عاوزه اكلمكم عن لعبة نفسية خطيرة جدا

 اطلقوا عليها اسماء كثير، اطلقوا عليها علاقة التنقيط، علاقة السرسوب.

وأنا بسميها علاقه (مسمار جحا )

في العلاقه دي بيتفق الطرفين على أنهم خلاص مش هيكملوا كحبيبين...... لكن هيفضلوا اصدقاء.

 الفترة الاخيرة انتشرت جدا الطريقة دي، تحت مسمى احنا ناس متحضرين، بس اسمحوا لي ده كلام نفسيا فارغ.

 الشكل ده من العلاقات مدمر وحقير وده اقل ما يقال عنه.

من أخطر عيوبه أنك بتبقى (دقيت مسمار جحا )

في عمق حياة الطرف الآخر، ظلمته وظلمت نفسك 

 أنت حرمته وحرمت نفسك من انكم تدخلوا في علاقات حقيقية و دائمة وناجحه.

فاذا كنا ما نجحناش ان احنا نكون اثنين سعداء مع بعض كل واحد فينا قادر على تحمل المسؤولية، 

ليه نفضل مستمرين في تعذيب بعض بس بشكل جديد ما فيش حاجه اسمها علاقه حب بتتحول لصداقة.

 الأمر ده مستحيل يحصل مستحيل وعن خبره سنين في المجال النفسي، ودراسات استمرت سنين، أومال اللي بينجحوا يعملوا ده دول إيه؟

دول ما بيكونش كان فيه من الاصل حب، كان انجذاب، اعجاب،مصالح مشتركة، أي حاجة إلا الحب.

الشكل ده من الألعاب النفسية بيهدر وقتك وأعصابك وبتفضل طول الوقت حاسس انه في أمل ان احنا نرجع من جديد ،

مع ان الأمل ده كاذب ولو كان من البدايه ممكن تستمر انت والطرف الاخر في العلاقة.

 كانت استمرت بشكل انسيابي وتلقائي وبدون ما تحتاجوا لوقفة زي دي. اللي هي شبه أغنية (عمرو دياب) انا عايش ومش عايش، ما هو انت يا عايش يا ميت ما فيش حاجه اسمها عايش ومش عايش.

 ما فيش حاجه اسمها نص علاقة

انسانيا ما فيش كده..... نفسيا ما فيش كده..... فمن فضلكم حاولوا تخلوا علاقاتكم سوية وواضحة ومريحة.

وحطوا ألف خط تحت مريحة

 عشان ده بيضمن لكم السلام النفسي اللي هو بدايه الحصول على غايه الانسان في الحياة وهي السعادة

 بحبكم في الله وبتمنى لكم حياة سعيدة.