المطبلاتى

معانا واحد كان مركون

دايمٱ على الرف

كنت دايمٱ تلاقيه

آخر واحد فى الصف

بيكون كمالة عدد

وحشو فى النصف

قعد سنين طويله

عايش جوه كهف

مفيش مدير حبِه

عشان بيدور ويلف

قرب من مدير قديم

خلاه رقم واحد من ألف

لعب الحظ معاه لعبته

آه منك يا حظ

خليت إللى مكانش

عارف امبارح ولا حرف

النهاردة بقى بروفيسير

ويقرأ كمان الكف

بيلعب على كل طبله

ويرقص كمان على الدف

بتتحدى واحد من دور ابنك

بدل ما تفهمه وتأخده فى حضنك

لكن الأنانية وحب الذات ومصلحتك

تخليك تضحى بكل شيء عشان أسمك

شفته بيبوس أيده

ويجرى يسلم على سيده

واللى يقوله يرجع يعيده

ويوقع الحصان في عليقه

كل حاجه يحط فيها مناخيره

الحاكم بأمره وهو نايم على سريره

طوب الأرض اشتكى منه

وفاكر الناس كلها بتضله

مستحيل يكون الخير على يده

ميزان العدل عندك مايل

محتاج أمانه وإخلاص ودلايل

كلامك مش حجة .. المهم الفعايل

مكنتش عارف رغم سنه الكبير

أنه شايل فى قلبه وبيغير

لسانه مغموس بعسل

فيه سم سريع التأثير

يمسك الكلمة يلفها ويذوقها

ويرميها للسيد المدير

سره الباتع .. زلزال له توابع

عينيه فيها مدامع

جواها فرحة التدمير

بكره تمشى .... ومتزعلش ... وميهمكش

بكره الناس تكسر وراك

ألف ... قلة .... وزير .