نقول: سلام عليكم ورحمة اللَّه وبركاته، ويلا بينا.
إزيك عامل إيه؟
بتقول: إنّك مش بخير!
طب ليه؟
علشان نفسيتك مش أحسن حاجة، دُّنيا صعبة، أسعار غالية، راحة مٰفيش.
هو دا كُلّ اللي مأريفك يعني.
ودا سهل يعني يا مريم؟
طبعًا سهل.
إزاي يا ستو مريم؟
هاقولك: أيّ حاجة تتصاب فيها بعيد عن دينك، تبقى سهلة وسهلة جدًّا كمان.
مش فاهم ممكن توضحي أكتر من فضلك؟
هافهمك: أنت مثلًا أغلى حاجة عندك إيه؟
بلاش تجاوب، أنا هاجاوب بدالك، ولو إجابتي غلط قاطعني عادي.
اتفقنا.
أغلى حاجة عندك يا عمّ النّاس هي روحك، ودي مٰفيش أغلى ولا أعزّ عليك منها، مهما كانتْ درجة حُبّك لحبايبك، ودا طبيعي لإنّك لو مش حبّيت روحك إستحالة تحبّ حدّ تاني.
دلوقتي ويكأنَّك في عربيتك الخاصّة وحصل وعملتْ حادثة، العربية اِتطبقتْ لكنْ الحمدُ لِلَّهِ أنت مش حصل لك حاجة، ساعتها هاتقول إيه، أو اللي بيحبّوك هايهونوا عليك الموقف بإيه؟
بإيه يا ستو مريم؟
بعيدًا عن ستو دي لكنْ هاجاوبك، هايقولوا لك: اللي ييجي في الصاج يتعوّض، ليه بقى؟
علشان حرفيًا اللي ييجي في الصاج يتعوّض لكنّ روحك مش ممكن تتعوّض.. فهمت قصدي يا عمو؟
فهمت يا ستو، فعلًا كُلّ المصايب تهون ما دامت بعيد عن الدين.
برافو عليك، كنت بتقول: أسعار غالية وراحة مٰفيش، ودُّنيا صعبة باين.
أيوا قلت كدا.
طب أنت عارف إن كُلّ شكواك دي في ناس حرفيًا مش طايلة رُبعها، يعني مش معاهم فلوس علشان حتّى يشتروا اللي يلزمهم ويعرفوا إن الأسعار غالية، في ناس تانية مش عارفة يعني إيه راحة أصلًا؛ لإنّهم مش جرّبوها قبل كدا، أمَّا بالنسبة للدُّنيا الصعبة ففي ناس تالتة بقى مش عارفة يعني إيه دُّنيا حرفيًا؛ لإنّهم مش عاشوا ولا حتّى جت لهم فرصة يفهموا معنى المصطلح دا بالتعايُش.
كُلّ اللي أنت فيه سهل ما دام قلبك موصول بربّك، محافظ على فرضك، مش بتضيّع وِردك، ولسانك مشغول بذكر اللَّه، فطبيعي لو الدُّنيا سواد حواليك هايطلع نور من قلبك ينوّر حواليك.
بلاش تكون سبب في ظلم نفسك بحرمانها من الحياة.. لمّا تحرمها الأمل.
2
-2
