لام الشمسية.. الأم

الأم.....

شفت تحليلات وافية ومهمة كتير عن مسلسل لام شمسية،

 معظمها من أساتذة في علم النفس والدراما كمان.

وعجبتني كتير لأنها غطت معظم القضايا اللي أثارها المسلسل وعشان كده مكتبتش حتى الآن

لكن اللافت إن كل التحليلات اللي شفتها بتتكلم عن وسام وده أكتر الشخصيات وضوحا .

وأحيانا عن نيللي وأموميتها وتحملها لأبناء زوجها.

وعن طارق الطفل الذي لا يريد أن يكبر ويمارس دوره الأبوي ويتحمل المسؤولية.

لكن فيه تجاهل للشخصية الأهم والأكثر تأثيرا  

اللي هي الأم ... أم وسام

الشخصية اللي بتقوم بيها الاستاذة المبدعة( صفاء الطوخي) 

لإن هي اللي ورا كل ما يحدث، هي السبب الرئيس

الأم اللي بتداري على ابنها حتى لو مجرم

وده شفناه لما استغلت سلطتها ورفدت يوسف وادت أجازة ل نيللي،

الأم اللي بتبرر لنفسها وللآخرين أفعال ابنها المشينة وتصرفاته القبيحة

وده بنشوفه في كل تصرفاتها وكلامها مع حفيدتها.

دي أحيانا كمان بتلجأ للإسقاط إذا حد واجهها بقبح ابنها وتطلعه هو المخطئ.

الأم دي أهملت تربيته في الصغر وأخطأت أخطاء جسيمة وكانت النتيجة النموذج اللي احنا شايفينه( وسام)

مش من حقي أسبق الأحداث لكن غالبا وسام هيكون اتعرض في طفولته لنفس الفعل اللي هو بيمارسه مع يوسف وكمان مع زينه بنته وغالبا مع زميلته في المدرسة.

وإن لم يكن فالإهمال هيكون أهم عامل مسبب لاضطراب شخصية الإبن وسام وجدير بالذكر هنا إن طارق الاب المهمل المنشغل بذاته ونزواته هو السبب في لجوء يوسف للشخص الوحيد اللي بيسمعه اللي هو وسام. ولو مكانش يوسف اتعالج كان ممكن جدا يتحول في المستقبل ل وسام جديد، شفتوا ازاي الحلقة مغلقة؟ .

الأمهات والأباء اللي بالشكل ده هم مصدر السيكوباتين اللي بنقابلهم في حياتنا. 

وأنا لو أملك المحاكمة أحاكمها مع ابنها. لأنها مجرمة فعلا وكتير بقابل في شغلي النوع ده من الآباء والأمهات.

أتمنى إن المعالجة الدرامية لا تغفل إظهار دورها في تكوين شخصية وسام.

وشابو لكل صناع العمل لجرأتهم في التناول وحكمتهم في ضبط المعيار.

 التنويه واجب هنا: إن الاطفال ميتابعوش معاكم المسلسل، لكن لازم تمارسوا دوركم في توعيتهم ومراقبتهم

المسلسل ده مدفع انذار مش مجرد جرس.