ماذا يحدث في وزارة الثقافة ؟ "اتفرمتون الجهاز؟!!"

يحدث فقط في وزارة الثقافة "المجلس الأعلى للثقافة".. 

الموظف لما يمشي ويسيب مكانه بيفرمت الجهاز..

يعني ايه الكلام ده.. يعني بيطبق نظرية الأرض المحروقة.. أياً كانت أهمية المعلومات الموجودة على الجهاز.. بيقول ده تعبي أنا " مع أنه تعب ناس تاني برضو مش تعبه خالص وهشرلكم ازاي".. وبيحرق الجهاز ويسيب اللي بعده يولع..

من فترة كده ييجي سنة ونص تواصلوا معايا المجلس الأعلى للثقافة بعد ندوة ناجحة عملتها هناك بدعوة من الأستاذ أحمد سويلم.. وقالولي أنه لو معنلتيش دواوين في حاجة اسمها " الكتاب الأول" انهم يطبعولي اول ديوان يعني.. وبالرغم من عقدتي بعد طباعة الأعمال الكاملة لعبد الرحيم منصور.. قولت وماله ليه لا.. شكلهم ابتدوا فعلا يهتموا بالشباب.. روحت ووديت ديواني مفيش شهرين وكلموني قالولي تعالي راجعي ديوانك روحت على ملا وشي وقعدت اربع ساعات اراجع ديواني " لأن الديوان كان مليان اخطاء لغوية" وحروف غلط معرفش ازاي مع اني مودياه على سي دي.. المهم يعني صححت وراجعت وقولت كده تمام ومضيت العقد ومشيت .. قالولي خلاص الديوان داخل مطبعة قبل م توصلي بيتك... قولت ياسلام ده الدنيا فعلا بتتغير.. 

المهم انتظرت شهر اتنين تلاته أربعة سنة أن الديوان ينزل يظهر حد يكلمني.. مفيش عملت اتصالاتي وعرفت أن الإدارة اللي اتفقت معاها وراجعت الديوان اتكلت على الله.. طيب اللي بعده بقى.. اتصلت باللي بعدهم قالولي ملكيش لا عقد ولا ديوان متراجع بالكاد لقينا نسخة ديوانك وان شاء الله نجيب مدقق لغوي يراجعه 🤣 ونطبعه.. 

متخيلين مين هيراجع ديواني اللي بالعامية 😂😂😂.. 

ولما سألت فين النسخة اللي راجعتها يا أساتذة قالولي أن الدكتورة "ن" حرقت الجهاز لما قالولها بالسلامة انتي.. 

تاني يوم لقيت الدكتورة المبجلة بتكلمني وبتقولي أنه مش من حقي أسال عن نسختي القديمة لانه تعب معاليها.. النسخة اللي انا مصححاها بايدي تعب الأستاذة 😂...

واتكلمت بأسلوب غير مهذب بالمرة" طبعا المكالمة متسجلة وهستخدمها في الوقت المناسب".. وكمان عقدي اللي مضيته مش موجود 😂.. 

الخلاصة انا متعطلة بقالي سنة ونص وعندي دواوين تاني مش قادرة اطبعهم " لان دي سلسلة الكتاب الأول طبعا" .. 

الأسلوب اللي الدكتورة كلمتني بيه والخطأ اللي ارتكب مش هسامح فيه..

السؤال بقى لحد امتى هنهتم بالفالصو.. والأشكال العيرة وعديمة الموهبة.. ورقاصين السوشيال ميديا يا مصر؟!!!

لحد امتى مش هتحسو بالمبدع الحقيقي وتتسببوله في إحباط واكتئاب؟!!!

انا لو روحت رميت نفسي من فوق مبنى عالي ولا كوبري قصر النيل الديوان هيطلع في اقل من ٢٤ ساعة..

وكل الناس هتشير كلماتي.. ويتكلموا عن اني قد ايه كنت مبدعة محدش حس بيها.. 

لحد امتى هنفضل كده حد من وزارة السخافة " الثقافة" وزارة الثقافة المصرية يجاوبني..

انا كتبت البوست ده عشان لو حصلي اي حاجة وزارة الثقافة المصرية هتبقى المتهم الأول والأخير... 

وشكراً