ حاضر يا فندم هبلغهم

= هاتلي عنوان الدكتور ده، انا لازم اقابله جايز يفيدنا في التحقيقات ونعرف الناس دي انتحرت ليه.

_ تمام يا فندم

...

اخدت العنوان من ايمن واتحركت على عيادة الدكتور اسامه عزت، لما وصلت لقيت نفسي قدام عماره فخمة وشيك، ومع دخولي لقيت حارس العمارة قاعد فقربت منه وسألته على عيادة الدكتور اسامه فقالى انها في الدور التاني، طلعت السلم وكانت العياده مفتوحه واول ما دخلت لقيت في وشي شاب في التلاتينات لابس نضارة وقميص وبنطلون، شكله وسيم اتكلم بعد ما بصلي باستغراب وقال:

_ مين حضرتك؟

= انت الدكتور اسامه؟

_ ايوه انا الدكتور اسامه انت مين؟

= انا المقدم علاء مراد وجاي لحضرتك في نقاش ودي كده وهمشي على طول

_ تمام .. مفيش مشكله، اتفضل نقعد في المكتب عندي

= هو انت شغال لوحدك هنا؟

_ معايا سكرتير، بس هو خلاص خلص شغله ومشي، وانا كنت هقفل العياده بس لقيت حضرتك في وشي.

= انا اسف لو كنت عطلتك، بس انا مش هاخد من وقتك خمس دقايق.

_ تمام يا فندم تحت امرك

...

دخلت مكتب الدكتور اسامه، كان مكتب مرتب ومنظم جداً، ولفت نظري وجود مُشغل موسيقى فسألته:

_ هو حضرتك بتتبع نظام تشغيل الموسيقى للمرضى؟

= اه طبعا، اي دكتور نفسي شاطر بيتبع النظام ده، بنشغل موسيقى مريحه للاعصاب ودي بتخلي المريض يحكي بدون خوف

_ دي حاجه كويسه جدا والله، كنت بشوفها في الافلام فلما شوفتها في الواقع لفتت نظري

= اه فهمت حضرتك.. طيب اتفضل اقعد

قعدت وبدات انا الكلام معاه:

_ بص حضرتك عشان بس نختصر الوقت، الفتره الاخيره دي في 3 اشخاص انتحروا ولما دورنا اكتشفنا انهم كانوا بيتعالجوا عندك ولسبب ده انا جاي لحضرتك النهارده وعاوز اعرف ايه اللي وصلهم للحاله دي خصوصا انها مش حاله واحده دول3 حالات.

= ممكن اسماء الحالات دي؟

_ اه طبعا اتفضل الورقه دي فيها أسماء الحالات التلاتة.

= اه فعلا، التلاتة كانوا بيتعالجوا عندي، شريف وشهد وادهم

كل واحد فيهم كان عنده سبب ف انه يجي لعيادة دكتور نفسي، واقدر اقولك انهم كان عندهم يأس من الحياة.. انا عملت معاهم جلسات كتير لكن مكنش فيه تحسن.

_ يعني هما صرحوا حضرتك بفكره الانتحار؟

= هما كانوا شايفين ان الموت هو الحل خصوصا أدهم اللي كان عنده احساس رهيب بالذنب لانه تسبب في موت شخص، انا حاولت افهمه ان ده قضاء وقدر وانه مش مسؤول عن اللي حصل، خصوصا ان المحكمة براءته بس هو كان مصمم على جلد ذاته.

_ طيب هل فيه حالات تاني عند حضرتك رافضة الحياة زيهم جايز نلحقهم قبل ما ينتحروا هما كمان.

=ههههههه.. انا اسف يا فندم، بس الاعمار بيد الله احنا بنعمل اللي علينا والباقي على ربنا، واللي اجله انتهى ده خلاص محدش هيقدر ينقذه من قدره.

_ مفهوم مفهوم، انا بشكرك بس احنا ممكن نستدعيك عشان ناخد اقوالك بشكل رسمي خصوصا ان اسمك اتذكر في القضيه

= مفيش اي مشكله يا فندم انا تحت امرك

...

