هاتكلم النهارده عن حاجة مُهمة جدًّا، نقول: سلام عليكم ورحمة اللَّه وبركاته، ويلا بينا.
لاحظت حاجة غريبة جدًّا في مُجتمع السوشيال ميديا، وهي تصدير الطاقة السلبية بخصوص الزواج، بمعنى أصّح بعض النّاس بيكرهوا غيرهم في الزواج.
مش عارفة ليه؟
وبعدين لنفترض إن كلامهم صّح ومش كذب، فهي زوجها اِتخانق معها، وهو مراته سابت له البيت وراحت عند أهلها، أكيد يعني في أسباب للأحداث دي، أصل مٰفيش راجل هايتخانق مع مراته من غير سبب، علشان حضرته مش هايقلّ راحته بإيده، ومٰفيش ست هاتبعد عن زوجها اللي روحها فيه من غير سبب.
وكمان في ناس معقدة من الزواج بيتكلموا عنه بصورة مش لطيفة، وعلى كُلٍّ كُلّ واحد مُختلف عن التاني حتّى في المشاكل، وكُلّ واحد عيشته بتختلف عن عيشة غيره، كُلّ واحد وليه أسلوبه في الحياة.
والنّاس اللي بتقول إن الزواج وحش، عايزة أقولكم كذبتم وصدَقَ اللَّه، أصل ربّنا سُبحانَهُ وتعالى مش بيقدّر غير الخير، وطالما قَدّرَ لنا الزواج إذًا فلخيرٍ وخيرٍ كثير.
الزواج من أجلِّ النِعَم التي مَنَّ اللَّهُ بِها على عباده، الزواج حلو مش وحش، الزواج خير وبركة، الزواج نفع وفائدة.
كون حضرتك أنتَ وهي اِختارتوا غلط من البداية، دا مش يدّيكم الحقّ إنَّكم تحمّلوا الزواج نتيجة اِختياراتكم الغلط.
بلاش تكرّهوا النّاس في حلال ربّنا، وبعدين لمّا أنتوا بتكرهوا الزواج آووووي كدا بتتزوجوا ليه من البداية، وبتكمّلوا ليه فيه؟؟؟
الزواج اِستقرار للنفس وطهارة للجسد، وراحة وسكينة وطُمأنينة، ومودّة ورحمة، وأمان وحنان، وحُبّ ورضا.
مهما حاولتوا تشوهوه مش هايتشوه ولو عملتوا إيه، دا حلال ربّنا ودا السبيل الوحيد لعفّة الذكر والأُنثى.. لكن لمّا تكرّهوا النّاس فيه معنى كدا إن عندكم بديل ليه، وطبعًا مٰفيش بديل للزواج، الزواج اللي هو أصلًا طاعة للَّهِ وابتغاء مرضاته، يا ترى عندكم بديل يحتكم على الأُسس دي؟
أكيد لأ.
يعني إيه يا مريم عندهم بديل؟
هاقولك: في ناس بتروّج لفكرة العزوف عن الزواج، ودا مُستحيل؛ لإن البشر ربّنا سُبحانَهُ وتعالى جبلهم بغريزة فطرية ينتج عنها غرائز أُخرى كَالأبوة والأُمومة، ودا من شأنه اِستقرار المُجتمع طبعًا بعد تكوين أُسر صالحة.
ومٰفيش بديل ليه؛ علشان هو الطريق الوحيد للعفّة بالحلال، غير كدا حرام.
واللي بيقولوا للنّاس عيشوا من غير زواج، مش عارفة عقولهم فين، يعني إيه عيشوا من غير زواج، يعني كُلّ إنسان يعيش لوحده في الحياة من غير زوجة يسكن إليها، وكُلّ واحدة تعيش في الحياة لوحدها من غير زوج تآوي إليه، كدا مش هايكون في حياة ببساطة شديدة.
*******************************
أقولك حاجة حلوة: ركز مع نفسك ومع الرسالة اللي اتخلقت علشانها وهي عبادة الرحمٰن وتوحيده، واللي بسببها ربّنا سخّر لك حاجات كتير وأحلّ ليك الزواج، علشان لمّا تكون متزوج هاتكون مُستقرّ نفسيًا وذهنك صافي، وهاتلتزم بالطاعة أكتر مع وجود شريك يعينك على دا، وهاتبتغي مرضات الحنّان في تكوين أُسرة صالحة تُرضيهِ عزَّ وجلّ.
وهاتكون أكثر إنتاجية في الحياة، وخلليك عارف إن اِختيارك هو اللي بيحدّد اللي ذكرناه، اِختار صّح تعيش صّح.
2
-2
