الكرامة كل حاجه 

عندنا واحد مسمينه

خباصة بالكهربا

كلنا هنا عارفينه

قرصته زى العقربه

ودايمٱ متجنبينه

تعريضه يودى المفرمه

ضحكته مش خالصة

فيها شوية كتير صفار

بيعمل حاجات

عشان المكافآت

اكتر من الصغار

أخصائي نقل كلام

تخصص إشاعات ودمار

بيعمل كل حاجة

حتى الشاى

شايل الناس كلها

شوفت أزاى !

عمرك شفت حد

بيرقص على الناى !

الغريبة أنه مش مكسوف

ويأكل دماغك فى الشرح

ويقول ياحبيبى .. تعالى شوف

خلى فى عينك حصوة ملح

متلاحقش عليه كلام

يخليك تقوله أنت تمام

عامل فاهم فى كل حاجه

كهرباء ... ميكانيكا ... سباكه

لكن عندنا رجالة عارفه

وفاهمة شغلها كويس

ترمى معلومة غلط .. ياخدها

ويجرى يقولها للريس

يضحك ويقوله أنت عبيط

ضحكوا عليك وخلوك تهيس

سألت مرة المدير

ليه بتسمح له يهرتل ؟

قالى : ده عين ليا

متطوع ومرشد ومصدر

لكن من غير ما تقلق 

كلامه بيعدى على فلتر 

فى كل مكان 

تلاقى الناس دى موجوده

من غير ما تدور

تلاقيهم اسماء معدوده

بيكرهوا الخير للناس

وأيامهم كلها سوده 

وهى مش محتاجه

الكرامة كل حاجه .