مهما الكون ضلّم

اوعاك تتألم

خُد لك م اليوم عِبرة

تنفعك بكرا

وبعده تكون ذكرى

دي الحلوة أمورة

بنوتة شّطورة

مليحة وصغيّورة

مِسكتْ في حُبِّ الخير

والدُعاء للغير

لأجل الكبير ربّك

سمّي على قلبك

إِيَّاك تفوّت فرضك

دي دنيا كلها متاعب

حوارتها زي الملاعب

خلليك في دور اللاعب

بس ما تظلمش

علشان ما تخسرش

خلليك كيف الحلوة أموّرة

بنوتة شّطورة

شافت الدنيا بتضلّم

والكُلّ بيتألم

ابتسمت لهم اِبتسامة هادية

وقالت لهم بنفس راضية

راح ييجي النور بكرا

وتكون شّطورة ذكرى

حلوة في دفتركو

طبيعي ما هي هاتقدركو

جمعت جوارحها كإنها فارسة

حسبت حسبتها ما هي دارسة

لقت قلبها هو اللي فيهِ الحلّ

علشان النور ييجي والعُقدة تتحلّ

مليان فرح وسرور

وثقة مش غرور

هو اللي فيه النور

ما هو ساكنه حُبِّ الرحمٰن

فراضي مش زعلان

هادي ومش غضبان

عامر ومش خربان

صاحي ومش تعبان

خرجتْ أموّرة وهي بسمانة

مُتفائلة، راضية وفرحانة

قالوا لها فين الحلّ؟

قالت لهم جوّاكم

عايزين عُقدكم تتحلّ

صفّوا نواياكم

وقفت وسط الضلمة

والدوشة واللمّة

وقالت يارب الكون

خرّج من المكنون

فخرجت من قلبها

أنوار ما شافوا زيّها

وصبح الكون نوّار

منوّر ليل ونهار

وشّطورة بقت مثل للخير

وقلّدها ناس كتييييير

لو مهما حصل حواليك

دوّر عليك بايديك

ضروري هاتلاقيك

ما يهمكش ظلام الكون

طالما جوّاك من النور مخزون

محفوظ في المكنون

أنتَ قدّها وقدود

تقدر تعدّي حدود

آمِن بنفسك وقدّرها

ومهما حصل اوعى تخسرها

خرّج نورك للدنيا

خلليك حلو دي فانية

والكلمة الطَيّبة قولها

والشِينة ما تقولها

لا تظلم فينطفي نورك

حافِظ على قلبك ده مصدر نورك.