مرة في 2012 كنت في إسكندرية واتصورت صورة حلوة جدا على كوبري ستانلي، ولما رجعت القاهرة لاقيت رسالة على الماسينجر من واحد بيقولي إنه عاوزني أقدمه للإعلام كخبير في الشؤون الإيرانية، قلتله: إزاي؟ هو إنت بتشتغل إيه وفين؟ قالي إنه بيشتغل معد في برنامج رياضي في قناة كده كان صاحبها وقتها دكتور صيدلي مشهور جدا عنده شركة أعشاب وقدر يبقى عضو مجلس نواب. قلتله: وإيه إللي طلع موضوع إيران في دماغك؟ راح باعتلي صورة ليه في برج مشهور في إيران وقاللي إن واحد صاحبه قدر يسفره إيران مع وفد ما، وإنه بعد الأسبوع إللي قضاه في إيران اكتشف إنه بقى خبير في التخصص ده. قلتله: تعرف اسم البرج ده الأول؟ قالي: والله المرشد السياحي قال لنا على اسمه بس نسيته. قلتله: ده برج ميلاد اتعمل من 4 سنين تقريبا. وعلى فكرة عيب تطلب من أي حد طلب زي ده. قالي ليه؟ قلت له: أنا مثلا لسه راجع من إسكندرية واتصورت على كوبري ستانلي: هل ده معناه إني بقيت خبير في الشؤون السكندرية؟! عيب عليك. لو عاوز تبقى متخصص في شؤون بلد ما الطريق بسيط جدا. تقرأ 200 كتاب وتاخد ماجستير ودكتوراة في الموضوع وبس كده؟! قالي: طيب أنا هوريك إني هبقى خبير من غير كل وجع الدماغ ده.

وفعلا بقى نجم كبير في الموضوع، وصدق في وعده ليا.