الطب وقيمته

لو هنسامح أي حاجة عملها النت في الحياة عموما فمستحيل نسامح اللي خلى الطب سلعة رخيصة ولعبة وحركات جذب ومتاجرة مكشوفة.. 

الطب جزء من قيمته رقيه وصعوبته وطول طريقه وتفاصيله واختياريته لأهله.. يعني مش أي حد ينفع يدرس طب دول صفوة العقول، ومش أي حد يقدر ينجح كطبيب دول قمة الأذكياء المواكبين للعلم، ومش أي حد يفتي في الطب دول اللي فعلا درسوا واتعلموا سنين ولسة بيتعلموا كل يوم.. 

مينفعش الطب يبقى سلعة بيتعمل لها فيديوهات جذب عشان العيادات تشتغل شبه فيديوهات المحلات والمطاعم.. 

مينفعش الدكتور عشان يجذب المريض للكشف عنده يدي معلومة ناقصة أو وهمية أو مبالغ فيها، ويلعب بالمحتوى بكلمات مفرقعة وعامة ومش كاملة ولا واضحة ولا تنفع المريض الحقيقي اللي داخل يدور على أي أمل لتخفيف آلامه.. 

الطب بقى ريلز ينتفرج عليها زي ريلز الطبخ والسفر، وكله بقى طبيب وبيفتي في الطب، والضحية الحقيقية هو المريض اللي بيتعلق بأي حاجة تديله أمل في الشفا.. 

وعشان مفيش مرجعية موثوقة فالمريض دا بقى ضايع وفي خطر حقيقي كل يوم.. 

ولنا في ريلز أمراض العمود الفقري أكبر دليل!