المقال ده للي معذّب نفسه، ليل نهار بيجلد فيها، مُتحامل عليها جددددًا، مش بيعطف عليها، ولا حتّى بيرحمها.

اِرحم نفسك شوية، حِنّ عليها، عامِلها بعطف ولُطف لوجه اللَّه، بلاش اللوم عمّال على بطّال، خصوصًا لو حاجة خارجة عن إرادتك.

خلليك واثق إنك مش بائس أكتر من مريم.

مريم مين؟

مريم دي أنا، النهارده وبدون قصد حذفت كُلّ ملفات وورد اللي عليها بعض كتاباتي، يعني حاجات مُهمة وجدددددًا كمان، مش بس كده لأ واتحذف كمان مجموعة كنوز Pdf أصل أنا بسمّي الكُتب كنوز، وطبعًا ده للكُتب اللي تستحق.

المُهم استوعبت بعد دقايق إنّي عملت مُصيبة بدون قصد، حاولت كتيييييير أرجع حتّى بعض اللي اتحذف مش عرفت، فعملت إيه؟

زي الصورة كده، يعني جبتي وردة واديتيها لنفسك ولا عملتِ إيه؟

لأ مش جبت وردة لكنْ تصدقت على نفسي بكلمة طيّبة يمكن تهوّن عليها مُصابها، وابتسمتْ وقُلت: قدّرَ اللَّهُ وما شاء فعل، الحمدُ لِلَّهِ على كُلّ حال، وطبعًا كمّلتْ: اوعي تتكرر تاني علشان ما نزعلش من بعض.