خرجت من مكتب الدكتور ده وانا مش مرتاحله مش عارف ليه.. المهم رجعت على مكتبي من تاني وكنت بفكر في كلام الدكتور وفي نفس الوقت حاسس ان فيه حاجه غلط

المهم ان بعد يومين استدعناه فعلاً عشان يدلي باقواله، وجه وقال نفس الكلام، ومن وقتها اقدر اقولكم ان الموضوع هدي تماماً واني اخدت الاجازه وريحت دماغي شوية من دوشه الشغل وفات على آخر قضيه 3 شهور، يومها انا كنت في مكتبي وتليفون المكتب رن، وانا عارف لما بيرن هيبقى المتصل مين؟.. ايوه بالظبط هو سامح

_ الو ايوه يا سامح؟

= جتلنا اشاره جديده يا فندم من المرج

- تمام جهز القوة وابعتلي اللوكيشن على الواتس

 اتحركت من مكتبي ومعايا ايمن على اللوكيشن، لما وصلنا قدام العمارة واللي كان رقمها ٧ لقينا المطافي موجودة والشارع متقفل من الناس حرفيا، طلعت الدور الرابع ولما بقيت هناك شميت ريحه حريق، واول ما دخلت الشقه شفت جثة على الارض متفحمة تماماً، قربت من الجثة واللي كان ملهاش ملامح، منظرها كان صعب جداً، ف الوقت ده وصل فريق الطب الشرعي والمعمل الجنائي عشان يشوفوا شغلهم، وبعد ما خلصوا اتنقلت الجثة للمشرحة وانا رجعت على مكتبي

واللي عرفته من الجيران ان دي واحده اسمها وفاء ومقطوعة من شجرة وما لهاش حد كانت متجوزه واحد اسمه طارق، وطلقها من حوالي شهر

يعني مفيش حد نستدعيه يدلي باقواله غير طارق، ولما سألنا عليه عرفنا انه مسافر بره البلد وعشان كده طلبت تحريات سريعة عن وفاء ومع تحرياتنا عرفت انها كانت بتابع مع دكتور نفسي وهنا كان السؤال الاهم هل هي كانت بتتعالج عند الدكتور اسامه عزت ولا لا؟، اجابه السؤال ده هتتوقف عليها حاجات كتير جداً

وبعد 24 ساعه، كان على مكتبي التحريات الكاملة عن وفاء

( وفاء حسين كامل، السن 29 سنه، مطلقه.. عايشه لوحدها في شقه بمنطقه المرج.. في الفتره الاخيره كانت بتمر بازمه نفسيه بسبب وفاه بنتها الوحيده وده حصل بعد تسرب غاز ادى لوفانها ومن بعدها تخلى عنها جوزها طارق وطلقها وسافر بره البلد، طبعا دخلت في حالة نفسية صعبة ولجات للطب النفسي وبالتحديد لعيادة الدكتور اسامه عزت)

قفلت ملف التحريات وطلبت من ايمن تحريات مفصله عن الدكتور اسامه عزت، ما هو مش معقول كل حاله تروح عنده تنتحر، وطلبت من ايمن انه يتابع التحريات بنفسه، ووقتها وصل تقرير الطب الشرعي والمعمل الجنائي عشان نشوف اسباب الوفاه وهل كان في شبهه جنائيه ولا لا رغم اني عارف انه مفيش وزي ما توقعت لما فتحت التقرير لقيت مكتوب فيه

( الوفاه حصلت نتيجة صدمة ناتجة عن حروق شديده بالجسم، كمان كان فيه سواد ناتج عن الدخان في الانف والفم وده بيدل انها كانت عايشه وقت ما النار اشتعلت يعني ماتت بسبب الحروق، ما فيش اي علامات لضرب او عنف.. وكمان فيه مادة سريعة الاشتعال واللي هي بنزين على الجلد وعلى الهدوم)

اما تقرير المعمل الجنائي فبيقول( أن فيه بقايا ماده سريعه الاشتعال جنب الجثة ومفيش اي علامات لكسر في شباك او باب، ومفيش اي مؤشرات على وجود مشاجرة، ومن خلال المعاينة وتحليل العينات فالواقعة اقرب ما تكون لحاله انتحار بالحرق الذاتي دون تدخل اي طرف خارجي)

....

_زي ما توقعت يا ايمن، وفاء كمان انتحرت... انا عايز تحريات كاملة عن الدكتور اسامه عزت في اقرب وقت، انا من الاول مش مرتاح للدكتور ده والتحريات دي لو طلع فيها حاجه يبقى شكي كان في محله.

= اطمن يا فندم خلال 24 ساعه هتكون قدامك التحريات

_ تمام يا ايمن ربنا يوفقكم