طول عمري كنت بسمع جملة "ده يوم مطلعلهوش شمش" وكنت بقولها كتير بهزر بيها مكنتش مستوعبة معناها ولا جربت احساسها.. 

لحد من سنة بالظبط.. 

زي النهاردة بابا تعب شويه في فجر يوم ٢٢ يناير ٢٠٢٢ فضلت رايحة جيه من اوضتي لاوضته اتوترت جدا وقلقت عليه بس عشان تعب مكنتش متخيلة ابدا انه مسك ايدي وانا طالعة من اوضته بعد غطيته عشان بيودعني ومكنتش متخيلة انه قالي هاتي بوسة عشان هتبقى آخر بوسة وآخر حضن.. 

زي النهاردة كبرت سنين كتير قوي مش عارفة عددهم من كترهم.. كبرتهم مرة وحدة.. عجزت.. 

بقالي سنة مبقتش اعرف اضحك.. وبقالي سنة لما بيحصلي حدث مفرح بحس بكسرة في قلبي .. وبقالي سنة دفنت روحي.. 

بقالي سنة مندهتش على اسمه وقولت يا حمدي وانا بفتح باب الشقة.. كنت ادخل البيت مزنوقة وهموت وادخل الحمام بس لازم اعدي على اوضته واقوله اني مزنوقة فيقولي يلا يلا اجري ع الحمام.. زي م اكون طفلة بالظبط.. بقالي سنة مقصيتلهوش ضوافره.. ومحطيتلهوش برفانه اللي بيحبه.. وبقالي سنة مقعدتش معاه ع القهوة وحكينا وضحكنا انا وهو.. وبقالي سنة مدخلتلهوش الاوضة قبل م اخرج وسألته ايه رايك في لبسي يا حموده.. فيقولي وريني كده ويتعدل من السرير ويركز قوي وبعدين يقول الله شيك قوي.. 

أعظم أربع حروف في حياتي ح م د ي.. اسمه

لما كان ميسمعش الكلام ويقولي مثلا مش عايز اكل او مش عايز اشرب ميا او يزرجن عشان ياخد الدوا.. كنت اقوله لا بقولك ايه احنا لسه عايزين نعيش مع بعض سنين كتير قوي.. هناكل ونشرب وناخد الدوا.. عشان ورانا حاجات كتير نعملها انا وانت لسه.. 

كنت كل يوم بحمد ربنا على نعمة وجوده في حياتي.. 

كنت كل يوم اقعد اسال نفسي لو حمدي مش حياتي كنت عملت ايه.. كنت برتب حياتي لمدة خمسين سنة جايين على اساس انه معايا.. عشان اشتري عربية كنت بشتريها مناسبة له هو وراحته هو.. عشان اختار شقة كان تبقى بجاردن عشان حمدي يشرب الشاي في الجنينه ويقرا الجرنال.. اصله بيحب الشمس قوي.. 

وحشتني قوي يا حمدي وعندي حاجات كتير نفسي احكيهالك.. في ناس مضايقاني قوي.. وفي حاجات حلوة حصلتلي محستش بحلاوتها عشان كان نفسي اجري عليك واقولك.. انا لسه مش عارفة انسى عدم وجودك في الحياة ولا عارفة اتجاوز.. اقرب ناس ليا هما صحابك وحبايبك.. بتطمنلك عليهم وبروحلهم تقريبا كل يوم والتاني.. 

صوتك وحشني يا حمدي.. 

مش هتتوسطلي عندك عشان اجيلك بسرعة بقى.. بحبك قوي يا حمدي.. 

بحبك يا صاحبي وحبيبي وابني وكل حاجة ليا..