قُلت إن الظُلم والخُذلان من أسباب كسر القلب.. تمام، طب في أسباب تانية؟

طبعًا، والسبب ال 3 في كسر القلب هو الحُزن، والحُزن ده ليه أسباب، منها الفقد مثلًا، لما بتفقد حد عزيز ده بيأثر عليك، حياتك بعد ما فقدته مش هي قبل ما تفقده، الدنيا بتقف عندكَ في اللحظة دي حرفيًا، حتّى لو تعايشت برضو بتحسّ بحاجة ناقصاك، مكان فارغ جواك مش مُمكن حد يملاه، وفقد الأرواح أهون شوية من فقد القلوب؛ إحساس صعب إنك تفقد روح غالية على قلبك، لكن الأصعب إنك تفقد قلب كُنت فاكرُه مُستقرك والأمان، ده كُلّهُ بيأثر سلبي على القلب ويتسبب في كسر القلب.

كمان الهموم مش بس بتكسر القلب، لأ وبتأثر على النفس والجسم، فجأة تلاقي نفسك حاسس إنك متكتف وعاجز عن الحركة، وبرضو بتتعايش وبتسايس أمورك، لحد ما تحسّ إن روحك تقلت من كُتر الهموم وضهرك اتكسر، وكل ده بترجمه النفس لوجع وألم كفيل إنه يكسر القلب.

طب تعمل إيه؟

تسيبها على رّبّنا، وتركز مع نفسك.

أقولك حاجة حلوة: حِبّ نفسك وقدّرها واوعى تتكسر لغير رّبّنا، لو حبّيت نفسك مش هتهون عليك، عارف ده معناه إيه؛ معناه إنك مش هتقدّر حد على حساب نفسك. 

حِبّ نفسك مش هتظلمها، اعرف قيمة نفسك تعيش مرتاح، اعرف حدودك وحافظ عليها، ما تسمحش لحد إنه يتعدّى حدوده معاك.

كونك طيّب دي نعمة وميزة، لكن إيَّاك تكون ساذج اللي يضحك لك تفتكره بيحبك، واللي يقولك إزيك تفتكرها له جِميلة، وياخدك العَشم لو قالك أخبارك إيه وتفتح له بيتك، خلليك عاقل وناضج، واعرف إن الثقة غالية ومش كل الناس غالية.

أسعِدوا أنفسكم بأنفسِكم ولأنفسكم.. لأنَّكم تستحقون.