هاتكلم في البوست ده عن الندالة.. بِسْمِ اللَّهِ وبهِ أستعين.

طبعًا كالعادة هتسألني: طب هو يعني إيه ندالة؟

الندالة دي معناها ببساطة شديدة الحقارة، السفالة، وطبعًا المعنى بيبقى صِفة للبني آدم الندل، يعني الندل ده حد حقير، سافل، خسيس، أيوا زي ما سمعت كده، دي مش شتيمة _معاذ اللَّه_ دي صفات بعض الأشخاص اللي موجودين حوالينا. 

والندل بيعرف يشّكل نفسه كويس جدًا حسب الموقف اللي هو فيه، قُلت لي: إزاي؟

يعني مثلًا تلاقيه لو حصلت له ظروف مُعيّنة يبدأ يستعطفك، بعدها يلاقيك طيّب فيستغلّك، طيّب فين المُشكلة؟

المُشكلة إنه بيطمنك ويعشّمك آوووي، يعني ممكن يجبرك تساعده في حاجة تخصّه، وطبعًا أنت مش بيهون عليك؛ لإن للأسف الشديد الندل ده بيكون قُريب منك سواء قريبك، صاحبك، زميلك، أو حتّى جارك، بعد ما تساعده تعدّي الأيَّام وييجي وقت ردّ الجميل، ساعتها بس بتعرف يعني إيه بني آدم ندل؛ لما تلاقي معدنه قشرة، طبعه خسيس، اللي يحبه لنفسه يكرهولك، واللي يكرهوا لنفسه يحبهولك، مش ممكن يحبّك تبقى زيّه سواء في الشغل، الوضع الاجتماعي أو حتّى المستوى الفِكري.

لما يحصل وتقابل حد م النوع ده احمد ربنا علشان وَّفر عليك كتيييير، ادالك خِبرة في التعامل مع أمثاله، زوّد مناعتك ضد الصدمات، لإنه زي ما قُلت الندل بيكون حد موثوق فيه من ناحيتك، وده طبعًا لقُربه منك، المهم ما تزعلش خالص، اعتبره درس واتعلّم منه، وخلليك عارف إن الدُّنيا مش بتدّي دروس ببلاش، دروسها قاسية ومؤلمة لكنْ بتعرّفك قُدرتك وقيمتك أنت عند نفسك، فما تزعلش، كله لمصلحتك.

طيب الحلّ إيه يا مريم؟

الحلّ بسيط جدًا، كَبّر دماغك، ما تاخدش كل حاجة على أعصابك، ما تدققش، ما تركزش مع كل حاجة، خلليك مراية للي حواليك، يعني إيه مراية دي كمان يا مريم؟

هاقولك: خلليك مراية للي حواليك يعني عامِل كل واحد زي ما بيعاملك لا أكتر ولا أقل، ما تدّيش حد أكبر من حجمه، ولا تقلّ من حد، ولا تعظّم حد، خلليك مُعتدل في تصرفاتك، كمان اللي يقف معاك اقف معاه، اللي يساعدك ساعده، اللي يشمت فيك اجتنبه، اللي يتمنّى لك الشرّ ولو بهزار اطرده من حياتك غير مأسوف عليه، اللي يقول عليك حاجة مش فيك اطمن أنت حلو بس هو ناقص تربية وأخلاق ودين.

طبعًا المُعاملة بالمِثل دي حاجة عادلة جدًا، لكن لو أنت هتعامل حد لوجه الرحمٰن فدي بقى فيها كلام تاني؛ يعني هاتعفو عند مقدرة، هاتصبر، هتردّ السيئة بالحَسنة، هاتتغافل عن التقصير والتحقير والشماتة، هتساعد وتدعم، هتعامل حد لوجه الرحمٰن يعني هاتغسل قلبك من كل المشاعر السلبية اللي سببها لك.. إن قدرت فاللَّهُ يُحِبُّ المُحسنين وإن مقدرتش فلا تَظلِم أو تُظلَم. 

أقولك حاجة حلوة: نفسك غالية حافِظ عليها وابعد عن الأندال.