الثقة بالنفس تحديدًا (الجزء الثاني والأخير)

هكمل كلامي عن الثقة بالنفس تحديدًا.

زي ما قِلة الثقة بالنفس بتتعب صاحبها كمان زيادتها بتأذيه مش بس كده لأ دي ممكن تتسبب في غضب رّبّنا عليه؛ بتقول: إزاي؟

في قاعدة عامّة حُطّها في دماغك وهي أيّ حاجة بتزيد عن حدّها بتتقلب لضدها، يعني إيه الكلام ده يا مريم؟

يعني لما الثقة بالنفس بتزيد بتوصل صاحبها للغرور، والغرور ده معناه النفخة الكدّابة، اللي بتسبب لصاحبها المصايب، والغرور مع الوقت بيوصل صاحبه للكِبر، يعني بني آدم مُتكبِر وده طبعًا حرام بتحريم اللَّهُ لهُ وكذا رسولهِ صَلَّى اللَّهُ عَلَيْهِ وَسَلَّمَ، قال اللَّهُ تعالى في حديث قُدسي: "الكِبرياء ردائي والعظمة إزاري فمَن نازعني واحدا منهما ألقيته في جهنم ولا أُبالي"، وكذلك قول رسول اللَّهِ صَلَّى اللَّهُ عَلَيْهِ وَسَلَّمَ: "لا يدخل الجنّةَ مَن كان في قلبهِ مثقالُ حبَّة خردلٍ من كِبر".

هتسألني يعني إيه حديث قُدسي؟

سؤال مُحترم من شخص يُحتَرَم، الأحاديث تنقسم لنوعين، أحاديث قُدسية وأحاديث نبوية؛ والحديث القُدسي هو الذي يُنسَب إلى ملك الملوك رّبّ العِزّةِ والجبروت فيُنقَل على لسانِ سيدنا مُحمّدٍ _صَلَّى اللَّهُ عَلَيْهِ وَسَلَّمَ_ ويُقال عنهُ: يقول اللَّهُ جلَّ وعلا، لكن الحديث النبوي هو ما كانَ دونَ ذلك من قولِ الرسول صَلَّى اللَّهُ عَلَيْهِ وَسَلَّمَ.

وبعد ما عرفت إن قِلة الثقة بالنفس بتسبب متاعب لصحابها، وزيادتها ممكن توصل صاحبها للهلاك _والعياذُ باللَّه_ هاتقول: طيب الواحد يعمل إيه يا مريم؟

هاقولك: يعتدل في ثقته بنفسه يعني لو قَلّت يستعين برّبّنا ترجع زي ما كانت، ولو زادت يقلل منها ويتواضع للَّهِ رّبّ العالمين، ودايمًا الواحد يدعي رّبّنا في صّلاته، وطول الوقت إن يرضى عنه ويحفظه ويبعد عنه كل ما لا يُرضيه.

مالك وشّك اِحمّر كده ليه؟

إيه.. قُلت إيه.. مش بتصلّي!!!

هوّن عليك، هاكلمك عن الصّلاة البوست الجاي بإذن اللَّه.

أقولك حاجة حلوة: لما رّبّنا يبتليك ما تزعلش، ولا تحزن، ده رّبّنا بيحبّك علشان كده اِبتلاك، عارف إن في حاجات كتير بتكتشفها وقت ضيقتك، بتعرف حقيقة اللي حواليك، بتعرف قدرك عندهم، بتعرف كل حاجة وكإن البلاء ده رّبّنا بيفتَّح بيه بصيرتك، المهم لما تلاقي حد قُريب منك ظلمك، شِمت فيك، استغلّك، مش ساعدك ولا وقف جنبك، بيقلل منك، اوعى تفقد ثقتك في نفسك باللَّهِ عليك، أنت حلو وبخير بس هو اللي ناقص والنقص طبع فيه، بس أنت مش كنت واخد بالك، اوعى تستسلم لكلامه المسموم، خلليك واثق في نفسك، ولا يهمك اللي يقول لك: عجزت قبل ميعادك، شيبت بدري، ده أنا أكبر منك وما يبانش عليا، سيبك منهم ومن كلامهم وركز مع نفسك، اوعى تسمح لأفكارهم الشّيطانية تدخل دماغك، حافظ على صبرك، اقفل على نفسك أي مدخل يقدروا يدخلوا منه.. خلليك واثق إنك حلو بس بصيت لنفسك في المراية الغلط.

الثقة بالنفس تَقوى من الثقة باللَّهِ سُبحانَهُ وتعالى.