سمير سعدي .. مع السلامة

سمير سعدي💔😞..

بوحنا لما انبح صوتنا

مين يقول انك تفوتنا

ومين يسأل علينا مين

وجعي اكبر بكتير من كل الكلمات يا صديقي.. عزائي الوحيد انك روحت مكان اوسع وابرح بكتير من الدنيا اللي عايشينها.. مكان وسع قلبك وروحك الخفيفة.. 

اول ما وطأت قدمي القاهرة كنت صغيرة مش في سني بس ولكن في خبرتي وتجربتي أيضاً.. كلمت سمير سعدي وهو صديق بابا صديق عمر ل بابا.. قولتله ان انا قررت اعيش واشتغل في القاهرة.. يمكن قبل م اقول لأمي حتى.. كنت حابه اسمع رأيه لأنه أهل ثقة بالنسبالي.. وبالفعل شجعني.. واستقبلني.. اول شخص قابلته ورحب بوجودي ودائماً كان يدفعني للأمام هو سمير سعدي.. كنا بنتخانق كتير بس بنتصالح بسرعة اوي.. وبنبعد كتير بس بنتقابل كأننا مغبناش.. 

هو بعد وكنت بكلمه وواعدني أنه هيرجع القاهرة وهنتقابل.. وكنت اكلمه وانا بعيط دموعي تغلبني من زعلي عليه وهو تعبان.. بس هو كان يضحك بصوت عالي ويتريق عليا.. ويقولي ان شجرة النبق بتفتنله كل أسراري.. دي شجرة كانت قدام بيته في قنا وكان يكلمني فجأة ويقولي مين مضايقك ولما أساله عرفت منين يقولي الشجرة قالتلي.. 

قبل م اجي القاهرة قعدت اتكلم مع بابا قولتله اني خايفة من قرار السفر والاستقرار في القاهرة.. قالي متخافيش انتي طريقك فيه ومضات كتير.. 

سمير سعدي كان واحدة من تلك الومضات.. 

انا هعتبرك في بيروت يابو سمرة او في قنا قاعد جنب شجرة النبق وهستناك تكلمني وتيجي ولو في منام لمدة ثواني.. 

مش هنساك.. ومش هنسى كلامك ونصايحك ليا يا صديقي.. في جنة الخلد وفي الفردوس الأعلى.. روح وريحان وجنة نعيم يابو سمرة.. 

سلملي على حمدي وعبد الرحيم ولويس وكل الحبايب❤️❤️❤️❤️..